Апостол
Ко Ефесеем Послание Святаго Апостола Павла.
Зачало: 216 217 218 219 220 220 от полу́ 221 222 223 224 224 от полу́ 225 226 227 228 229 230А 230Б 231 232 233 234
Послание ко ефесеем, зачало 216.
Еф 1:1–9А
В четверток 16-я недели.
Па́вел, посла́нник Иису́с Христо́в во́лею Бо́жиею, святы́м су́щым во Ефе́се и ве́рным о Христе́ Иису́се благода́ть вам и мир от Бо́га Отца́ на́шего и Го́спода Иису́са Христа́. Благослове́н Бог и Оте́ц Го́спода на́шего Иису́са Христа́, благослови́вый нас вся́цем благослове́нием духо́вным в небе́сных о Христе́. Я́коже избра́ нас в Нем пре́жде сложе́ния ми́ра, бы́ти нам святы́м и непоро́чным пред Ним в любви́, пре́жде наре́к нас во усыне́ние Иису́с Христо́м в Него́, по благоволе́нию хоте́ния Его́, в похвалу́ сла́вы благода́ти Его́, в не́йже облагодати́ нас о Возлю́бленнем. О Не́мже и́мамы избавле́ние Кро́вию Его́, и оставле́ние прегреше́ний, по бога́тству благода́ти Его́, ю́же преумно́жил есть в нас во вся́кой прему́дрости и ра́зуме, сказа́в нам та́йну во́ли Своея́ по благоволе́нию Его́.
Послание ко ефесеем, зачало 217.
Еф 1:7–17А
В пяток 16-я недели.
Бра́тие, и́мамы избавле́ние Кро́вию Христо́вою, и оставле́ние прегреше́ний, по бога́тству благода́ти Его́, ю́же преумно́жил есть в нас во вся́кой прему́дрости и ра́зуме, сказа́в нам та́йну во́ли Своея́ по благоволе́нию Его́, е́же пре́жде положи́ в Нем, в смотре́ние исполне́ния време́н, возгла́вити вся́ческая о Христе́, я́же на небесе́х и я́же на земли́ в нем, в Не́мже и насле́дницы бы́хом, пре́жде нарече́ни бы́вше по прозре́нию Бо́жию вся Де́йствующаго по сове́ту во́ли Своея́, я́ко бы́ти нам в похвале́ние сла́вы Его́, пре́жде упова́вшым во Христа́. В Не́мже и вы, слы́шавше сло́во и́стины, благовествова́ние спасе́ния на́шего, в Не́мже и ве́ровавше зна́менастеся Ду́хом обетова́ния Святы́м, И́же есть обруче́ние насле́дия на́шего, во избавле́ние снабде́ния, в похвалу́ сла́вы Его́. Сего́ ра́ди и аз слы́шав ва́шу ве́ру о Христе́ Иису́се и любо́вь, я́же ко всем святы́м, не престаю́ благодаря́ о вас, помина́ние о вас творя́ в моли́твах мои́х, да Бог Го́спода на́шего Иису́са Христа́, Оте́ц сла́вы, даст вам Ду́ха прему́дрости и открове́ния.
Послание ко ефесеем, зачало 218.
Еф 1:16–23
В субботу 28-ю.
Бра́тие, не престаю́ благодаря́ о вас, помина́ние о вас творя́ в моли́твах мои́х, да Бог Го́спода на́шего Иису́са Христа́, Оте́ц сла́вы, даст вам Ду́ха прему́дрости и открове́ния, в позна́ние Его́, просвеще́нна очеса́ се́рдца ва́шего, я́ко уве́дети вам, ко́е есть упова́ние зва́ния Его́, и ко́е бога́тство сла́вы достоя́ния Его́ во святы́х, и ко́е преспе́ющее вели́чество си́лы Его́ в нас ве́рующих по де́йству держа́вы кре́пости Его́, ю́же соде́я о Христе́, воскреси́в Его́ от ме́ртвых и поса́ждь одесну́ю Себе́ на небе́сных, превы́ше вся́каго Нача́льства и Вла́сти и Си́лы и Госпо́дства, и вся́каго и́мене имену́емаго не то́чию в ве́це сем, но и во гряду́щем. И вся покори́ под но́зе Его́, и Того́ даде́ главу́ вы́ше всех Це́ркви, я́же есть Те́ло Его́, исполне́ние Исполня́ющаго вся́ческая во всех.
Послание ко ефесеем, зачало 219.
