Апостол

К Солуняном Второе Послание Святаго Апостола Павла.

Послание к солуняном второе, зачало 274.

2 Фес 1:1–10
В понедельник 25-я недели.

Па́вел и Силуа́н, и Тимофе́й, це́ркви Солу́нстей, о Бо́зе Отце́ на́шем и Го́споде Иису́се Христе́, благода́ть вам и мир от Бо́га Отца́ на́шего, и Го́спода Иису́са Христа́. Благодари́ти до́лжни есмы́ Бо́га всегда́ о вас, бра́тие, я́коже досто́йно есть, я́ко превозраста́ет ве́ра ва́ша, и мно́жится любо́вь еди́наго коего́ждо всех вас друг ко дру́гу, я́ко саме́м нам хвали́тися о вас в це́рквах Бо́жиих, о терпе́нии ва́шем и ве́ре во всех гоне́ниих ва́ших и ско́рбех, и́хже прие́млете, показа́ние пра́веднаго суда́ Бо́жия, во е́же сподо́битися вам Ца́рствия Бо́жия, его́же ра́ди и стра́ждете. А́ще у́бо пра́ведно у Бо́га, возда́ти скорбь оскорбля́ющым вас, а вам оскорбля́емым отра́ду с на́ми, во открове́нии Го́спода Иису́са с небесе́, со А́нгелы си́лы Своея́, во огни́ пла́менне даю́щаго отмще́ние не ве́дущым Бо́га и не послу́шающым благовествова́ния Го́спода на́шего Иису́са Христа́. И́же му́ку прии́мут, поги́бель ве́чную, от лица́ Госпо́дня и от сла́вы кре́пости Его́, егда́ прии́дет просла́витися во святы́х Свои́х и ди́вен бы́ти во всех ве́ровавших, я́ко уве́рися свиде́тельство на́ше в вас в день он.

Послание к солуняном второе, зачало 274: от полу́.

2 Фес 1:10Б–2:2
Во вторник 25-я недели.

Бра́тие, уве́рися свиде́тельство на́ше в вас, в день он. За е́же и мо́лимся всегда́ о вас, да вы сподо́бит зва́нию Бог наш и испо́лнит вся́ко благоволе́ние бла́гости и де́ло ве́ры в си́ле, я́ко да просла́вится и́мя Го́спода на́шего Иису́са Христа́ в вас, и вы в Нем, по благода́ти Бо́га на́шего и Го́спода Иису́са Христа́. Мо́лим же вы, бра́тие, о прише́ствии Го́спода на́шего Иису́са Христа́ и на́шем собра́нии о Нем, не ско́ро подвиза́тися вам от ума́, ни ужаса́тися ниже́ ду́хом, ниже́ сло́вом, ни посла́нием а́ки от нас по́сланным, я́ко уже́ настои́т день Христо́в.

Послание к солуняном второе, зачало 275.

2 Фес 2:1–12
В среду 25-я недели.

Бра́тие, мо́лим вы о прише́ствии Го́спода на́шего Иису́са Христа́ и на́шем собра́нии о Нем, не ско́ро подвиза́тися вам от ума́, ни ужаса́тися ниже́ ду́хом, ниже́ сло́вом, ни посла́нием а́ки от нас по́сланным, я́ко уже́ настои́т день Христо́в. Да никто́же вас прельсти́т ни по еди́ному же о́бразу, я́ко а́ще не прии́дет отступле́ние пре́жде, и откры́ется челове́к беззако́ния, сын поги́бели, проти́вник и превознося́йся па́че вся́каго глаго́лемаго Бо́га или́ чти́лища, я́коже ему́ се́сти в це́ркви Бо́жией а́ки Бо́гу, показу́ющу себе́, я́ко Бог есть. Не по́мните ли, я́ко еще́ живы́й у вас, сия́ глаго́лах вам? И ны́не одержа́щее ве́сте, во е́же яви́тися ему́ в свое́ ему́ вре́мя. Та́йна бо уже́ де́ется беззако́ния, то́чию держя́й ны́не до́ндеже от среды́ бу́дет, и тогда́ яви́тся беззако́нник, его́же Госпо́дь Иису́с убие́т ду́хом уст Свои́х, и упраздни́т явле́нием прише́ствия Своего́, его́же есть прише́ствие по де́йству сатанину́ во вся́кой си́ле и зна́мениих и чудесе́х ло́жных, и во вся́кой льсти непра́вды в погиба́ющих, зане́ любве́ и́стины не прия́ша, во е́же спасти́ся им. И сего́ ра́ди по́слет им Бог де́йство льсти, во е́же ве́ровати им лжи, да суд прии́мут вси неве́ровавшии и́стине, но благоволи́вше в непра́вде.

