Апостол
К Римляном Послание Святаго Апостола Павла.
Зачало: 79 79 от полу́ 80 81 81 от полу́ 82 83 84 85 86 87 88 88 от полу́ 89 90 91 92 93 94 95 96 96 от полу́ 1 96 от полу́ 2 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121
Послание к римляном, зачало 79.
Рим 1:1–7; 13–17
Во вторник первыя недели по Пятидесятнице.
Па́вел, раб Иису́с Христо́в, зван Апо́стол, избра́н в благове́стие Бо́жие, е́же пре́жде обеща́ проро́ки Свои́ми в писа́ниих святы́х, о Сы́не Свое́м, бы́вшем от се́мене Дави́дова по пло́ти, нарече́ннем Сы́не Бо́жии в си́ле, по ду́ху святы́ни, из воскресе́ния от ме́ртвых, Иису́са Христа́ Го́спода на́шего, И́мже прия́хом благода́ть и апо́стольство в послуша́ние ве́ры во всех язы́цех, о и́мени Его́. В ни́хже есте́ и вы, зва́ни Иису́су Христу́. Всем су́щым в Ри́ме возлю́бленным Бо́гу, зва́нным святы́м. Благода́ть вам и мир от Бо́га Отца́ на́шего, и Го́спода Иису́са Христа́.
Не хощу́ же не ве́дети вам, бра́тие, я́ко мно́жицею восхоте́х приити́ к вам, и возбране́н бых досе́ле, да не́кий плод име́ю и в вас, я́коже и в про́чих язы́цех. Е́ллином же и ва́рваром, му́дрым же и неразу́мным до́лжен есмь. Та́ко есть, е́же по моему́ усе́рдию и вам су́щым в Ри́ме благовести́ти. Не стыжу́ся бо благовествова́нием Христо́вым: си́ла бо Бо́жия есть во спасе́ние вся́кому ве́рующему, Иуде́ови же пре́жде и Е́ллину. Пра́вда бо Бо́жия в нем явля́ется от ве́ры в ве́ру, я́коже есть пи́сано: пра́ведный же от ве́ры жив бу́дет.
Послание к римляном, зачало 79: от полу́.
Рим 1:7–12
В субботу первую по Пятидесятнице.
Бра́тие, благода́ть вам и мир от Бо́га Отца́ на́шего, и Го́спода Иису́са Христа́. Пе́рвое у́бо благодарю́ Бо́га моего́ Иису́сом Христо́м о всех вас, я́ко ве́ра ва́ша возвеща́ется во всем ми́ре. Свиде́тель бо ми есть Бог, Ему́же служу́ ду́хом мои́м во благовествова́нии Сы́на Его́, я́ко безпреста́ни па́мять о вас творю́, всегда́ в моли́твах мои́х моля́ся, а́ще у́бо когда́ поспе́шен бу́ду во́лею Бо́жиею приити́ к вам. Жела́ю бо ви́дети вас, да не́кое пода́м вам дарова́ние духо́вное, ко утвержде́нию ва́шему. Сие́ же есть, соуте́шитися в вас ве́рою о́бщею, ва́шею же и мое́ю.
Послание к римляном, зачало 80.
Рим 1:18–27
В среду первыя недели.
Бра́тие, открыва́ется бо гнев Бо́жий с небесе́ на вся́кое нече́стие и непра́вду челове́ческую, содержа́щих и́стину в непра́вде. Зане́же разу́мное Бо́жие я́ве есть в них, Бог бо яви́л есть им. Неви́димая бо Его́, от созда́ния ми́ра творе́ньми помышля́ема, ви́дима суть, и присносу́щная си́ла Его́ и Божество́, во е́же бы́ти им безотве́тным. Зане́же разуме́вше Бо́га, не я́ко Бо́га просла́виша или́ благодари́ша, но осуети́шася помышле́нии свои́ми, и омрачи́ся неразу́мное их се́рдце. Глаго́лющеся бы́ти му́дры, объюроде́ша, и измени́ша сла́ву нетле́ннаго Бо́га в подо́бие о́браза тле́нна челове́ка и птиц и четвероно́г и гад. Те́мже и предаде́ их Бог в по́хотех серде́ц их в нечистоту́, во е́же скверни́тися телесе́м их в себе́ саме́х. И́же премени́ша и́стину Бо́жию во лжу, и почто́ша и послужи́ша тва́ри па́че Творца́, И́же есть благослове́н во ве́ки, ами́нь. Сего́ ра́ди предаде́ их Бог в стра́сти безче́стия. И жены́ бо их измени́ша есте́ственную подо́бу в презесте́ственную. Та́кожде и му́жи, оста́вльше есте́ственную подо́бу же́нска по́ла, разжего́шася по́хотию свое́ю друг на дру́га, му́жи на муже́х студ содева́юще, и возме́здие, е́же подоба́ше пре́лести их, в себе́ восприе́млюще.
Послание к римляном, зачало 81.
Рим 1:28–2:9
В четверток первыя недели.
Бра́тие, я́коже не искуси́ша име́ти Бо́га в ра́зуме, сего́ ра́ди предаде́ их Бог в неиску́сен ум, твори́ти неподо́бная, испо́лнены вся́кия непра́вды, блуже́ния, лука́вства, лихоима́ния, зло́бы. Испо́лнены за́висти, уби́йства, рве́ния, льсти, злонра́вия. Шепотники́, клеветники́, богоме́рзки, досади́тели, велича́вы, го́рды, обрета́тели злых, роди́телем непокори́вы, неразу́мны, непримири́тельны, нелюбо́вны, неклятвохрани́тельны, неми́лостивны. Не́цыи же и оправда́ние Бо́жие разуме́вше, я́ко такова́я творя́щии досто́йни сме́рти суть, не то́чию са́ми творя́т, но и соизволя́ют творя́щым. Сего́ ра́ди безотве́тен еси́, о, челове́че всяк судя́й: и́мже бо судо́м су́диши дру́га, себе́ осужда́еши. Та́яжде бо твори́ши судя́й. Ве́мы же, я́ко суд Бо́жий есть пои́стинне на творя́щих такова́я. Помышля́еши ли же сия́, о челове́че, судя́й такова́я творя́щым и творя́ сам та́яжде, я́ко ты избежи́ши ли суда́ Бо́жия, или́ о бога́тстве бла́гости Его́ и кро́тости и долготерпе́нии неради́ши, неве́дый, я́ко бла́гость Бо́жия на покая́ние тя веде́т? По жесто́кости же твое́й и непока́янному се́рдцу, собира́еши себе́ гнев в день гне́ва и открове́ния пра́веднаго суда́ Бо́жия, И́же возда́ст коему́ждо по дело́м его́. О́вым у́бо, по терпе́нию де́ла блага́го, сла́ву и честь и нетле́ние и́щущым, живо́т ве́чный. А и́же по рве́нию противля́ющимся у́бо и́стине, повину́ющимся же непра́вде, я́рость и гнев. Скорбь и теснота́ на вся́ку ду́шу челове́ка творя́щаго зло́е, иуде́а же пре́жде и е́ллина.
Послание к римляном, зачало 81: от полу́.
Рим 2:10–16
Неделя вторая.
Бра́тие, сла́ва и честь и мир вся́кому де́лающему благо́е, иуде́еви же пре́жде и е́ллину. Несть бо на лица́ зре́ния у Бо́га. Ели́цы бо беззако́нно согреши́ша, беззако́нно и поги́бнут, и ели́цы в зако́не согреши́ша, зако́ном суд прии́мут. Не слы́шателие бо зако́на пра́ведни пред Бо́гом, но творцы́ зако́на, си́и оправдя́тся. Егда́ бо язы́цы, не иму́ще зако́на, естество́м зако́нная творя́т; си́и, зако́на не иму́ще, са́ми себе́ суть зако́н. И́же явля́ют де́ло зако́нное напи́сано в сердца́х свои́х, спослушеству́ющи им со́вести, и между́ собо́ю помысло́м осужда́ющым или́ отвеща́ющым, в день, егда́ су́дит Бог та́йная челове́ком, по благове́стию моему́, Иису́сом Христо́м.
Послание к римляном, зачало 82.
Рим 2:14–29
В пяток первыя недели.