Еф 1:22–2:3
В понедельник 17-я недели.
Бра́тие, Бог и Оте́ц Го́спода на́шего Иису́са Христа́ вся покори́ под но́зе Его́, и Того́ даде́ главу́ вы́ше всех Це́ркви, я́же есть Те́ло Его́, исполне́ние Исполня́ющаго вся́ческая во всех. И вас су́щих прегреше́ньми ме́ртвых и грехи́ ва́шими, в ни́хже иногда́ ходи́сте по ве́ку ми́ра сего́, по кня́зю вла́сти возду́шныя, ду́ха, и́же ны́не де́йствует в сыне́х противле́ния, в ни́хже и мы вси жи́хом иногда́ в по́хотех пло́ти на́шея, творя́ще во́лю пло́ти и помышле́ний, и бе́хом естество́м ча́да гне́ва, я́коже и про́чии.
Послание ко ефесеем, зачало 220.
Еф 2:4–10
Неделя 23-я.
Бра́тие, Бог бога́т сый в ми́лости, за премно́гую любо́вь Свою́, е́юже возлюби́ нас, и су́щих нас ме́ртвых прегреше́ньми, сооживи́ Христо́м, благода́тию есте́ спасе́ни, и с Ним воскреси́, и спосади́ на небе́сных во Христе́ Иису́се да яви́т в ве́цех гряду́щих презе́льное бога́тство благода́ти Своея́ благосты́нею на нас о Христе́ Иису́се. Благода́тию бо есте́ спасе́ни чрез ве́ру, и сие́ не от вас, Бо́жий дар, не от дел, да никто́же похва́лится. Того́ бо есмы́ творе́ние, созда́ни во Христе́ Иису́се на дела́ блага́я, я́же пре́жде угото́ва Бог, да в них хо́дим.
Послание ко ефесеем, зачало 220: от полу́.
Еф 2:11–13
В субботу 29-ю.
Бра́тие, помина́йте, я́ко вы, и́же иногда́ язы́цы во пло́ти, глаго́лемии необре́зание от реко́маго обре́зания во пло́ти, рукотворе́ннаго, я́ко бе́сте во вре́мя о́но без Христа́, отчужде́ни жития́ Изра́илева и чу́жди от заве́т обетова́ния, упова́ния не иму́ще и безбо́жни в ми́ре. Ны́не же о Христе́ Иису́се, вы бы́вшии иногда́ дале́че, близ бы́сте Кро́вию Христо́вою.
Послание ко ефесеем, зачало 221.
Еф 2:14–22
Неделя 24-я.
Бра́тие, Христо́с есть мир наш, сотвори́вый обоя́ еди́но, и средосте́ние огра́ды разори́вый, вражду́ Пло́тию Свое́ю, зако́н за́поведей уче́ньми упраздни́в, да о́ба сози́ждет Собо́ю во еди́наго но́ваго челове́ка, творя́ мир, и примири́т обои́х во еди́ном те́ле Бо́гови кресто́м, уби́в вражду́ на нем. И прише́д благовести́ мир вам, да́льним и бли́жним, зане́ Тем и́мамы приведе́ние о́бои во еди́ном Ду́се ко Отцу́. Те́мже у́бо ктому́ не́сте стра́нни и прише́льцы, но сожи́теле святы́м и при́снии Бо́гу, назда́ни бы́вше на основа́нии Апо́стол и проро́к, су́щу краеуго́льну Самому́ Иису́су Христу́, о Не́мже вся́ко созда́ние составля́емо расте́т в це́рковь святу́ю о Го́споде, о Не́мже и вы созида́етеся в жили́ще Бо́жие Ду́хом.
Послание ко ефесеем, зачало 222.
Еф 2:19–3:7
Во вторник 17-я недели.
Бра́тие, ктому́ не́сте стра́нни и прише́льцы, но сожи́теле святы́м и при́снии Бо́гу, назда́ни бы́вше на основа́нии Апо́стол и проро́к, су́щу краеуго́льну Самому́ Иису́су Христу́, о не́мже вся́ко созда́ние составля́емо расте́т в це́рковь святу́ю о Го́споде, о Не́мже и вы созида́етеся в жили́ще Бо́жие Ду́хом. Сего́ ра́ди аз Па́вел, ю́зник Иису́с Христо́в о вас язы́цех, похвалю́ся. А́ще у́бо слы́шасте смотре́ние благода́ти Бо́жия да́нныя мне в вас, я́ко по открове́нию сказа́ ми ся та́йна, я́коже преднаписа́х вма́ле. О не́мже мо́жете чту́ще разуме́ти ра́зум мой в та́йне Христо́ве, я́же во ине́х ро́дех не сказа́ся сыно́м челове́ческим, я́коже ны́не откры́ся святы́м Его́ Апо́столом и проро́ком Ду́хом Святы́м, я́ко бы́ти язы́ком снасле́дником и стеле́сником и сприча́стником обетова́ния Его́ о Христе́ Иису́се благовествова́нием, ему́же бых служи́тель по да́ру благода́ти Бо́жия, да́нныя мне по де́йству си́лы Его́.
