Апостол
К Филипписием Послание Святаго Апостола Павла.
Зачало: 235 236 237 238 239 240 241 242 243 244 245 246 247 248
Послание к филипписием, зачало 235.
Флп 1:1–7
В понедельник 19-я недели.
Па́вел и Тимофе́й, раби́ Иису́с Христо́вы, всем святы́м о Христе́ Иису́се су́щым в Фили́ппех, с епи́скопы и диа́коны, благода́ть вам и мир от Бо́га Отца́ на́шего и Го́спода Иису́са Христа́. Благодарю́ Бо́га моего́ о всей па́мяти ва́шей, всегда́ во вся́кой моли́тве мое́й за всех вас с ра́достию моли́тву мою́ творя́, о обще́нии ва́шем в благовествова́ние от пе́рваго дне да́же и доны́не, наде́явся на сие́ и́стое, я́ко начны́й де́ло бла́го в вас соверши́т е́ да́же до дне Иису́с Христо́ва. Я́коже есть пра́ведно мне сие́ му́дрствовати о всех вас, за е́же име́ти ми в се́рдце вас, во у́зах мои́х и во отве́те и извеще́нии благове́стия, соо́бщников ми благода́ти всех вас су́щих.
Послание к филипписием, зачало 236.
Флп 1:8–14
Вторник 19-я недели.
Бра́тие, свиде́тель ми есть Бог, я́ко люблю́ всех вас по ми́лости Иису́с Христо́ве. И о сем молю́ся, да любо́вь ва́ша еще́ па́че и па́че избы́точествует в ра́зуме и во вся́ком чу́вствии, во е́же искуша́ти вам лу́чшая, да бу́дете чи́сти и непреткнове́нни в день Христо́в, испо́лнени плодо́в пра́вды Иису́с Христо́м, в сла́ву и похвалу́ Бо́жию. Разуме́ти же хощу́ вам, бра́тие, я́ко я́же о мне па́че во успе́х благовествова́ния приидо́ша, я́ко у́зам мои́м явле́нным о Христе́ бы́вшым во всем суди́щи и в про́чих всех, и мно́жайшии бра́тиям о Го́споде, наде́явшымся о у́зах мои́х, па́че дерза́ти без стра́ха сло́во Бо́жие глаго́лати.
Послание к филипписием, зачало 237.
Флп 1:12–20А
В среду 19-я недели.
Бра́тие, разуме́ти вам хощу́, я́ко я́же о мне па́че во успе́х благовествова́ния приидо́ша, я́ко у́зам мои́м явле́нным о Христе́ бы́вшым во всем суди́щи и в про́чиих всех, и мно́жайшии бра́тия о Го́споде, наде́явшиися о у́зах мои́х, па́че дерза́ти без стра́ха сло́во Бо́жие глаго́лати. Не́цыи у́бо по за́висти и ре́вности, друзи́и же и за благоволе́ние Христа́ пропове́дают. О́ви у́бо от рве́ния Христа́ возвеща́ют нечи́сте, мня́ще печа́ль нанести́ у́зам мои́м, о́ви же от любве́, ве́дяще, я́ко во отве́те благовествова́ния лежу́. Что у́бо? Оба́че вся́цем о́бразом, а́ще вино́ю, а́ще и́стиною Христо́с пропове́даемь есть, и о сем ра́дуюся, но и возра́дуюся. Вем бо, я́ко сие́ сбу́дется ми во спасе́ние ва́шею моли́твою и подая́нием Ду́ха Иису́с Христо́ва, по ча́янию и упова́нию моему́.
Послание к филипписием, зачало 238.
Флп 1:20Б–27А
В четверток 19-я недели.
Бра́тие, ни о еди́ном постыжу́ся, но во вся́ком дерзнове́нии, я́коже всегда́, и ны́не возвели́чится Христо́с в те́ле мое́м, а́ще живото́м, а́ще ли сме́ртию. Мне бо е́же жи́ти, Христо́с, и е́же умре́ти, приобре́тение есть. А́ще ли е́же жи́ти ми те́лом, сие́ мне плод дела́, и что изво́лю, не вем. Обдержи́мь же есмь от обою́, жела́ние имы́й разреши́тися и со Христо́м бы́ти, мно́го па́че лу́чше, а е́же пребыва́ти во пло́ти, ну́жднейше есть вас ра́ди. И сие́ изве́стне вем, я́ко бу́ду и спребу́ду вам всем в ваш успе́х и ра́дость ве́ры, я́ко да похвала́ ва́ша избы́точествует о Христе́ Иису́се во мне, мои́м прише́ствием па́ки к вам. То́чию досто́йне благовествова́нию Христо́ву жи́тельствуйте.
