Минеи Богослужебные.
Святы́хъ четы́редесяти пяти́ му́чениковъ, и́же въ Никопо́ли Арме́нстѣй.
ВЕЧЕРЪ.
Всехва́льніи му́ченицы,/ вы́, ка́меніемъ сокруша́еми,/ Христа́ Ка́мене не отверго́стеся неруши́маго,/ но, побѣдоно́сцы/ благода́тію бы́вше,/ со а́нгельскими ли́ки ра́дуетеся./ Съ ни́миже моли́теся/ дарова́ти душа́мъ на́шимъ/ ми́ръ и ве́лію ми́лость.
Добропобѣ́дніи му́ченицы,/ въ темни́цахъ ку́пно затворя́еми,/ я́ко за́повѣдемъ Бо́жіимъ храни́тели,/ и истаява́еми жа́ждею,/ съ небесе́ ро́су прія́сте,/ ва́съ духо́вно прохла́ждшу./ Тѣ́мже моли́теся/ дарова́ти душа́мъ на́шимъ/ ми́ръ и ве́лію ми́лость.
Непобѣди́міи му́ченицы,/ жи́знь и́стинную жела́юще/ и при́сно пребыва́ющую,/ сме́рть непра́ведну беззако́ннымъ мече́мъ,/ ра́дующеся, подъя́сте,/ и ны́нѣ съ му́ченики весели́теся,/ съ ни́миже моли́теся/ дарова́ти душа́мъ на́шимъ/ ми́ръ и ве́лію ми́лость.
Всепѣ́тая Влады́чице,/ наде́жде вѣ́рныхъ и утвержде́ніе,/ прибѣ́жище и по́мощь,/ Тя́ мо́лимъ:/ отъ вся́кія бѣды́ рабы́ Твоя́ сохрани́,/ вѣ́рою покланя́ющіяся Рождеству́ Твоему́./ Его́же моли́/ дарова́ти душа́мъ на́шимъ/ ми́ръ и ве́лію ми́лость.
Своего́ Агнца/ Агница и непоро́чная Влады́чица/ на Крестѣ́ я́ко ви́дѣ,/ зра́ка не иму́ща, ниже́ добро́ты, —/ увы́ Мнѣ́, — рыда́ющи, глаго́лаше, —/ гдѣ́ добро́та Твоя́ за́йде, Сладча́йшій?/ гдѣ́ благолѣ́піе?/ гдѣ́ благода́ть блиста́ющая/ о́браза Твоего́,/ Сы́не Мо́й любе́знѣйшій?
Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.
НА УТРЕНИ.
Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.
Богому́дренно, вѣ́рніи, во́ины Христо́вы и страстоте́рпцы воспое́мъ, я́ко потреби́тели ле́сти и побѣди́тели свѣ́тлы, Бо́гу побѣ́дную пѣ́снь пою́ще, я́ко просла́вися.
На земли́ страда́льцы подвиза́вшеся свѣ́тло и му́ки претерпѣ́сте, на небесѣ́хъ вѣенцы́ прія́сте, согла́сно воспѣва́юще пѣ́снь побѣ́дную, я́ко просла́вися.
Еди́нствомъ душе́внымъ свя́зани вѣ́рно, отъ ле́сти отврати́стеся и побѣди́тели вѣнцено́сцы яви́стеся, согла́сно воспѣва́юще пѣ́снь побѣ́дную, я́ко просла́вися.
Богоро́диченъ: Пречи́стая Ма́ти Бо́жія, воплоще́ннаго изъ Тебе́ и отъ нѣ́дръ Роди́тельныхъ не отлучи́вшагося Бо́га непреста́нно моли́ отъ вся́каго обстоя́нія спасти́, я́же созда́.
Ирмо́съ: Си́лою Креста́ Твоего́, Христе́, утверди́ мое́ помышле́ніе во е́же пѣ́ти и сла́вити спаси́тельное Твое́ Вознесе́ніе.