Послание ко ефесеем, зачало 223.
Еф 3:8–21
В среду 17-я недели.
Бра́тие, мне ме́ньшему всех святы́х дана́ бысть благода́ть сия́, во язы́цех благовести́ти неизсле́дованное бога́тство Христо́во, и просвети́ти всех, что есть смотре́ние та́йны сокрове́нныя от веко́в в Бо́зе, созда́вшем вся́ческая Иису́с Христо́м, да ска́жется ны́не нача́лом и власте́м на небе́сных Це́рковию многоразли́чная прему́дрость Бо́жия, по предложе́нию век, е́же сотвори́ о Христе́ Иису́се Го́споде на́шем, о Не́мже и́мамы дерзнове́ние и приведе́ние в наде́янии ве́рою Его́. Те́мже молю́ вы не стужа́ти си в ско́рбех мои́х о вас, я́же есть сла́ва ва́ша. Сего́ ра́ди преклоня́ю коле́на моя́ ко Отцу́ Го́спода на́шего Иису́са Христа́, из Него́же вся́ко оте́чество на небесе́х и на земли́ имену́ется, да даст вам по бога́тству сла́вы Своея́, си́лою утверди́тися Ду́хом Его́ во вну́треннем челове́це, всели́тися Христу́ ве́рою в сердца́ ва́ша: в любви́ вкорене́ни и основа́ни, да возмо́жете разуме́ти со все́ми святы́ми, что широта́, и долгота́, и глубина́, и высота́, разуме́ти же преспе́ющую ра́зум любо́вь Христо́ву, да испо́лнитеся во вся́ко исполне́ние Бо́жие. Могу́щему же па́че вся твори́ти по преизбы́точествию, и́хже про́сим или́ разуме́ем, по си́ле де́йствуемей в нас, Тому́ сла́ва в Це́ркви о Христе́ Иису́се во вся ро́ды ве́ка веко́в. Ами́нь.
Послание ко ефесеем, зачало 224.
Еф 4:1–6
Неделя 25-я.
Бра́тие, молю́ вы, аз ю́зник о Го́споде, досто́йно ходи́ти зва́ния, в не́же зва́ни бы́сте, со вся́ким смиреному́дрием и кро́тостию, с долготерпе́нием, терпя́ще друг дру́гу любо́вию, тща́щеся блюсти́ едине́ние ду́ха в сою́зе ми́ра. Еди́но те́ло, еди́н дух, я́коже и зва́ни бы́сте во еди́ном упова́нии зва́ния ва́шего. Еди́н Госпо́дь, еди́на ве́ра, еди́но креще́ние, еди́н Бог и Оте́ц всех, И́же над все́ми и чрез всех и во всех нас.
Послание ко ефесеем, зачало 224: от полу́.
Еф 4:7–13
Неделя по Просвещении.
Сие же и иерархом.
Бра́тие, еди́ному кому́ждо нас даде́ся благода́ть по ме́ре дарова́ния Христо́ва. Те́мже глаго́лет: возше́д на высоту́, плени́л еси́ плен, и даде́ дая́ния челове́ком. А е́же взы́де, что есть, то́чию я́ко и сни́де пре́жде в до́льнейшыя страны́ земли́? Сше́дый, Той есть и возше́дый превы́ше всех небе́с, да испо́лнит вся́ческая. И Той дал есть о́вы у́бо Апо́столы, о́вы же проро́ки, о́вы же Благове́стники, о́вы же па́стыри и учи́тели, к соверше́нию святы́х, в де́ло служе́ния, в созида́ние Те́ла Христо́ва, до́ндеже дости́гнем вси во едине́ние ве́ры и позна́ния Сы́на Бо́жия, в му́жа соверше́нна, в ме́ру во́зраста исполне́ния Христо́ва.
Послание ко ефесеем, зачало 225.