Послание к филипписием, зачало 239.
Флп 1:27–2:4
В пяток 19-я недели.
Бра́тие, досто́йне благовествова́нию Христо́ву жи́тельствуйте, да а́ще прише́д и ви́дев вас, а́ще и не сый у вас, услы́шу я́же о вас, я́ко и́стиною стоите́ во еди́ном ду́се и единоду́шне сподвиза́ющеся по ве́ре Благовествова́ния во́лею, и не коле́блющеся ни о еди́ном же от сопроти́вных, е́же тем у́бо есть явле́ние поги́бели, вам же спасе́ния, и сие́ от Бо́га. Я́ко вам дарова́ся, е́же о Христе́, не то́кмо е́же в Него́ ве́ровати, но и е́же по Нем страда́ти, то́йже по́двиг иму́ще, яко́в же во мне ви́десте и ны́не слы́шите о мне. А́ще у́бо ко́е утеше́ние о Христе́, или́ а́ще ка́я уте́ха любве́, а́ще ко́е обще́ние ду́ха, а́ще ко́е милосе́рдие и щедро́ты, испо́лните мою́ ра́дость, да то́жде му́дрствуете, ту́же любо́вь иму́ще, единоду́шни, единому́дренни, ничто́же по рве́нию или́ тщесла́вию, но смиреному́дрием друг дру́га че́стию бо́льша себе́ творя́ще. Не свои́х си ки́йждо, но и дру́жних ки́йждо смотря́йте.
Послание к филипписием, зачало 240.
Флп 2:5–11
Богородице.
Бра́тие, сие́ да му́дрствуется в вас, е́же и во Христе́ Иису́се, И́же во о́бразе Бо́жии сый, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́ и дарова́ Ему́ и́мя, е́же па́че вся́каго и́мене, да о и́мени Иису́сове вся́ко коле́но поклони́тся небе́сных и земны́х и преиспо́дних, и всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.
Послание к филипписием, зачало 241.
Флп 2:12–16А
В понедельник 20-я недели.
Бра́тие, я́коже всегда́ послу́шасте мене́, не я́коже в прише́ствии мое́м то́чию, но ны́не мно́го па́че во отше́ствии мое́м, со стра́хом и тре́петом свое́ спасе́ние содева́йте. Бог бо есть де́йствуяй в вас и е́же хоте́ти и е́же де́яти о благоволе́нии. Вся твори́те без ропта́ния и размышле́ния, да бу́дете непоро́чни и це́ли, ча́да Бо́жия непоро́чна посреде́ ро́да стропти́ва и развраще́на, в ни́хже явля́етеся я́коже свети́ла в ми́ре, сло́во живо́тно предержа́ще, в похвалу́ мне в день Христо́в.
Послание к филипписием, зачало 242.
Флп 2:16Б–23
Во вторник 20-я недели.
Бра́тие, не вотще́ теко́х, ни вотще́ труди́хся. Но а́ще и жрен быва́ю о же́ртве и слу́жбе ве́ры ва́шея, ра́дуюся и сра́дуюся всем вам, та́кожде и вы ра́дуйтеся и сра́дуйте ми ся. Упова́ю же о Го́споде Иису́се Тимофе́а вско́ре посла́ти к вам, да и аз благоду́шствую, уве́дев я́же о вас. Ни еди́наго бо и́мам равноду́шна, и́же при́снее о вас попече́тся, вси бо свои́х си и́щут, а не я́же Христа́ Иису́са. Иску́сство же его́ зна́ете, зане́ я́коже отцу́ ча́до, со мно́ю порабо́тал в благове́стии. Сего́ же у́бо упова́ю посла́ти а́бие, по внегда́ уве́м я́же о мне.