Ра́зумомъ Христо́вымъ во́ини укра́шени, нечести́ваго врага́ потопи́сте струя́ми крове́й ва́шихъ.
Тѣ́ло свое́ преда́вше го́рькимъ и лю́тымъ му́камъ, достохва́льніи му́ченицы, и Боже́ственное наслѣ́діе воспрія́сте вѣ́рою.
Ка́меннымъ, страстоте́рпцы, мета́ніемъ повелѣ́ніемъ мучи́теля сокруша́еми, благовѣ́рія держа́ву крѣ́пко соблюдо́сте.
Богоро́диченъ: Непреста́нно моли́, Чи́стая, съ му́ченики Проше́дшаго изъ чре́слъ Твои́хъ изба́вити отъ ле́сти діа́воли пою́щія Тя́, Всенепоро́чная.
Во́ини Христо́вы до́бліи, подви́гшеся до́брѣ, лука́ваго врага́ до конца́ потопи́ша кро́вными струя́ми, ка́меніемъ сокруша́еми и мечи́ ссѣка́еми, огне́мъ сожига́еми и въ во́ду вмета́еми, вѣнцено́сцы показа́шася я́вѣ, тѣ́мже что́ми су́ть и вѣ́рою сла́вими.
Иже на престо́лѣ херуви́мстѣмъ сѣдя́й и въ нѣ́дрѣхъ Отчихъ водворя́яся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ: вопло́щся бо Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́. Его́же умоли́ спасти́ся рабо́мъ Твои́мъ.
Изъ Безнача́льнаго Отца́ Рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, — увы́ Мнѣ́, Любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? пою́ Тя́, Долготерпѣли́ве.
Ирмо́съ: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.
Боголюби́выми содержи́ми обы́чаи, богопроти́внаго врага́ страда́льческій ли́къ побѣди́лъ е́сть, благода́тію Спа́совою укрѣпля́емь.
Богозва́нный по́лкъ страстоте́рпецъ Христо́выхъ, богопроти́вныхъ мно́жество злочести́выхъ вра́гъ побѣди́сте, воспѣва́юще: сла́ва си́лѣ Твое́й, Го́споди.
Свѣ́тъ непристу́пный ви́дѣвше страстоте́рпцы, въ темни́цѣ сѣдя́ще, многобо́жія тму́ и́дольскія ле́сти разори́ша, Бо́жіею си́лою укрѣпля́еми.
Богоро́диченъ: Осѣни́ Тя́, Дѣ́во, Вы́шняго си́ла и ра́й содѣ́ла Тя́, живо́тное дре́во иму́щи посредѣ́, Хода́тая и Го́спода.
Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́, ино́го не вѣ́мы.
Словесы́ воспита́ни Ду́ха Свята́го, и́дольское безслове́сіе му́ченицы упраздни́ша.
Звѣ́зды свѣтоно́сныя бы́вше страстоте́рпцы и цвѣ́ты вѣ́ры благоуха́нія испуща́юще.
Ни́ва яви́стеся, святíи, Вы́шняго, серпы́ муче́нія пожина́еми, всехва́льніи.
Богоро́диченъ: Не преста́й моля́щи, Богоро́дице, Его́же родила́ еси́, спасти́ ду́ши на́ша, прилѣ́жно воспѣва́ющихъ Тя́.
Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ Тебѣ́, Человѣколю́бцу, и спасе́ мя десни́ца Твоя́, Го́споди.
Веселя́щеся, му́ченицы вопія́ху: въ ру́цѣ Твои́, Влады́ко Человѣколю́бче, пріими́ ду́хи на́ша и поко́й и́хъ: Тебе́ бо лю́бимъ, еди́наго Многоми́лостиваго.
Ангеловъ равносе́льницы бы́ша ли́къ му́ченикъ Твои́хъ, Человѣколю́бче, тече́ніе бо сконча́вше, ны́нѣ мо́лятъ спасти́ся душа́мъ на́шимъ.