Еф 4:14–19
В четверток 17-я недели.
Бра́тие, да не быва́ем ктому́ младе́нцы, вла́ющеся и скита́ющеся вся́ким ве́тром уче́ния, во лжи челове́честей, в кова́рстве ко́зней льще́ния. И́стинствующе же в любви́, да возрасти́м в Него́ вся́ческая, И́же есть глава́ Христо́с, из Него́же все те́ло, составля́емо и счинева́емо прили́чне вся́цем осяза́нием подая́ния, по де́йству в ме́ре еди́ныя коея́ждо ча́сти, возраще́ние те́ла твори́т в созда́ние сама́го себе́ любо́вию. Сие́ у́бо глаго́лю и послушеству́ю о Го́споде, ктому́ не ходи́ти вам, я́коже и про́чии язы́цы хо́дят в суете́ ума́ их, помраче́ни смы́слом, су́ще отчужде́ни от жи́зни Бо́жия, за неве́жество су́щее в них, за окамене́ние серде́ц их, и́же в неча́яние вло́жшеся, преда́ша себе́ студодея́нию, в де́лание вся́кия нечистоты́ в лихоима́нии.
Послание ко ефесеем, зачало 226.
Еф 4:17–25А
В пяток 17-я недели.
Бра́тие, сие́ глаго́лю и послушеству́ю о Го́споде, ктому́ не ходи́ти вам, я́коже и про́чии язы́цы хо́дят в суете́ ума́ их, помраче́ни смы́слом, су́ще отчужде́ни от жи́зни Бо́жия, за неве́жество су́щее в них, за окамене́ние серде́ц их, и́же в неча́яние вло́жшеся, преда́ша себе́ студодея́нию, в де́лание вся́кия нечистоты́ в лихоима́нии. Вы же не та́ко позна́сте Христа́. А́ще у́бо слы́шасте Его́ и о Нем научи́стеся, я́коже есть и́стина о Иису́се: отложи́ти вам, по пе́рвому житию́, ве́тхаго челове́ка, тле́ющаго в по́хотех преле́стных, обновля́тися же ду́хом ума́ ва́шего, и облещи́ся в но́ваго челове́ка, созда́ннаго по Бо́гу в пра́вде и в преподо́бии и́стины. Те́мже отло́жше лжу, глаго́лите и́стину ки́йждо ко и́скреннему своему́.
Послание ко ефесеем, зачало 227.
Еф 4:25–32
В понедельник 18-я недели.
Бра́тие, отло́жше лжу, глаго́лите и́стину ки́йждо ко и́скреннему своему́. Зане́ есмы́ друг дру́гу у́дове. Гне́вайтеся и не согреша́йте, со́лнце да не за́йдет в гне́ве ва́шем, ниже́ дади́те ме́ста диа́волу. Крады́й ктому́ да не кра́дет, но па́че да тружда́ется, де́лая свои́ма рука́ма благо́е, да и́мать подая́ти тре́бующему. Вся́ко сло́во гни́ло да не исхо́дит из уст ва́ших, но то́чию е́же есть бла́го к созда́нию ве́ры, да даст благода́ть слы́шащим. И не оскорбля́йте Ду́ха Свята́го Бо́жия, о Не́мже зна́менастеся в день избавле́ния. Вся́ка го́ресть, и гнев, и я́рость, и кличь, и хула́ да во́змется от вас, со вся́кою зло́бою. Быва́йте же друг ко дру́гу бла́зи, милосе́рди, проща́юще друг дру́гу, я́коже и Бог во Христе́ прости́л есть вам.
Послание ко ефесеем, зачало 228.
Еф 5:1–8А
В субботу 30-ю.
Бра́тие, быва́йте подража́тели Бо́гу, я́коже ча́да возлю́бленная, и ходи́те в любви́, я́коже и Христо́с возлюби́л есть нас, и предаде́ Себе́ за ны приноше́ние и же́ртву Бо́гу в воню́ благоуха́ния. Блуд же и вся́ка нечистота́, и лихои́мство ниже́ да имену́ется в вас, я́коже подоба́ет святы́м, и скверносло́вие, и буесло́вие, или́ кощу́ны, и я́же неподо́бная, но па́че благодаре́ние. Сие́ бо да есте́ ве́дуще, я́ко всяк блудни́к, или́ нечи́ст, или́ лихои́мец, и́же есть идолослужи́тель, не и́мать достоя́ния в Ца́рствии Христа́ и Бо́га. Никто́же вас да льстит су́етными словесы́, сих бо ра́ди гряде́т гнев Бо́жий на сы́ны непокори́выя. Не быва́йте у́бо соприча́стницы сим. Бе́сте бо иногда́ тма, ны́не же свет о Го́споде.