Бра́тие, егда́ язы́цы, не иму́ще зако́на, естество́м зако́нная творя́т, си́и, зако́на не иму́ще, са́ми себе́ суть зако́н. И́же явля́ют де́ло зако́нное напи́сано в сердца́х свои́х, спослушеству́ющи им со́вести, и между́ собо́ю помысло́м осужда́ющым или́ отвеща́ющым, в день, егда́ су́дит Бог та́йная челове́ком, по благове́стию моему́, Иису́сом Христо́м. Се ты иуде́й имену́ешися, и почива́еши на зако́не, и хва́лишися о Бо́зе, и разуме́еши во́лю, и разсужда́еши лу́чшая, науча́емь от зако́на, упова́я же себе́ вожда́ бы́ти слепы́м, све́та су́щым во тме, наказа́теля безу́мным, учи́теля младе́нцем, иму́ща о́браз ра́зума и и́стины в зако́не. Науча́я у́бо ина́го, себе́ ли не учи́ши, пропове́дая не кра́сти, кра́деши; глаго́ля не прелюбы́ твори́ти, прелюбы́ твори́ши; гнуша́яся и́дол, свята́я кра́деши; и́же в зако́не хва́лишися, преступле́нием зако́на Бо́га безче́ствуеши. И́мя бо Бо́жие ва́ми ху́лится во язы́цех, я́коже есть пи́сано. Обре́зание у́бо по́льзует, а́ще зако́н твори́ши. А́ще же зако́на престу́пник еси́, обре́зание твое́ необре́зание бысть. А́ще у́бо необре́зание оправда́ние зако́на сохрани́т, не необре́зание ли его́ во обре́зание вмени́тся, и осу́дит е́же от естества́ необре́зание, зако́н соверша́ющее, тебе́, и́же Писа́нием и обре́занием су́ща престу́пника зако́на. Не бо и́же я́ве, иуде́й есть, ни е́же я́ве во пло́ти, обре́зание, но и́же вта́йне иуде́й, и обре́зание се́рдца ду́хом, а не Писа́нием, ему́же похвала́ не от челове́к, но от Бо́га.
Послание к римляном, зачало 83.
Рим 2:28–3:18
В понедельник 2-я недели.
Бра́тие, не и́же я́ве, иуде́й есть, ни е́же я́ве во пло́ти, обре́зание. Но и́же вта́йне иуде́й, и обре́зание се́рдца ду́хом, а не Писа́нием, ему́же похвала́ не от челове́к, но от Бо́га. Что у́бо ли́шшее иуде́ю? Или́ ка́я по́льза обре́зания? Мно́го по вся́кому образу: пе́рвее у́бо, я́ко вве́рена бы́ша им словеса́ Бо́жия. Что бо, а́ще не ве́роваша не́цыи? Еда́ у́бо неве́рствие их ве́ру Бо́жию упраздни́т? Да не бу́дет: да бу́дет же Бог и́стинен, всяк же челове́к ложь, я́коже есть пи́сано: я́ко да оправди́шися во словесе́х Твои́х, и победи́ши, внегда́ суди́ти Ти. А́ще ли непра́вда на́ша Бо́жию пра́вду составля́ет, что рече́м? Еда́ ли непра́веден Бог нанося́й гнев? По челове́ку глаго́лю, да не бу́дет, поне́же ка́ко суди́ти и́мать Бог ми́ру? А́ще у́бо и́стина Бо́жия в мое́й лжи избы́точествова в сла́ву Его́, что еще́ и аз я́ко гре́шник осужда́юся, и не я́коже ху́лимся, и я́коже глаго́лют не́цыи нас глаго́лати, я́ко сотвори́м злая, да прии́дут блага́я, и́хже суд пра́веден есть. Что у́бо, преиме́ем ли? Ника́коже, предукори́хом бо иуде́и же и е́ллины вся под грехо́м бы́ти, я́коже есть пи́сано. Я́ко несть пра́веден никто́же, несть разумева́яй, и несть взыска́яй Бо́га, вси уклони́шася, вку́пе непотре́бни бы́ша. Несть творя́й благосты́ню, несть да́же до еди́наго. Гроб отве́рст горта́нь их, язы́ки свои́ми льща́ху. Яд а́спидов под устна́ми их. И́хже уста́ кля́твы и го́рести по́лна суть. Ско́ры но́ги их пролия́ти кровь, сокруше́ние и озлобле́ние на путе́х их, и пути́ ми́рнаго не позна́ша. Несть стра́ха Бо́жия пред очи́ма их.
Послание к римляном, зачало 84.
Рим 3:19–26
В субботу 2-ю.
Бра́тие, ве́мы, я́ко ели́ка зако́н глаго́лет, су́щым в зако́не глаго́лет, да вся́ка уста́ заградя́тся, и пови́нен бу́дет весь мир Бо́гови. Зане́ от дел зако́на не оправди́тся вся́ка плоть пред Ним, зако́ном бо позна́ние греха́. Ны́не же кроме́ зако́на пра́вда Бо́жия яви́ся, свиде́тельствуема от зако́на и проро́к. Пра́вда же Бо́жия ве́рою Иису́с Христо́вою во вся и на всех ве́рующих. Несть бо ра́знствия, вси бо согреши́ша, и лише́ни суть сла́вы Бо́жия, оправда́еми ту́не благода́тию Его́, избавле́нием, е́же о Христе́ Иису́се. Его́же предположи́ Бог очище́ние ве́рою в Кро́ви Его́, в явле́ние пра́вды Своея́, за отпуще́ние пре́жде бы́вших грехо́в, в долготерпе́нии Бо́жии, и в показа́ние пра́вды Его́ в ны́нешнее вре́мя, во е́же бы́ти Ему́ пра́ведну и оправда́ющу су́щаго от ве́ры Иису́совы.
Послание к римляном, зачало 85.
Рим 3:28–4:3
В субботу 3-ю.
Бра́тие, мы́слим ве́рою оправда́тися челове́ку, без дел зако́на. Или́ иуде́ев Бог то́кмо, а не и язы́ков? Ей и язы́ков. Поне́же еди́н Бог, И́же оправди́т обре́зание от ве́ры и необре́зание ве́рою. Зако́н ли у́бо разоря́ем ве́рою? Да не бу́дет, но зако́н утвержда́ем. Что у́бо рече́м, Авраа́ма отца́ на́шего обрести́ по пло́ти? А́ще бо Авраа́м от дел оправда́ся, и́мать похвалу́, но не у Бо́га. Что бо Писа́ние глаго́лет? Ве́рова же Авраа́м Бо́гови, и вмени́ся ему́ в пра́вду.
Послание к римляном, зачало 86.
Рим 4:4–12
Во вторник 2-я недели.
Бра́тие, де́лающему мзда не вменя́ется по благода́ти, но по до́лгу. А не де́лающему, ве́рующему же во Оправда́ющаго нечести́ва, вменя́ется ве́ра его́ в пра́вду. Я́коже и Дави́д глаго́лет блаже́нство челове́ка, ему́же вменя́ет Бог пра́вду, без дел зако́на: блаже́ни, и́хже отпусти́шася беззако́ния и и́хже прикры́шася греси́. Блаже́н муж, ему́же не вмени́т Госпо́дь греха́. Блаже́нство у́бо сие́ на обре́зание ли, или́ на необре́зание? Глаго́лем бо, я́ко вмени́ся Авраа́му ве́ра в пра́вду. Ка́ко у́бо вмени́ся ему́, во обре́зании ли су́щу, или́ в необре́зании, не во обре́зании, но в необре́зании. И зна́мение прия́т обре́зания, печа́ть пра́вды ве́ры, я́же в необре́зании. Я́ко бы́ти ему́ отцу́ всех ве́рующих в необре́зании, во е́же вмени́тися и тем в пра́вду. И отцу́ обре́зания, не су́щым то́чию от обре́зания, но и ходя́щым в стопа́х ве́ры, я́же в необре́зании отца́ на́шего Авраа́ма.
Послание к римляном, зачало 87.
Рим 4:13–25
В среду 2-я недели.
Бра́тие, не зако́ном обетова́ние Авраа́му, или́ се́мени его́, е́же бы́ти ему́ насле́днику ми́рови, но пра́вдою ве́ры. А́ще бо су́щии от зако́на насле́дницы, испраздни́ся ве́ра, и разори́ся обетова́ние. Зако́н бо гнев соде́ловает: иде́же бо несть зако́на, ту ни преступле́ния. Сего́ ра́ди от ве́ры, да по благода́ти, во е́же бы́ти изве́стну обетова́нию всему́ се́мени, не то́чию су́щему от зако́на, но и су́щему от ве́ры Авраа́мовы, и́же есть оте́ц всем нам, я́коже есть пи́сано: я́ко отца́ мно́гим язы́ком положи́х тя, пря́мо Ему́же ве́рова Бо́гу, животворя́щему ме́ртвыя и нарица́ющу не су́щая я́ко су́щая. И́же па́че упова́ния во упова́ние ве́рова, во е́же бы́ти ему́ отцу́ мно́гим язы́ком, по рече́нному: та́ко бу́дет се́мя твое́. И не изнемо́г ве́рою, ни усмотре́ своея́ пло́ти уже́ умерщвле́нныя, столе́тен не́где сый, и ме́ртвости ложе́сн Са́рриных. Во обетова́нии же Бо́жии не усумне́ся неве́рованием, но возмо́же ве́рою, дав сла́ву Бо́гови. И изве́стен быв, я́ко е́же обеща́, си́лен есть и сотвори́ти. Те́мже и вмени́ся ему́ в пра́вду. Не пи́сано же бысть за того́ еди́наго то́чию, я́ко вмени́ся ему́, но и за ны, и́мже хо́щет вмени́тися, ве́рующым во Воскреси́вшаго Иису́са Христа́ Го́спода на́шего из ме́ртвых, И́же пре́дан бысть за прегреше́ния на́ша и воста́ за оправда́ние на́ше.