Послание к филипписием, зачало 243.
Флп 2:24–30
В среду 20-я недели.
Бра́тие, наде́юся о Го́споде, я́ко и сам ско́ро прииду́ к вам. Потре́бнее же возмне́х Епафроди́та бра́та и споспе́шника и сво́инника моего́, ва́шего же посла́нника и служи́теля потре́бе мое́й, посла́ти к вам, поне́же жела́нием жела́ше ви́дети всех вас, и тужа́ше, зане́ слы́шасте, я́ко боле́. И́бо боле́ близ сме́рти, но Бог поми́лова его́, не его́ же то́кмо, но и мене́, да не скорбь на скорбь прииму́. Скоре́е у́бо посла́х его́, да ви́девше его́ па́ки, возра́дуетеся, и аз безпеча́лен пребу́ду. Приими́те у́бо его́ о Го́споде со вся́кою ра́достию, и таковы́я че́стны име́йте, зане́ за де́ло Христо́во да́же до сме́рти прибли́жися, пону́див себе́ вседу́шно, да испо́лнит ва́ше лише́ние, е́же к мое́й слу́жбе.
Послание к филипписием, зачало 244.
Флп 3:1–8
В четверток 20-я недели.
Бра́тие, ра́дуйтеся о Го́споде. Та́яжде бо писа́ти вам, мне у́бо неле́ностно, вам же тве́рдо. Блюди́теся от псов, блюди́теся от злых де́лателей, блюди́теся от сече́ния неве́рных. Мы бо есмы́ обре́зание, и́же ду́хом Бо́гу слу́жим и хва́лимся о Христе́ Иису́се, а не в пло́ти наде́емся. И́бо и аз име́ю наде́яние во пло́ти. А́ще кто ин мнит наде́ятися во пло́ти, аз па́че, обре́зан осмодне́вно, от ро́да Изра́илева, коле́на Вениами́нова, евре́ин от евре́й, по зако́ну фарисе́й, по ре́вности гони́х Це́рковь Бо́жию, по пра́вде зако́нней быв непоро́чен. Но я́же ми бя́ху приобре́тения, сия́ вмени́х Христа́ ра́ди тщету́. Но у́бо вменя́ю вся тщету́ бы́ти за превосходя́щее ра́зума Христа́ Иису́са Го́спода моего́, Его́же ра́ди всех отщети́хся, и вменя́ю вся уме́ты бы́ти, да Христа́ приобря́щу.
Послание к филипписием, зачало 245.
Флп 3:8Б–19
В пяток 20-я недели.
Бра́тие, всех отщети́хся, и вменя́ю вся уме́ты бы́ти, да Христа́ приобря́щу. И обря́щуся в Нем, не имы́й моея́ пра́вды, я́же от зако́на, но я́же ве́рою Иису́с Христо́вою, су́щею от Бо́га пра́вду в ве́ре, я́ко разуме́ти Его́, и си́лу воскресе́ния Его́, и сообще́ние страсте́й Его́, сообразу́яся сме́рти Его́, а́ще ка́ко дости́гну в воскресе́ние ме́ртвых. Не зане́ уже́ достиго́х, или́ уже́ соверши́хся, гоню́ же, а́ще и пости́гну, о не́мже и постиже́н бых от Христа́ Иису́са. Бра́тие, аз себе́ не у помышля́ю дости́гша, еди́но же, за́дняя у́бо забыва́я, в пре́дняя же простира́яся, со усе́рдием гоню́, к по́чести вы́шняго зва́ния Бо́жия о Христе́ Иису́се. Ели́цы у́бо соверше́нни, сие́ да му́дрствуим, и е́же а́ще и́но что мы́слите, и сие́ Бог вам откры́ет. Оба́че в не́же достиго́хом, то́же му́дрствовати и те́мже пра́вилом жи́тельствовати. Подо́бни ми быва́йте, бра́тие, и смотря́йте та́ко ходя́щыя, я́коже и́мате о́браз нас. Мно́зи бо хо́дят, и́хже мно́гажды глаго́лах вам, ны́не же и пла́чя глаго́лю, враги́ креста́ Христо́ва, и́мже кончи́на поги́бель, и́мже бог чре́во, и сла́ва в студе́ их, и́же земна́я му́дрствуют.