Послание ко ефесеем, зачало 229.
Еф 5:8Б–19
Неделя 26-я.
Сие же и в понедельник Святаго Духа.
Бра́тие, я́ко ча́да све́та ходи́те, плод бо Духо́вный eсть во вся́кой благосты́ни и пра́вде и и́стине, искуша́юще, что eсть благоуго́дно Бо́гови. И не приoбща́йтеся к дело́м непло́дным тмы, па́че же и облича́йте. Быва́eмая бо о́тай от них, сра́мно eсть и глаго́лати. Вся же облича́eмая, от све́та явля́ются: все бо явля́емое свет eсть. Сего́ ра́ди глаго́лет: воста́ни, спяй, и воскресни́ от ме́ртвых, и освети́т тя Христо́с. Блюди́те у́бо, ка́ко опа́сно хо́дите, не я́коже нему́дри, но я́коже прему́дри, искупу́юще вре́мя, я́ко дни́е лука́ви суть. Сего́ ра́ди не быва́йте несмы́сленни, но разумева́юще, что eсть во́ля Бо́жия. И не упива́йтеся вино́м, в не́мже eсть блуд, но па́че исполня́йтеся Ду́хом, глаго́люще себе́ во псалме́х и пе́ниих, и пе́снех духо́вных, воспева́юще и пою́ще в сердца́х ва́ших Го́сподеви.
Послание ко ефесеем, зачало 230А.
Еф 5:20–26
Во вторник 18-я недели.
Бра́тие, благодаря́ще всегда́ о всех о и́мени Го́спода на́шего Иису́са Христа́ Бо́гу и Отцу́, повину́ющеся друг дру́гу в стра́се Бо́жии. Жены́, свои́м муже́м повину́йтеся, я́коже Го́споду, зане́ муж глава́ есть жены́, я́коже и Христо́с глава́ Це́ркве, и Той есть Спаси́тель те́ла. Но я́коже Це́рковь повину́ется Христу́, та́кожде и жены́ свои́м муже́м во всем. Му́жие, люби́те своя́ жены́, я́коже и Христо́с возлюби́ Це́рковь, и Себе́ предаде́ за ню, да освяти́т ю́, очи́стив ба́нею водно́ю в глаго́ле.
Послание ко ефесеем, зачало 230Б.
Еф 5:20–33
Во время брака.
Бра́тие, благодаря́ще всегда́ о всех о и́мени Го́спода на́шего Иису́са Христа́ Бо́гу и Отцу́, повину́ющеся друг дру́гу в стра́се Бо́жии. Жены́, свои́м му́жем повину́йтеся, я́коже Го́споду, зане́ муж глава́ есть жены́, я́коже и Христо́с глава́ Це́ркве, и Той есть Спаси́тель те́ла. Но я́коже Це́рковь повину́ется Христу́, та́кожде и жены́ свои́м муже́м во всем. Му́жие, люби́те своя́ жены́, я́коже и Христо́с возлюби́ Це́рковь, и Себе́ предаде́ за ню, да освяти́т ю́, очи́стив ба́нею водно́ю в глаго́ле. Да предста́вит ю́ Себе́ сла́вну Це́рковь, не иму́щу скве́рны, или́ поро́ка, или́ не́что от таковы́х, но да есть свята́ и непоро́чна. Та́ко до́лжни суть му́жие люби́ти своя́ жены́, я́ко своя́ телеса́: любя́й бо свою́ жену́, себе́ сама́го лю́бит. Никто́же бо когда́ свою́ плоть возненави́де, но пита́ет и гре́ет ю́, я́коже и Госпо́дь Це́рковь, зане́ у́ди есмы́ те́ла Его́, от пло́ти Его́, и от косте́й Его́. Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й, и бу́дета два в плоть еди́ну. Та́йна сия́ вели́ка есть, аз же глаго́лю во Христа́ и во Це́рковь. Оба́че и вы по еди́ному, ки́йждо свою́ жену́ си́це да лю́бит, я́коже и себе́, а жена́ да бои́тся своего́ му́жа.
Послание ко ефесеем, зачало 231.
Еф 5:25–33А
В среду 18-я недели.