Послание к римляном, зачало 88.
Рим 5:1–10
Неделя 3-я.
Бра́тие, оправди́вшеся ве́рою, мир и́мамы к Бо́гу Го́сподем на́шим Иису́с Христо́м, И́мже и приведе́ние обрето́хом ве́рою во благода́ть сию́, в не́йже стои́м, и хва́лимся упова́нием сла́вы Бо́жия. Не то́чию же, но и хва́лимся в ско́рбех, ве́дяще, я́ко скорбь терпе́ние соде́ловает, терпе́ние же иску́сство, иску́сство же упова́ние, упова́ние же не посрами́т. Я́ко любы́ Бо́жия излия́ся в сердца́ на́ша Ду́хом Святы́м да́нным нам. Еще́ бо Христо́с су́щым нам немощны́м, по вре́мени за нечести́вых у́мре. Едва́ бо за пра́ведника кто у́мрет, за блага́го бо не́гли кто и де́рзнет умре́ти. Составля́ет же Свою́ любо́вь к нам Бог, я́ко еще́ гре́шником су́щым нам, Христо́с за ны у́мре. Мно́го у́бо па́че, оправда́ни бы́вше ны́не Кро́вию Его́, спасе́мся Им от гне́ва. А́ще бо врази́ бы́вше примири́хомся Бо́гу сме́ртию Сы́на Его́, мно́жае па́че примири́вшеся спасе́мся в животе́ Его́.
Послание к римляном, зачало 88: от полу́.
Рим 5:6–11
В 3-й час Пятка великаго.
Бра́тие, Христо́с су́щим нам немощны́м, по вре́мени за нечести́вых у́мре. Едва́ бо за пра́ведника кто у́мрет, за блага́го бо не́гли кто и де́рзнет умре́ти. Составля́ет же Свою́ любо́вь в нас Бог, я́ко еще́ гре́шником су́щим нам, Христо́с за ны у́мре. Мно́го же у́бо па́че оправда́ни бы́вше ны́не Кро́вию Его́, спасе́мся Им от гне́ва. А́ще бо врази́ бы́вше, примири́хомся Бо́гу сме́ртию Сы́на Его́, мно́жае па́че примири́вшеся, спасе́мся в животе́ Его́. Не то́чию же, но и хва́лимся о Бо́зе Го́сподем на́шим Иису́с Христо́м, И́мже ны́не примире́ние прия́хом.
Послание к римляном, зачало 89.
Рим 5:10–16
В четверток 2-я недели.
Бра́тие, а́ще врази́ бы́вше примири́хомся Бо́гу сме́ртию Сы́на Его́, мно́жае па́че примири́вшеся спасе́мся в животе́ Его́. Не то́чию же, но и хва́лимся о Бо́зе Го́сподем на́шим Иису́с Христо́м, И́мже ны́не примире́ние прия́хом. Сего́ ра́ди я́коже еди́нем челове́ком грех в мир вни́де, и грехо́м смерть, и та́ко смерть во вся челове́ки вни́де, в не́мже вси согреши́ша. До зако́на бо грех бе в ми́ре, грех же не вменя́шеся, не су́щу зако́ну. Но ца́рствова смерть от Ада́ма да́же до Моисе́а и над несогре́шшими по подо́бию преступле́ния Ада́мова, и́же есть о́браз бу́дущаго. Но не я́коже прегреше́ние, та́ко и дар. А́ще бо прегреше́нием еди́наго мно́зи умро́ша, мно́жае па́че благода́ть Бо́жия и дар благода́тию еди́наго Челове́ка Иису́са Христа́ во мно́гих преизли́шествова. И не я́коже еди́нем согре́шшим, дарова́ние. Грех бо из еди́наго во осужде́ние, дар же от мно́гих прегреше́ний во оправда́ние.
Послание к римляном, зачало 90.
Рим 5:17–6:2
В пяток 2-я недели.
Бра́тие, а́ще еди́наго прегреше́нием смерть ца́рствова еди́нем, мно́жае па́че избы́ток благода́ти и дар пра́вды прие́млюще, в жи́зни воцаря́тся еди́нем Иису́с Христо́м. Те́мже у́бо, я́коже еди́наго прегреше́нием во вся челове́ки вни́де осужде́ние, та́кожде и еди́наго оправда́нием во вся челове́ки вни́де оправда́ние жи́зни. Я́коже бо ослуша́нием еди́наго челове́ка гре́шни бы́ша мно́зи, си́це и послуша́нием еди́наго пра́ведни бу́дут мно́зи. Зако́н же привни́де, да умно́жится прегреше́ние, иде́же бо умно́жися грех, преизбы́точествова благода́ть. Да я́коже ца́рствова грех во смерть, та́кожде и благода́ть воцари́тся пра́вдою в жизнь ве́чную, Иису́с Христо́м Го́сподем на́шим. Что у́бо рече́м, пребу́дем ли во гресе́ да благода́ть преумно́жится? Да не бу́дет. И́же бо умро́хом греху́, ка́ко па́ки оживе́м о нем?
Послание к римляном, зачало 91.
Рим 6:3–11
Во святую и великую Субботу, вечер.
Бра́тие, ели́цы во Христа́ Иису́са крести́хомся, в смерть Его́ крести́хомся. Спогребо́хомся у́бо Ему́ креще́нием в смерть, да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти на́чнем. А́ще бо сообра́зни бы́хом подо́бию сме́рти Его́, то и воскресе́нию бу́дем. Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо, оправди́ся от греха́. А́ще ли умро́хом со Христо́м, ве́руем, я́ко и жи́ви бу́дем с Ним, ве́дяще, я́ко Христо́с воста́ от ме́ртвых, ктому́ уже́ не умира́ет, смерть Ему́ ктому́ не облада́ет. Е́же бо у́мре, греху́ у́мре еди́ною, а е́же живе́т, Бо́гови живе́т. Та́кожде и вы помышля́йте себе́, ме́ртвым у́бо бы́ти греху́, живы́м же Бо́гови, о Христе́ Иису́се Го́споде на́шем.
Послание к римляном, зачало 92.
Рим 6:11–17
В субботу 4-ю.
Бра́тие, помышля́йте себе́ ме́ртвых у́бо бы́ти греху́, живы́м же Бо́гови, о Христе́ Иису́се Го́споде на́шем. Да не ца́рствует у́бо грех в ме́ртвеннем ва́шем те́ле, во е́же послу́шати его́ в по́хотех его́, ниже́ представля́йте у́ды ва́ша ору́жия непра́вды греху́, но представля́йте себе́ Бо́гови я́ко от ме́ртвых жи́вы, и у́ды ва́ша ору́жия пра́вды Бо́гови. Грех бо ва́ми да не облада́ет. Не́сте бо под зако́ном, но под благода́тию. Что у́бо, согреши́м ли, зане́ не́смы под зако́ном, но под благода́тию, да не бу́дет. Не ве́сте ли, я́ко ему́же представля́ете себе́ рабы́ в послуша́ние, раби́ есте́, его́же послу́шаете, или́ греха́ в смерть, или́ послуша́ния в пра́вду? Благодари́м у́бо Бо́га, я́ко бе́сте раби́ греху́, послу́шасте же от се́рдца, во́ньже и преда́стеся о́браз уче́ния.
Послание к римляном, зачало 93.
Рим 6:18–23
Неделя 4-я.
Бра́тие, свобо́ждшеся от греха́, порабо́тистеся пра́вде. Челове́ческо глаго́лю, за не́мощь пло́ти ва́шея. Я́коже у́бо предста́висте у́ды ва́ша рабы́ нечистоте́ и беззако́нию в беззако́ние, та́ко ны́не предста́вите у́ды ва́ша рабы́ пра́вде во святы́ню. Егда́ бо раби́ бе́сте греха́, свобо́дни бе́сте от пра́вды. Кий у́бо тогда́ име́сте плод? О ни́хже ны́не стыдите́ся, кончи́на бо о́нех, смерть. Ны́не же свобо́ждшеся от греха́, порабо́щшеся же Бо́гови, и́мате плод ваш во святы́ню, кончи́ну же жизнь ве́чную. Обро́цы бо греха́ смерть: дарова́ние же Бо́жие живо́т ве́чный о Христе́ Иису́се Го́споде на́шем.
Послание к римляном, зачало 94.
Рим 7:1–13
В понедельник 3-я недели.