Послание к филипписием, зачало 246.
Флп 3:20–4:3
Священномучеником.
Бра́тие, на́ше житие́ на небесе́х есть, отону́дуже и Спаси́теля ждем, Го́спода на́шего Иису́са Христа́, И́же преобрази́т те́ло смире́ния на́шего, я́ко бы́ти сему́ сообра́зну те́лу сла́вы Его́, по де́йству е́же возмога́ти Ему́ и покори́ти Себе́ вся́ческая. Те́мже, бра́тие моя́ возлю́бленная и вожделе́нная, ра́досте и ве́нче мой, та́ко сто́йте о Го́споде, возлю́бленнии. Ево́дию молю́ и Синти́хию молю́ то́жде му́дрствовати о Го́споде. Ей, молю́ и тебе́, супру́жниче при́сный, споспе́шствуй им, я́же во благовествова́нии сподвиза́шася со мно́ю и с Кли́ментом и с про́чими споспе́шники мои́ми, и́хже имена́ в кни́гах живо́тных.
Послание к филипписием, зачало 247.
Флп 4:4–9
Неделя цветная.
Бра́тие, ра́дуйтеся всегда́ о Го́споде, и па́ки реку́, ра́дуйтеся. Кро́тость ва́ша разу́мна да бу́дет всем челове́ком. Госпо́дь близ. Ни о че́мже пецы́теся, но во всем моли́твою и моле́нием со благодаре́нием проше́ния ва́ша да сказу́ются к Бо́гу. И мир Бо́жий, превосходя́й всяк ум, да соблюде́т сердца́ ва́ша и разуме́ния ва́ша о Христе́ Иису́се. Про́чее же, бра́тие моя́, ели́ка суть и́стинна, ели́ка че́стна, ели́ка пра́ведна, ели́ка пречи́ста, ели́ка прелюбе́зна, ели́ка доброхва́льна, а́ще ка́я доброде́тель, и а́ще ка́я похвала́, сия́ помышля́йте. И́мже и научи́стеся, и прия́сте, и слы́шасте, и ви́десте во мне, сия́ твори́те, и Бог ми́ра бу́дет с ва́ми.
Послание к филипписием, зачало 248.
Флп 4:10–23
В понедельник 21-я недели.
Бра́тие, возра́довахся о Го́споде вельми́, я́ко уже́ когда́ воспомяну́сте пещи́ся о мне, поне́же и печа́стеся, но непого́дным вре́менем обдержа́стеся. Не я́ко по ску́дости глаго́лю, аз бо навыко́х, в ни́хже есмь, дово́лен бы́ти. Вем и смири́тися, вем и избы́точествовати, во всем и во всех навыко́х, и насыща́тися и алка́ти, и избы́точествовати и лиша́тися. Вся могу́ о укрепля́ющем мя Иису́се Христе́. Оба́че до́бре сотвори́сте, сприобщи́вшеся печа́ли мое́й. Ве́сте же и вы, Филипписи́ане, я́ко в нача́ле благовествова́ния, егда́ изыдо́х от Македо́нии, ни еди́на ми це́рковь общева́ся в сло́во дая́ния и прия́тия, то́чию вы еди́ни. Я́ко и в Солу́нь и еди́ною и два́щи в тре́бование мое́ посла́сте ми. Не я́ко ищу́ дая́ния, но ищу́ плода́ мно́жащагося в сло́во ва́ше. Прия́х же вся и избы́точествую: испо́лнихся, прие́м от Епафроди́та по́сланная от вас, воню́ благоуха́ния, же́ртву прия́тну, благоуго́дну Бо́гу. Бог же мой да испо́лнит вся́кое тре́бование ва́ше по бога́тству Своему́ в сла́ве, о Христе́ Го́споде. Бо́гу же и Отцу́ на́шему сла́ва во ве́ки веко́в. Ами́нь. Целу́йте вся́каго свя́та о Христе́ Иису́се. Целу́ют вы су́щая со мно́ю бра́тия. Целу́ют вы святи́и вси, па́че же и́же от ке́сарева до́му. Благода́ть Го́спода на́шего Иису́са Христа́ со все́ми ва́ми. Ами́нь.