Бра́тие, люби́те своя́ жены́, я́коже и Христо́с возлюби́ Це́рковь, и Себе́ предаде́ за ню, да освяти́т ю́, очи́стив ба́нею водно́ю в глаго́ле. Да предста́вит ю́ Себе́ сла́вну Це́рковь, не иму́щу скве́рны, или́ поро́ка, или́ не́что от таковы́х, но да бу́дет свя́та и непоро́чна. Та́ко до́лжни суть му́жие люби́ти своя́ жены́, я́ко своя́ телеса́: любя́й бо свою́ жену́, себе́ сама́го лю́бит. Никто́же бо когда́ свою́ плоть возненави́де, но пита́ет и гре́ет ю́, я́коже и Госпо́дь Це́рковь. Зане́ у́ди есмы́ Те́ла Его́, от пло́ти Его́ и от косте́й Его́. Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й, и бу́дета два в плоть еди́ну. Та́йна сия́ вели́ка есть, аз же глаго́лю во Христа́ и во Це́рковь. Оба́че и вы, по еди́ному ки́йждо свою́ жену́ си́це да лю́бит, я́коже и себе́.
Послание ко ефесеем, зачало 232.
Еф 5:33–6:9
В четверток 18-я недели.
Бра́тие, по еди́ному ки́йждо вас свою́ жену́ си́це да лю́бит, я́коже и себе́, а жена́ да бои́тся своего́ му́жа. Ча́да, послу́шайте свои́х роди́телей о Го́споде, сие́ бо есть пра́ведно. Чти отца́ твоего́ и ма́терь, я́же есть за́поведь пе́рвая во обетова́нии, да бла́го ти бу́дет, и бу́деши долголе́тен на земли́. И отцы́, не раздража́йте чад свои́х, но воспитова́йте их в наказа́нии и уче́нии Госпо́дни. Раби́, послу́шайте госпо́дий свои́х по пло́ти со стра́хом и тре́петом, в простоте́ се́рдца ва́шего, я́коже и Христа́, не пред очи́ма то́чию рабо́тающе я́ко человекоуго́дницы, но я́коже раби́ Христо́вы, творя́ще во́лю Бо́жию от души́, со благоразу́мием служа́ще я́коже Го́споду, а не я́ко челове́ком, ве́дяще, я́ко ко́ждо, е́же а́ще сотвори́т благо́е, сие́ прии́мет от Го́спода, а́ще раб, а́ще свобо́дь. И госпо́дие, та́яжде твори́те к ним, послабля́юще им преще́ния, ве́дуще, я́ко и вам саме́м и тем Госпо́дь есть на небесе́х, и обинове́ния лица́ несть у Него́.
Послание ко ефесеем, зачало 233.
Еф 6:10–17
Неделя 27-я.
Сие же и в субботу по Просвещении.
Бра́тие, возмога́йте о Го́споде и в держа́ве кре́пости Его́, облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским, я́ко несть на́ша брань к кро́ви и пло́ти, но к нача́лом и ко власте́м и к миродержи́телем тмы ве́ка сего́, к духово́м зло́бы поднебе́сным. Сего́ ра́ди приими́те вся ору́жия Бо́жия, да возмо́жете проти́витися в день лют и вся соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра, над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти. И шлем спасе́ния восприими́те, и мечь духо́вный, и́же есть глаго́л Бо́жий.
Послание ко ефесеем, зачало 234.
Еф 6:18–24
В пяток 18-я недели.
Бра́тие, вся́кою моли́твою и моле́нием моля́щеся на вся́ко вре́мя ду́хом, и в сие́ и́стое бдя́ще во вся́ком терпе́нии и моли́тве о всех святы́х и о мне, да да́стся ми сло́во во отверзе́ние уст мои́х, с дерзнове́нием сказа́ти та́йну благовествова́ния, о не́мже посо́льствую во у́зах, да в нем дерза́ю, я́коже подоба́ет ми глаго́лати. Да уве́сте же и вы, я́же о мне, что де́лаю, вся ска́жет вам Тихи́к, возлю́бленный брат и ве́рен служи́тель о Го́споде, его́же посла́х к вам на сие́ и́стое, да уве́сте, я́же о нас, и да уте́шит сердца́ ва́ша. Мир бра́тии и любо́вь с ве́рою от Бо́га Отца́ и Го́спода Иису́са Христа́. Благода́ть со все́ми лю́бящими Го́спода на́шего Иису́са Христа́ в неистле́нии. Ами́нь.