Бра́тие, ве́дущым зако́н глаго́лю, я́ко зако́н облада́ет над челове́ком, во ели́ко вре́мя живе́т? И́бо мужа́тая жена́ жи́ву му́жу привя́зана есть зако́ном, а́ще ли же у́мрет муж ея́, разреши́тся от зако́на му́жескаго. Те́мже у́бо, жи́ву су́щу му́жу, прелюбоде́йца быва́ет, а́ще бу́дет му́жеви ино́му, а́ще ли у́мрет муж ея́, свобо́дна есть от зако́на, не бы́ти ей прелюбоде́йце, бы́вшей му́жу ино́му. Те́мже, бра́тие моя́, и вы умро́сте зако́ну те́лом Христо́вым, во е́же бы́ти вам ино́му, Воста́вшему из ме́ртвых, да плод принесе́м Бо́гови. Егда́ бо бе́хом во пло́ти, стра́сти грехо́вныя, я́же зако́ном, де́йствоваху во у́дех на́ших, во е́же плод твори́ти сме́рти. Ны́не же упраздни́хомся от зако́на, уме́рше, и́мже держи́ми бе́хом, я́ко рабо́тати нам Бо́гови во обновле́нии ду́ха, а не в ве́тхости пи́смене. Что у́бо рече́м? Зако́н ли грех? Да не бу́дет. Но греха́ не знах, то́чию зако́ном, по́хоти же не ве́дах, а́ще не бы зако́н глаго́лаше: не похо́щеши. Вину́ же прие́м грех за́поведию, соде́ла во мне вся́ку по́хоть, без зако́на бо грех мертв есть. Аз же живя́х кроме́ зако́на иногда́, прише́дши же за́поведи, грех у́бо оживе́, аз же умро́х, и обре́теся ми за́поведь, я́же в живо́т, сия́ в смерть, грех бо вину́ прие́м за́поведию, прельсти́ мя, и то́ю умертви́ мя. Те́мже у́бо зако́н свят, и за́поведь свята́ и пра́ведна и блага́. Благо́е ли у́бо бысть мне смерть? Да не бу́дет, но грех, да яви́тся грех, благи́м ми содева́я смерть, да бу́дет по премно́гу гре́шен грех за́поведию.
Послание к римляном, зачало 95.
Рим 7:14–8:2
Во вторник 3-я недели.
Бра́тие, ве́мы, я́ко зако́н духо́вен есть, аз же пло́тян есмь, про́дан под грех. Е́же бо содева́ю, не разуме́ю, не е́же бо хощу́, сие́ творю́, но е́же ненави́жду, то соде́ловаю. А́ще ли, е́же не хощу́, сие́ творю́, хвалю́ зако́н я́ко добр, ны́не же не ктому́ аз сие́ содева́ю, но живы́й во мне грех. Вем бо, я́ко не живе́т во мне, си́речь во пло́ти мое́й, до́брое: е́же бо хоте́ти прилежи́т ми, а е́же соде́яти до́брое, не обрета́ю. Не е́же бо хощу́ до́брое, творю́, но е́же не хощу́ зло́е, сие́ содева́ю. А́ще ли, е́же не хощу́ аз, сие́ творю́, уже́ не аз сие́ творю́, но живы́й во мне грех. Обрета́ю у́бо зако́н, хотя́щу ми твори́ти до́брое, я́ко мне зло́е прилежи́т. Соуслажда́юся бо зако́ну Бо́жию по вну́треннему челове́ку. Ви́жду же ин зако́н во у́дех мои́х, проти́ву вою́ющь зако́ну ума́ моего́ и пленя́ющь мя зако́ном грехо́вным, су́щим во у́дех мои́х. Окая́нен аз челове́к, кто мя изба́вит от те́ла сме́рти сея́? Благодарю́ Бо́га моего́ Иису́с Христо́м Го́сподем на́шим. Те́мже у́бо сам аз умо́м мои́м рабо́таю зако́ну Бо́жию, пло́тию же зако́ну грехо́вному. Ни еди́но у́бо ны́не осужде́ние су́щым о Христе́ Иису́се не по пло́ти ходя́щым, но по ду́ху. Зако́н бо ду́ха жи́зни о Христе́ Иису́се свободи́л мя есть от зако́на грехо́внаго и сме́рти.
Послание к римляном, зачало 96.
Рим 8:2–13
Среда 3-я недели.
Бра́тие, зако́н ду́ха жи́зни о Христе́ Иису́се свободи́л мя есть от зако́на грехо́внаго и сме́рти. Немощно́е бо зако́на, в не́мже немоществова́ше пло́тию, Бог Сы́на Своего́ посла́ в подо́бии пло́ти греха́, и о гресе́ осуди́ грех во пло́ти, да оправда́ние зако́на испо́лнится в нас, не по пло́ти ходя́щих, но по ду́ху. Су́щии бо по пло́ти, плотска́я му́дрствуют. А и́же по ду́ху, духо́вная. Мудрова́ние бо плотско́е смерть есть, а мудрова́ние духо́вное живо́т и мир, зане́ мудрова́ние плотско́е вражда́ на Бо́га, зако́ну бо Бо́жию не покаря́ется, ниже́ бо мо́жет. Су́щии же во пло́ти, Бо́гу угоди́ти не мо́гут. Вы же не́сте во пло́ти, но в ду́се, поне́же Дух Бо́жий живе́т в вас. А́ще же кто Ду́ха Христо́ва не и́мать, сей несть Его́в. А́ще ли Христо́с в вас, плоть у́бо мертва́ греха́ ра́ди, дух же живе́т пра́вды ра́ди. А́ще ли же Дух Воскреси́вшаго Иису́са от ме́ртвых живе́т в вас, Воздви́гий Христа́ из ме́ртвых оживотвори́т и ме́ртвенная телеса́ ва́ша, живу́щим Ду́хом Его́ в вас. Те́мже у́бо, бра́тие, до́лжни есмы́ не пло́ти, е́же по пло́ти жи́ти. А́ще бо по пло́ти живете́, и́мате умре́ти, а́ще ли ду́хом дея́ния плотска́я умерщвля́ете, жи́ви бу́дете.
Послание к римляном, зачало 96: от полу́ 1-е.
Рим 8:3–9А
Декемвриа 28.
Бра́тие, немощно́е зако́на, в не́мже немоществова́ше пло́тию, Бог Сы́на Своего́ посла́ в подо́бии пло́ти греха́, и о гресе́ осуди́ грех во пло́ти, да оправда́ние зако́на испо́лнится в нас, не по пло́ти ходя́щих, но по ду́ху. Су́щии бо по пло́ти, плотска́я му́дрствуют. А и́же по ду́ху, духо́вная. Мудрова́ние бо плотско́е смерть есть, а мудрова́ние духо́вное живо́т и мир, зане́ мудрова́ние плотско́е вражда́ на Бо́га, зако́ну бо Бо́жию не покаря́ется, ниже́ бо мо́жет. Су́щии же во пло́ти, Бо́гу угоди́ти не мо́гут. Вы же не́сте во пло́ти, но в ду́се, поне́же Дух Бо́жий живе́т в вас.
Послание к римляном, зачало 96: от полу́ 2-е.
Рим 8:8–14
Ианнуариа 4
Бра́тие, су́щии во пло́ти Бо́гу угоди́ти не мо́гут. Вы же не́сте во пло́ти, но в ду́се поне́же Дух Бо́жий живе́т в вас. А́ще же кто Ду́ха Христо́ва не и́мать, сей несть Его́в. А́ще ли Христо́с в вас, плоть у́бо мертва́ греха́ ра́ди, дух же живе́т пра́вды ра́ди. А́ще ли же Дух Воскреси́вшаго Иису́са от ме́ртвых живе́т в вас, Воздви́гий Христа́ из ме́ртвых оживотвори́т и ме́ртвенная телеса́ ва́ша, живу́щим Ду́хом Его́ в вас. Те́мже у́бо, бра́тие, до́лжни есмы́ не пло́ти, е́же по пло́ти жи́ти. А́ще бо по пло́ти живете́, и́мате умре́ти, а́ще ли ду́хом дея́ния плотска́я умерщвля́ете, жи́ви бу́дете. Ели́цы бо Ду́хом Бо́жиим во́дятся, си́и суть сы́нове Бо́жии.
Послание к римляном, зачало 97.
Рим 8:14–21
Суббота 5-я недели.
Бра́тие, ели́цы Ду́хом Бо́жиим во́дятся, си́и суть сы́нове Бо́жии. Не прия́сте бо ду́ха рабо́ты па́ки в боя́знь, но прия́сте Ду́ха сыноположе́ния, о Не́мже вопие́м: А́вва О́тче. Са́мый Дух спослушеству́ет ду́хови на́шему, я́ко есмы́ ча́да Бо́жия. А́ще же ча́да, и насле́дницы: насле́дницы у́бо Бо́гу, снасле́дницы же Христу́, поне́же с Ним стра́ждем, да и с Ним просла́вимся. Непщу́ю бо, я́ко недосто́йны стра́сти ны́нешняго вре́мене к хотя́щей сла́ве яви́тися в нас. Ча́яние бо тва́ри, открове́ния сыно́в Бо́жиих ча́ет. Суете́ бо тварь повину́ся не во́лею, но за повину́вшаго ю́, на упова́нии, я́ко и сама́ тварь свободи́тся от рабо́ты истле́ния в свобо́ду сла́вы чад Бо́жиих.