Му́ченическая сла́ва, му́ченическая красота́, му́ченическій ли́че богоизбра́нный, прилѣ́жно моли́те спасти́ся всѣ́мъ, прибѣга́ющимъ къ ва́мъ.
Богоро́диченъ: Зача́тія Твоего́ безсѣ́меннаго чу́до ко́е сло́во изрещи́ мо́жетъ, Пренепоро́чная? Бо́га бо зачала́ еси́, за милосе́рдіе къ на́мъ прише́дшаго.
Христа́ ра́ди, му́ченицы, мно́гія му́ки подъя́сте, и многобо́жіе низложи́сте все́ и́дольское, и разруши́сте безбо́жіе вся́кія пре́лести, Христо́вою си́лою сія́ попра́вше, на́съ всѣ́хъ вѣ́рно науча́ете вопи́ти я́вѣ: Аллилу́ія.
Ирмо́съ: Въ пещи́ о́гненнѣй пѣсносло́вцы спасы́й о́троки, благослове́нъ Бо́гъ оте́цъ на́шихъ.
Въ пещи́, Христе́, страстоте́рпцы Твои́ вопія́ху: благослове́нъ Бо́гъ оте́цъ на́шихъ.
Просвѣще́ни свѣ́томъ Тро́ическимъ, страда́льцы, съ весе́ліемъ ду́ши своя́ преда́ша, пою́ще: благослове́нъ Бо́гъ оте́цъ на́шихъ.
Предстоя́ще Бо́гу, вѣнцено́сцы страда́льцы, съ весе́ліемъ, Тому́ за ны́ моли́теся.
Богоро́диченъ: Яко спасе́ніе на́ше, Тя́, Богоро́дице, мо́лимъ: моли́ за ны́ Вопло́щшагося изъ Тебе́.
Ирмо́съ: Изъ Отца́ пре́жде вѣ́къ рожде́ннаго Сы́на и Бо́га и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки.
Съ му́ченики бу́ди проше́ніе на́ше вѣ́рныхъ, и тѣ́хъ наслѣ́дія прича́стницы бу́демъ, Христа́ пою́ще и превознося́ще Его́ во вѣ́ки.
Ра́достію серде́чною ли́къ терпѣли́выхъ страда́лецъ отъ Христа́ вѣнцы́ боголѣ́пно пріе́млетъ, и свѣ́тло пое́тъ, и превозно́ситъ Его́ во вѣ́ки.
Струя́ми крове́й ва́шихъ обагри́вшеся, достохва́льніи, и на небесѣ́хъ во вѣ́ки со Христо́мъ ца́рствуете, благоче́стно пою́ще и превознося́ще Его́ во вѣ́ки.
Богоро́диченъ: Херуви́мъ вы́шши яви́лася еси́, Богоро́дице Чи́стая, во чре́вѣ Твое́мъ Сѣдя́щаго на ни́хъ поне́сши, Его́же со безпло́тными, земнíи, славосло́вимъ и превозно́симъ во вѣ́ки.
Ирмо́съ: Тя́, па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи, единому́дренно велича́емъ.
За о́бщее спасе́ніе моли́теся, пресла́вніи му́ченицы, Христу́ предстоя́ще, Его́же ра́ди и му́ки претерпѣ́сте.
Си́лою крѣ́пкою преле́стную тве́рдость низложи́сте, непобѣди́міи, и ны́нѣ въ жили́щахъ небе́сныхъ со а́нгелы жи́ти сподо́бистеся.
Зако́нными обы́чаи му́ченическими побѣди́вше го́рдаго мучи́теля и вѣнцы́ прія́сте пра́ведныя, всечестнíи.
Богоро́диченъ: Ра́дуйся, Богоро́дице, Ма́ти Христа́ Бо́га, Его́же родила́ еси́, моли́ съ му́ченики грѣхо́въ оставле́ніе дарова́ти вѣ́рою воспѣва́ющимъ Тя́.
Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 89 – 92.