Послание к солуняном второе, зачало 276.

2 Фес 2:13–3:5
В четверток 25-я недели.

Бра́тие, мы до́лжни есмы́ благодари́ти Бо́га всегда́ о вас, бра́тие возлю́бленная от Го́спода, я́ко избра́л есть вас Бог от нача́ла во спасе́ние во святы́ни Ду́ха и ве́ры и́стины, в не́же призва́ вас благовествова́нием на́шим, в получе́ние сла́вы Го́спода на́шего Иису́са Христа́. Те́мже у́бо, бра́тие, сто́йте и держи́те преда́ния, и́мже научи́стеся или́ сло́вом, или́ посла́нием на́шим. Сам же Госпо́дь наш Иису́с Христо́с, и Бог и Оте́ц наш, возлюби́вый нас, и да́вый утеше́ние ве́чно, и упова́ние бла́го в благода́ти, да уте́шит сердца́ ва́ша, и да утверди́т во вся́ком сло́ве и де́ле бла́зе. Про́чее же моли́теся о нас, бра́тие, да сло́во Госпо́дне тече́т и сла́вится, я́коже и в вас, и да изба́вимся от злых и лука́вых челове́к, не всех бо есть ве́ра. Ве́рен есть Госпо́дь, И́же утверди́т вы и сохрани́т от лука́ваго. Упова́ем же на Го́спода о вас, я́ко я́же повелева́ем вам, и творите́ и сотворите́. Госпо́дь же да испра́вит сердца́ ва́ша в любо́вь Бо́жию и в терпе́ние Христо́во.

Послание к солуняном второе, зачало 277.

2 Фес 3:6–18
Пяток 25-я недели.

Бра́тие, повелева́ем вам о и́мени Го́спода на́шего Иису́са Христа́, отлуча́тися вам от вся́каго бра́та безчи́нно ходя́ща, а не по преда́нию, е́же прия́ша от нас. Са́ми бо ве́сте, ка́ко ле́по есть вам подо́битися нам, я́ко не безчи́нновахом у вас, ни ту́не хлеб ядо́хом у кого́, но в труде́ и по́двизе, нощь и день де́лающе, да не отягчи́м никого́же от вас. Не я́ко не и́мамы вла́сти, но я́ко да себе́ о́браз да́мы вам, во е́же уподо́битися нам. И́бо егда́ бе́хом у вас, сие́ завещава́хом вам: я́ко а́ще кто не хо́щет де́лати ниже́ да яст. Слы́шим бо не́кия безчи́нно ходя́щыя у вас, ничто́же де́лающыя, но лука́вно обходя́щыя. Таковы́м запреща́ем и мо́лим о Го́споде на́шем Иису́се Христе́, да с безмо́лвием де́лающе, свой хлеб ядя́т. Вы же, бра́тие, не стужа́йте си до́брое творя́ще. А́ще ли же кто не послу́шает словесе́ на́шего посла́нием, сего́ назна́менуйте и не примеша́йтеся ему́, да посрами́тся. И не а́ки врага́ име́йте его́, но наказу́йте я́коже бра́та. Сам же Госпо́дь ми́ра да даст вам мир всегда́ во вся́ком о́бразе. Госпо́дь со все́ми ва́ми. Целова́ние мое́ю руко́ю Па́влею, е́же есть зна́мение во вся́ком посла́нии, си́це пишу́: благода́ть Го́спода на́шего Иису́са Христа́ со все́ми ва́ми. Ами́нь.