Послание к римляном, зачало 98.
Рим 8:22–27
В четверток 3-я недели.
Бра́тие, ве́мы, я́ко вся тварь с на́ми совоздыха́ет и сболе́знует да́же доны́не, не то́чию же, но и са́ми нача́ток Ду́ха иму́ще, и мы са́ми в себе́ воздыха́ем, всыновле́ния ча́юще, избавле́ния те́лу на́шему. Упова́нием бо спасо́хомся. Упова́ние же ви́димое, несть упова́ние, е́же бо ви́дит кто, что и упова́ет? А́ще ли, его́же не ви́дим, наде́емся, терпе́нием ждем. Си́це же и Дух спосо́бствует нам в не́мощех на́ших, о чесо́м бо помо́лимся, я́коже подоба́ет, не ве́мы, но Сам Дух хода́тайствует о нас воздыха́нии неизглаго́ланными. Испыта́яй же сердца́ весть, что есть мудрова́ние Ду́ха, я́ко по Бо́гу припове́дует о святы́х.
Послание к римляном, зачало 99.
Рим 8:28–39
Святым великомучеником.
Бра́тие, ве́мы я́ко лю́бящым Бо́га вся поспешеству́ют во благо́е, су́щым по предуве́дению зва́нным. И́хже бо предуве́де, тех и предуста́ви сообра́зным бы́ти о́бразу Сы́на Своего́, я́ко бы́ти Ему́ перворо́дну во мно́гих бра́тиях. А и́хже предуста́ви, тех и призва́, а и́хже призва́, сих и оправда́, а и́хже оправда́, сих и просла́ви. Что у́бо рече́м к сим, а́ще Бог по нас, кто на ны? И́же у́бо Своего́ Сы́на не пощаде́, но за ны вся пре́дал есть Его́, ка́ко у́бо не и с Ним вся нам да́рствует? Кто пое́млет на избра́нныя Бо́жия? Бог оправда́яй. Кто осужда́яй? Христо́с Иису́с уме́рый, па́че же и воскресы́й, И́же и есть одесну́ю Бо́га, И́же и хода́тайствует о нас. Кто ны разлучи́т от любве́ Бо́жия? Скорбь ли, или́ теснота́, или́ гоне́ние, или́ глад, или́ нагота́, или́ беда́, или́ мечь? Я́коже есть пи́сано: я́ко Тебе́ ра́ди умерщвля́еми есмы́ весь день, вмени́хомся я́коже о́вцы заколе́ния. Но о сих всех препобежда́ем за Возлю́бльшаго ны. Извести́хся бо, я́ко ни смерть, ни живо́т, ни А́нгели, ни Нача́ла, ниже́ Си́лы, ни настоя́щая, ни гряду́щая, ни высота́, ни глубина́, ни и́на тварь ка́я возмо́жет нас разлучи́ти от любве́ Бо́жия, я́же о Христе́ Иису́се Го́споде на́шем.
Послание к римляном, зачало 100.
Рим 9:1–5
Суббота 6-я недели.
Бра́тие, и́стину глаго́лю о Христе́, не лгу, послушеству́ющи ми со́вести мое́й Ду́хом Святы́м, я́ко скорбь ми есть ве́лия и непрестаю́щая боле́знь се́рдцу моему́. Моли́л бых ся бо сам аз отлуче́н бы́ти от Христа́ по бра́тии мое́й, сро́дницех мои́х по пло́ти, и́же суть изра́ильте, и́хже всыновле́ние и сла́ва, и заве́ти и законоположе́ние, и служе́ние и обетова́ния, и́хже отцы́, и от ни́хже Христо́с по пло́ти, сый над все́ми Бог благослове́н во ве́ки, ами́нь.
Послание к римляном, зачало 101.
Рим 9:6–19
Пяток 3-я недели.
Бра́тие, не та́коже я́ко отпаде́ сло́во Бо́жие, не вси бо су́щии от Изра́иля, си́и Изра́иль, ни зане́ суть се́мя Авраа́мле, вси ча́да, но во Исаа́це, рече́, нарече́тся ти се́мя. Си́речь, не ча́да плотска́я, сия́ ча́да Бо́жия, но ча́да обетова́ния причита́ются в се́мя. Обетова́ния бо сло́во сие́: на сие́ вре́мя прииду́, и бу́дет Са́рре сын. Не то́чию же, но и Реве́кка от еди́наго ло́жа Исаа́ка отца́ на́шего иму́щи. Не у́бо не ро́ждшымся, ни сотво́ршым чесо́ бла́го или́ зло, да по избра́нию предложе́ние Бо́жие пребу́дет, не от дел, но от Призыва́ющаго, рече́ся ей, я́ко бо́лий порабо́тает ме́ньшему, я́коже есть пи́сано: Иа́кова возлюби́х, Иса́ва же возненави́дех. Что у́бо рече́м? Еда́ непра́вда у Бо́га? Да не бу́дет. Моисе́ови бо глаго́лет: поми́лую, его́же а́ще поми́лую, и уще́дрю, его́же а́ще уще́дрю. Те́мже у́бо ни хотя́щаго, ни теку́щаго, но ми́лующаго Бо́га. Глаго́лет бо Писа́ние фарао́нови: я́ко на и́стое сие́ воздвиго́х тя, я́ко да покажу́ тобо́ю си́лу Мою́ и я́ко да возвести́тся и́мя Мое́ по всей земли́. Те́мже у́бо, его́же хо́щет, ми́лует, а его́же хо́щет, ожесточа́ет. Рече́ши же ми у́бо: чесо́ ра́ди у́бо укоря́ет, во́ли бо Его́ кто проти́витися мо́жет?
Послание к римляном, зачало 102.
Рим 9:18–33
Понедельник 4-я недели.
Бра́тие, Бог его́же хо́щет, ми́лует, а его́же хо́щет, ожесточа́ет. Рече́ши же ми у́бо: чесо́ ра́ди у́бо укоря́ет, во́ли бо Его́ кто проти́витися мо́жет? Те́мже у́бо, о челове́че, ты кто еси́, проти́в отвеща́яй Бо́гови? Еда́ рече́т зда́ние созда́вшему е́: почто́ мя сотвори́л еси́ та́ко? Или́ не и́мать вла́сти скуде́льник на бре́нии, от того́же смеше́ния сотвори́ти ов у́бо сосу́д в честь, ов же не в честь? А́ще ли же хотя́ Бог показа́ти гнев Свой и яви́ти си́лу Свою́, пренесе́ во мно́зе долготерпе́нии сосу́ды гне́ва соверше́ны в поги́бель, и да ска́жет бога́тство сла́вы Своея́ на сосу́дех ми́лости, я́же предугото́ва в сла́ву, и́хже и призва́ нас не то́чию от иуде́й, но и от язы́к. Я́коже и во Оси́и глаго́лет: нареку́ не лю́ди Моя́ лю́ди Моя́, и невозлю́бленую возлю́блену. И бу́дет на ме́сте, иде́же рече́ся им: не лю́дие Мои́ есте́ вы, та́мо нареку́тся сы́нове Бо́га жива́го. Иса́иа же вопие́т о Изра́или: а́ще бу́дет число́ сыно́в Изра́илевых я́ко песо́к морски́й, оста́нок спасе́тся. Сло́во бо скончава́я и сокраща́я в пра́вде, я́ко сло́во сокраще́но сотвори́т Госпо́дь на земли́. И я́коже прорече́ Иса́иа: а́ще не бы Госпо́дь Савао́ф оста́вил нам се́мене, я́коже Содо́м у́бо бы́ли бы́хом, и я́коже Гомо́рру уподо́билися бы́хом. Что у́бо рече́м, я́ко язы́цы, не гоня́щии пра́вду, постиго́ша пра́вду, пра́вду же, я́же от ве́ры. Изра́иль же, гоня́ зако́н пра́вды, в зако́н пра́вды не пости́же. Чесо́ ра́ди? Зане́ не от ве́ры, но от дел зако́на, преткну́шася бо о ка́мень претыка́ния. Я́коже есть пи́сано: се полага́ю в Сио́не ка́мень претыка́ния и ка́мень собла́зна, и всяк ве́руяй вонь не постыди́тся.
Послание к римляном, зачало 103.
Рим 10:1–10
Неделя 5-я.
Бра́тие, благоволе́ние моего́ се́рдца и моли́тва, я́же к Бо́гу по Изра́или, есть во спасе́ние. Свиде́тельствую бо им, я́ко ре́вность Бо́жию и́мут, но не по ра́зуму. Не разуме́юще бо Бо́жия пра́вды и свою́ пра́вду и́щуще поста́вити, пра́вде Бо́жией не повину́шася. Кончи́на бо зако́на Христо́с, в пра́вду вся́кому ве́рующему. Моисе́й бо пи́шет пра́вду ю́же от зако́на, я́ко сотвори́вый та челове́к жив бу́дет в них. А я́же от ве́ры пра́вда си́це глаго́лет: да не рече́ши в се́рдцы твое́м, кто взы́дет на не́бо, си́речь Христа́ свести́. Или́ кто сни́дет в бе́здну, си́речь Христа́ от ме́ртвых возвести́. Но что глаго́лет Писа́ние? Близ ти глаго́л есть, во усте́х твои́х и в се́рдце твое́м, си́речь глаго́л ве́ры, его́же пропове́даем. Я́ко а́ще испове́си усты́ твои́ми Го́спода Иису́са, и ве́руеши в се́рдце твое́м, я́ко Бог Того́ воздви́же из ме́ртвых, спасе́шися. Се́рдцем бо ве́руется в пра́вду, усты́ же испове́дуется во спасе́ние.
Послание к римляном, зачало 104.
Рим 10:11–11:2А
Во вторник 4-я недели.
Бра́тие, глаго́лет Писа́ние: всяк ве́руяй вонь не постыди́тся. Несть бо ра́знствия иуде́еви же и е́ллину: Той бо Бог всех, богатя́й во всех призыва́ющих Его́. Всяк бо, и́же а́ще призове́т и́мя Госпо́дне, спасе́тся. Ка́ко у́бо призову́т, в Него́же не ве́роваша? Ка́ко же уве́руют, Его́же не услы́шаша? Ка́ко же услы́шат без пропове́дающаго? Ка́ко же пропове́дят, а́ще не по́слани бу́дут? Я́коже есть пи́сано: коль красны́ но́ги благовеству́ющих мир, благовеству́ющих блага́я. Но не вси послу́шаша благовествова́ния. Иса́иа бо глаго́лет: Го́споди, кто ве́рова слу́ху на́шему? Те́мже у́бо ве́ра от слу́ха, слух же глаго́лом Бо́жиим. Но глаго́лю: еда́ не слы́шаша, те́мже у́бо, во всю зе́млю изы́де веща́ние их, и в концы́ вселе́нныя глаго́лы их. Но глаго́лю: еда́ не разуме́ Изра́иль? Пе́рвый Моисе́й глаго́лет: Аз раздражу́ вы не о язы́це, но о язы́це неразу́мне прогне́ваю вас. Иса́иа же дерза́ет и глаго́лет: обрето́хся не и́щущым Мене́, явле́н бых не вопроша́ющым о Мне. Ко Изра́илю же глаго́лет: весь день возде́х ру́це Мои́ к лю́дем непокори́вым и пререка́ющым. Глаго́лю у́бо: еда́ отри́ну Бог лю́ди Своя́? Да не бу́дет. И́бо и аз Изра́ильтянин есмь, от се́мене Авраа́мля, коле́на Вениами́нова. Не отри́ну Бог люде́й Свои́х, и́хже пре́жде разуме́.
Послание к римляном, зачало 105.
Рим 11:2Б–12
В среду 4-я недели.
Бра́тие, не ве́сте ли о Илии́, что глаго́лет Писа́ние, я́ко припове́дует Бо́гови на Изра́иля, глаго́ля: Го́споди, проро́ки Твоя́ изби́ша и олтари́ Твоя́ раскопа́ша, и аз оста́х еди́н, и и́щут ду́шу мою́ изъя́ти. Но что глаго́лет ему́ Боже́ственный отве́т? Оста́вих Себе́ седмь ты́сящ муже́й, и́же не преклони́ша коле́на пред Ваа́лом. Та́ко у́бо и в ны́нешнее вре́мя оста́нок по избра́нию благода́ти бысть. А́ще ли по благода́ти, то не от дел, зане́ благода́ть уже́ не быва́ет благода́ть. А́ще ли от дел, ктому́ несть благода́ть, зане́ бо де́ло уже́ несть де́ло. Что у́бо? Его́же иска́ше Изра́иль, сего́ не получи́, а избра́ние получи́. Про́чии же ослепи́шася, я́коже есть пи́сано: даде́ им Бог дух умиле́ния, о́чи не ви́дети и у́ши не слы́шати, да́же до дне́шняго дне. И Дави́д глаго́лет: да бу́дет трапе́за их в сеть и в лов, и в собла́зн и в воздая́ние им. Да помрача́тся о́чи их е́же не ви́дети, и хребе́т их вы́ну сляца́й. Глаго́лю у́бо: еда́ согреши́ша, да отпаду́т? Да не бу́дет. Но тех паде́нием спасе́ние язы́ком, во е́же раздражи́ти их. А́ще ли же прегреше́ние их бога́тство ми́ру, и отпаде́ние их бога́тство язы́ком, кольми́ па́че исполне́ние их?
Послание к римляном, зачало 106.
Рим 11:13–24
В четверток 4-я недели.
Бра́тие, вам глаго́лю язы́ком, поне́же у́бо есмь аз язы́ком Апо́стол, слу́жбу мою́ прославля́ю. А́ще ка́ко раздражу́ мою́ плоть, и спасу́ не́кия от них? А́ще бо отложе́ние их, примире́ние ми́ру, что прия́тие, ра́зве жизнь из ме́ртвых? А́ще ли нача́ток свят, то и примеше́ние, и а́ще ко́рень свят, то и ве́тви. А́ще ли не́цыи от ве́твей отломи́шася, ты же, ди́вия ма́слина сый, прицепи́лся еси́ в них, и прича́стник ко́рене и ма́сти ма́слинныя был еси́. Не хвали́ся на ве́тви, а́ще ли же хва́лишися, не ты ко́рень но́сиши, но ко́рень тебе́. Рече́ши у́бо: отломи́шася ве́тви, да аз прицеплю́ся. До́бре, неве́рием отломи́шася, ты же ве́рою стои́ши. Не высокому́дрствуй, но бо́йся. А́ще бо Бог есте́ственных ве́твей не пощаде́, да не ка́ко и тебе́ не пощади́т. Виждь у́бо бла́гость и непощаде́ние Бо́жие: на отпа́дших у́бо непощаде́ние, а на тебе́ бла́гость Бо́жия, а́ще пребу́деши в бла́гости, а́ще ли же ни, то и ты отсе́чен бу́деши. И они́ же, а́ще не пребу́дут в неве́рствии, прицепя́тся, си́лен бо есть Бог па́ки прицепи́ти их. А́ще бо ты от есте́ственныя отсе́чен ди́вия ма́слины, и чрез естество́ прицепи́лся еси́ к до́брей ма́слине, кольми́ па́че си́и, и́же по естеству́, прицепя́тся свое́й ма́слине?
Послание к римляном, зачало 107.
Рим 11:25–36
В пяток 4-я недели.
Бра́тие, не хощу́ вас не ве́дети та́йны сея́, да не бу́дете о себе́ му́дри, я́ко ослепле́ние от ча́сти Изра́илеви бысть, до́ндеже исполне́ние язы́ков вни́дет, и та́ко весь Изра́иль спасе́тся, я́коже есть пи́сано: прии́дет от Сио́на Избавля́яй, и отврати́т нече́стие от Иа́кова. И сей им от Мене́ заве́т, егда́ отиму́ грехи́ их. По благовествова́нию у́бо, врази́ вас ра́ди, по избра́нию же, возлю́блени оте́ц ра́ди. Нераска́янна бо дарова́ния и зва́ние Бо́жие. Я́коже бо и вы иногда́ проти́вистеся Бо́гови, ны́не же поми́ловани бы́сте сих противле́нием. Та́кожде и си́и ны́не проти́вишася ва́шей ми́лости, да и ти́и поми́ловани бу́дут. Затвори́ бо Бог всех в противле́ние, да всех поми́лует. О, глубина́ бога́тства и прему́дрости и ра́зума Бо́жия! Я́ко неиспы́тани су́дове Его́, и неизсле́довани путие́ Его́. Кто бо разуме́ ум Госпо́день, или́ кто сове́тник Ему́ бысть? Или́ кто пре́жде даде́ Ему́, и возда́стся Ему́, я́ко из Того́ и Тем и в Нем вся́ческая. Тому́ сла́ва во ве́ки. Ами́нь.
Послание к римляном, зачало 108.
Рим 12:1–3
В субботу 7-ю.
Бра́тие, молю́ вас щедро́тами Бо́жиими, предста́вите телеса́ ва́ша же́ртву жи́ву, свя́ту, благоуго́дну Бо́гови, слове́сное служе́ние ва́ше, и не сообразу́йтеся ве́ку сему́, но преобразу́йтеся обновле́нием ума́ ва́шего, во е́же искуша́ти вам, что есть во́ля Бо́жия, блага́я и уго́дная, и соверше́нная. Глаго́лю бо благода́тию да́вшеюся мне, вся́кому су́щему в вас не му́дрствовати па́че, е́же подоба́ет му́дрствовати, но му́дрствовати в целому́дрии, коему́ждо я́коже Бог раздели́л есть ме́ру ве́ры.
Послание к римляном, зачало 109.
Рим 12:4–5; 15–21
В понедельник 5-я недели.
Бра́тие, я́коже во еди́ном телеси́ мно́ги у́ды и́мамы, у́ды же вси не то́жде и́мут де́лание, та́кожде мно́зи еди́но те́ло есмы́ о Христе́, а по еди́ному друг дру́гу у́ди.
Ра́доватися с ра́дующимися, и пла́кати с пла́чущими. То́жде друг ко дру́гу му́дрствующе. Не высо́кая му́дрствующе, но смире́нными веду́щеся, не быва́йте му́дри о себе́. Ни еди́ному же зла за зло воздаю́ще, промышля́юще до́брая пред все́ми челове́ки. А́ще возмо́жно, е́же от вас, со все́ми челове́ки мир име́йте. Не себе́ отмща́юще, возлю́блении, но дади́те ме́сто гне́ву. Пи́сано бо есть: Мне отмще́ние, Аз возда́м, глаго́лет Госпо́дь. А́ще у́бо а́лчет враг твой, ухле́би его́, а́ще ли жа́ждет, напо́й его́. Сие́ бо творя́, у́глие о́гнено собира́еши на главу́ его́. Не побежде́н быва́й от зла, но побежда́й благи́м зло́е.
Послание к римляном, зачало 110.
Рим 12:6–14
Неделя 6-я.
Бра́тие, иму́ще дарова́ния по благода́ти да́нней нам разли́чна, а́ще проро́чество, по ме́ре ве́ры, а́ще ли служе́ние, в служе́нии, а́ще учя́й, во уче́нии, а́ще утеша́яй, во утеше́нии, подава́яй, в простоте́, предстоя́й, со тща́нием, ми́луяй, с до́брым изволе́нием. Любы́ нелицеме́рна, ненави́дящи зло́е, прилепля́ющися благо́му. Братолю́бием друг ко дру́гу любе́зни, че́стию друг дру́га бо́льша творя́ще. Тща́нием не лени́ви, ду́хом горя́ще, Го́сподеви рабо́тающе. Упова́нием ра́дующеся, ско́рби терпя́ще, в моли́тве пребыва́юще. Тре́бованием святы́х приобща́ющеся, страннолю́бия держа́щеся. Благословля́йте гоня́щыя вы, благослови́те, а не клени́те.
Послание к римляном, зачало 111.
Рим 13:1–10
В субботу 8-ю.
Бра́тие, вся́ка душа́ власте́м предержа́щым да повину́ется, несть бо власть а́ще не от Бо́га, су́щыя же вла́сти от Бо́га учинены́ суть. Те́мже противля́яйся вла́сти, Бо́жию повеле́нию противля́ется, противля́ющиися же себе́ грех прие́млют. Кня́зи бо не суть боя́знь до́брым дело́м, но злым. Хо́щеши же ли не боя́тися вла́сти? Благо́е твори́, и име́ти бу́деши похвалу́ от него́. Бо́жий бо слуга́ есть, тебе́ во благо́е. А́ще ли зло́е твори́ши, бо́йся, не бо без ума́ мечь но́сит, Бо́жий бо слуга́ есть, отмсти́тель в гнев зло́е творя́щему. Те́мже потре́ба повинова́тися не то́кмо за гнев, но и за со́весть. Сего́ бо ра́ди и да́ни даете́, служи́тели бо Бо́жии суть, во и́стое сие́ пребыва́юще. Воздади́те у́бо всем до́лжная: ему́же у́бо уро́к, уро́к, а ему́же дань, дань, а ему́же страх, страх, и ему́же честь, честь. Ни еди́ному же ничи́мже до́лжни быва́йте, то́чию е́же люби́ти друг дру́га: любя́й бо дру́га, зако́н испо́лни. Е́же бо, не прелюбы́ сотвори́ши, не убие́ши, не укра́деши, не лжесвиде́тельствуеши, не похо́щеши, и а́ще ка́я и́на за́поведь, в сем словеси́ соверша́ется, во е́же возлю́биши и́скренняго твоего́, я́коже сам себе́. Любы́ и́скреннему зла не твори́т. Исполне́ние у́бо зако́на любы́ есть.
Послание к римляном, зачало 112.
Рим 13:11Б–14:4
Неделя сыропустная.
Сие же и Рождеству Иоанна Предтечи.
Бра́тие, ны́не ближа́йшее нам спасе́ние, не́жели егда́ ве́ровахом. Нощь у́бо пре́йде, а день прибли́жися: отложи́м у́бо дела́ те́мная, и облече́мся во ору́жие све́та. Я́ко во дни, благообра́зно да хо́дим, не козлогласова́нии и пия́нствы, не любодея́нии и студодея́нии, не рве́нием и за́вистию, но облецы́теся Го́сподем на́шим Иису́с Христо́м, и пло́ти уго́дия не твори́те в по́хоти. Изнемога́ющаго же в ве́ре прие́млите, не в сомне́ние помышле́ний. Ов бо ве́рует я́сти вся, а изнемога́яй зе́лия да яст. Яды́й не яду́щаго да не укоря́ет, и не яды́й яду́щаго да не осужда́ет, Бог бо его́ прия́т. Ты кто еси́ судя́й чужде́му рабу́? Своему́ Го́сподеви стои́т, или́ па́дает, ста́нет же, си́лен бо есть Бог поста́вити его́.
Послание к римляном, зачало 113.
Рим 14:6–9
Суббота 9-я.
Сие же и за упокой в понедельник.
Бра́тие, му́дрствуяй день, Го́сподеви му́дрствует, и не му́дрствуяй день, Го́сподеви не му́дрствует. Яды́й, Го́сподеви яст, благодари́т бо Бо́га, и не яды́й, Го́сподеви не яст, и благодари́т Бо́га. Никто́же бо нас себе́ живе́т, и никто́же себе́ умира́ет. А́ще у́бо живе́м, Го́сподеви живе́м, а́ще же умира́ем, Го́сподеви умира́ем, а́ще у́бо живе́м, а́ще умира́ем, Госпо́дни есмы́. На сие́ бо Христо́с и у́мре и воскре́се и оживе́, да и ме́ртвыми и живы́ми облада́ет.
Послание к римляном, зачало 114.
Рим 14:9–18
Во вторник 5-я недели.
Бра́тие, на сие́ Христо́с и у́мре, и воскре́се и оживе́, да и ме́ртвыми и живы́ми облада́ет. Ты же почто́ осужда́еши бра́та твоего́, или́ ты что уничижа́еши бра́та твоего́? Вси бо предста́нем суди́щу Христо́ву. Пи́сано бо есть: живу́ Аз, глаго́лет Госпо́дь, я́ко Мне поклони́тся вся́ко коле́но, и всяк язы́к испове́стся Бо́гови. Те́мже у́бо ки́йждо нас о себе́ сло́во даст Бо́гу. Не ктому́ у́бо друг дру́га осужда́ем, но сие́ па́че суди́те, е́же не полага́ти претыка́ния бра́ту или́ собла́зна. Вем и извеще́н есмь о Христе́ Иису́се я́ко ничто́же скве́рно са́мо собо́ю, то́чию помышля́ющему что скве́рно бы́ти, о́ному скве́рно есть. А́ще у́бо бра́шна ра́ди брат твой скорби́т, уже́ не по любви́ хо́диши, не бра́шном твои́м того́ погубля́й, за него́же Христо́с у́мре. Да не ху́лится у́бо ва́ше благо́е. Несть бо Ца́рство Бо́жие бра́шно и питие́, но пра́вда, и мир, и ра́дость о Ду́се Свя́те. И́же бо си́ми слу́жит Христо́ви, благоуго́ден есть Бо́гови и иску́сен челове́ком.
Послание к римляном, зачало 115.
Рим 14:19–23; 16:25-27
В субботу сыропустную.
Бра́тие, мир возлю́бим и я́же к созда́нию друг ко дру́гу. Не бра́шна ра́ди разоря́й де́ло Бо́жие. Вся бо чи́ста, но зло челове́ку претыка́нием яду́щему. Добро́ не я́сти мяс, ниже́ пи́ти вина́, ни о не́мже брат твой претыка́ется или́ соблазня́ется, или́ изнемога́ет. Ты ве́ру и́маши? О себе́ сам име́й пред Бо́гом. Блаже́н не осужда́яй себе́, о не́мже искуша́ется. А сомня́яйся, а́ще яст, осужда́ется, зане́ не от ве́ры, вся́ко же, е́же не от ве́ры, грех есть.
Могу́щему же вас утверди́ти по благовествова́нию моему́ и пропове́данию Иису́с Христо́ву, по открове́нию та́йны, ле́ты ве́чными умолча́нныя. Я́вльшияся же ны́не, писа́нии проро́ческими, по повеле́нию ве́чнаго Бо́га, в послуша́ние ве́ры во всех язы́цех позна́вшияся, Еди́ному Прему́дрому Бо́гу, Иису́сом Христо́м, Ему́же сла́ва во ве́ки. Ами́нь.
Послание к римляном, зачало 116.
Рим 15:1–7
Неделя 7-я.
Бра́тие, до́лжни есмы́ мы си́льнии не́мощи немощны́х носи́ти и не себе́ угожда́ти. Ки́йждо же вас бли́жнему да угожда́ет во благо́е к созда́нию. И́бо и Христо́с не Себе́ угоди́, но я́коже есть пи́сано: поноше́ния понося́щих Тебе́ нападо́ша на мя. Ели́ка бо преднапи́сана бы́ша, в на́ше наказа́ние преднаписа́шася, да терпе́нием и утеше́нием Писа́ний упова́ние и́мамы. Бог же терпе́ния и утеше́ния, да даст вам то́жде му́дрствовати друг ко дру́гу о Христе́ Иису́се; да единоду́шно еди́ными усты́ сла́вите Бо́га и Отца́ Го́спода на́шего Иису́са Христа́. Те́мже прие́млите друг дру́га, я́коже и Христо́с прия́т вас во сла́ву Бо́жию.
Послание к римляном, зачало 117.
Рим 15:7–16
В среду 5-я недели.
Бра́тие, прие́млите друг дру́га, я́коже и Христо́с прия́т вас во сла́ву Бо́жию. Глаго́лю же Христа́ Иису́са служи́теля бы́вша обре́зания по и́стине Бо́жией, во е́же утверди́ти обетова́ния отце́в. А язы́ком по ми́лости, просла́вити Бо́га, я́коже есть пи́сано: сего́ ра́ди испове́мся Тебе́ во язы́цех, Го́споди, и и́мени Твоему́ пою́. И па́ки глаго́лет: возвесели́теся, язы́цы, с людьми́ Его́. И па́ки: хвали́те Го́спода, вси язы́цы, и похвали́те Его́, вси лю́дие. И па́ки Иса́иа глаго́лет: бу́дет ко́рень Иессе́ов, и востая́й владе́ти над язы́ки, на Того́ язы́цы упова́ют. Бог же упова́ния да испо́лнит вас вся́кия ра́дости и ми́ра в ве́ре, избы́точествовати вам во упова́нии, си́лою Ду́ха Свята́го. Извеще́н же есмь, бра́тие моя́, и сам аз о вас, я́ко и са́ми вы по́лни есте́ бла́гости, испо́лнени вся́каго ра́зума, могу́ще и ины́я научи́ти. Де́рзее же писа́х вам, бра́тие моя́, от ча́сти, я́ко воспомина́я вам, за благода́ть да́нную ми от Бо́га, во е́же бы́ти ми служи́телю Иису́с Христо́ву во язы́цех, священноде́йствующу благовествова́ние Бо́жие, да бу́дет приноше́ние е́же от язы́к благоприя́тно и освяще́нно Ду́хом Святы́м.
Послание к римляном, зачало 118.
Рим 15:17–29
В четверток 5-я недели.
Бра́тие, и́мам похвалу́ о Христе́ Иису́се, я́же к Бо́гу. Не сме́ю бо глаго́лати что, и́хже не соде́я Христо́с мно́ю, в послуша́ние язы́ков, сло́вом и де́лом, в си́ле зна́мений и чуде́с, си́лою Ду́ха Бо́жия, я́коже ми от Иерусали́ма и о́крест да́же до Иллири́ка испо́лнити благовествова́ние Христо́во. Си́це же потща́хся благовести́ти, не иде́же именова́ся Христо́с, да не на чуже́м основа́нии сози́жду, но я́коже есть пи́сано: и́мже не возвести́ся о Нем, у́зрят, и и́же не слы́шаша, уразуме́ют. Те́мже и возбране́н бых мно́гажды приити́ к вам. Ны́не же ктому́ ме́ста не имы́й в страна́х сих, жела́ние же имы́й приити́ к вам от мно́гих лет, я́ко а́ще поиду́ во Испа́нию, прииду́ к вам. Упова́ю бо ми́мо гряды́й ви́дети вас и ва́ми проводи́тися та́мо, а́ще вас пре́жде от ча́сти насы́щуся. Ны́не же гряду́ во Иерусали́м, служя́й святы́м, благоволи́ша бо Македо́ниа и Аха́иа обще́ние не́кое сотвори́ти к ни́щым святы́м живу́щым во Иерусали́ме. Благоволи́ша бо, и до́лжни им суть. А́ще бо в духо́вных их прича́стники бы́ша язы́цы, до́лжни суть и в плотски́х послужи́ти им. Сие́ у́бо сконча́в, и запечатле́в им плод сей, поиду́ ва́ми во Испа́нию. Вем же, я́ко гряды́й к вам, во исполне́нии благослове́ния благове́стия Христо́ва прииду́.
Послание к римляном, зачало 119.
Рим 15:30–33
В субботу 10.
Бра́тие, молю́ вы Го́сподем на́шим Иису́с Христо́м и любо́вию Ду́ха, споспе́шствуйте ми в моли́твах о мне к Бо́гу, да изба́влюся от противля́ющихся во Иуде́и, и да слу́жба моя́, я́же во Иерусали́ме, благоприя́тна бу́дет святы́м. Да с ра́достию прииду́ к вам во́лею Бо́жиею и упоко́юся с ва́ми. Бог же ми́ра со все́ми ва́ми. Ами́нь.
Послание к римляном, зачало 120.
Рим 16:1–16
В пяток 5-я недели.
Бра́тие, вруча́ю вам Фи́ву, сестру́ на́шу, су́щу служи́тельницу це́ркве, я́же в Кегхре́ех, да прии́мете ю́ о Го́споде досто́йне святы́м, и споспе́шствуйте ей, о не́йже а́ще от вас потре́бует ве́щи, и́бо сия́ засту́пница мно́гим бысть, и самому́ мне. Целу́йте Приски́ллу и Аки́лу, споспе́шника моя́ о Христе́ Иису́се и́же по души́ мое́й своя́ вы́я положи́ша, и́хже не аз еди́н благодарю́, но и вся це́ркви язы́ческия, и дома́шнюю их це́рковь. Целу́йте Епене́та возлю́бленнаго ми, и́же есть нача́ток Аха́ии во Христа́. Целу́йте Мариа́мь, я́же мно́го труди́ся о нас. Целу́йте Андрони́ка и Иуни́ю, сро́дники моя́ и спле́нники моя́, и́же суть наро́читы во Апо́столех, и́же и пре́жде мене́ ве́роваша во Христа́. Целу́йте Ампли́а возлю́бленнаго ми о Го́споде. Целу́йте Урва́на споспе́шника на́шего о Христе́, и Стахи́а возлю́бленнаго ми. Целу́йте Апе́ллиа иску́сна о Христе́. Целу́йте су́щыя от Аристову́ла. Целу́йте Иродио́на сро́дника моего́. Целу́йте и́же от Нарки́сса су́щыя о Го́споде. Целу́йте Трифе́ну и Трифо́су тружда́ющыяся о Го́споде. Целу́йте Перси́ду возлю́бленную, я́же мно́го труди́ся о Го́споде. Целу́йте Ру́фа избра́ннаго о Го́споде, и ма́терь его́ и мою́. Целу́йте Асигкри́та, Фле́гонта, Е́рма, Патро́ва, Ерми́а, и су́щую с ни́ми бра́тию. Целу́йте Филоло́га и Иули́ю, Нире́а и сестру́ его́, и Олимпа́на, и су́щыя с ни́ми вся святы́я. Целу́йте друг дру́га лобза́нием святы́м. Целу́ют вы вся це́ркви Христо́вы.
Послание к римляном, зачало 121.
Рим 16:17–24
В понедельник 6-я недели.
Бра́тие, молю́ вы блюди́теся от творя́щих ра́спри и раздо́ры, кроме́ уче́ния, ему́же вы научи́стеся, и уклони́теся от них. Такови́и бо Го́сподеви на́шему Иису́су Христу́ не рабо́тают, но своему́ чре́ву: и́же благи́ми словесы́ и благослове́нием прельща́ют сердца́ незло́бивых. Ва́ше бо послуша́ние ко всем дости́же. Ра́дуюся же е́же о вас. Хощу́ же вас му́дрым у́бо бы́ти во благо́е, просты́м же в зло́е. Бог же ми́ра да сокруши́т сатану́ под но́ги ва́ша вско́ре. Благода́ть Го́спода на́шего Иису́са Христа́ с ва́ми. Ами́нь. Целу́ет вас Тимофе́й споспе́шник мой, и Луки́й и Иа́сон и Сосипа́тр, сро́дницы мои́. Целу́ю вы и аз, Те́ртий, написа́вый посла́ние сие́, о Го́споде. Целу́ет вы Га́ие странноприи́мец мой и це́ркве всея́. Целу́ет вы Ера́ст строи́тель гра́дский, и Куа́рт брат. Благода́ть Го́спода на́шего Иису́са Христа́ со все́ми ва́ми. Ами́нь.