Апостол
К Коринфяном Второе Послание Святаго Апостола Павла.
167 167 от полу́ 168 169 170 171 172 173 174 175 176 177 178 179 180 181 182 182 от полу́ 183 184 185 186 187 188 189 190 191 192 193 194 195 196 197
Послание к коринфяном второе, зачало 167.
2 Кор 1:1–7
В четверток 10-я недели.
Па́вел, посла́нник Иису́с Христо́в во́лею Бо́жиею, и Тимофе́й брат, це́ркви Бо́жией су́щей в Кори́нфе, со святы́ми все́ми су́щими во всей Аха́ии: благода́ть вам и мир от Бо́га Отца́ на́шего, и Го́спода Иису́са Христа́. Благослове́н Бог и Оте́ц Го́спода на́шего Иису́са Христа́, Оте́ц щедро́т и Бог вся́кия уте́хи, утеша́яй нас о вся́кой ско́рби на́шей, я́ко возмощи́ нам уте́шити су́щыя во вся́кой ско́рби, утеше́нием, и́мже утеша́емся са́ми от Бо́га. Зане́ я́коже избы́точествуют страда́ния Христо́ва в нас, та́ко Христо́м избы́точествует и утеше́ние на́ше. А́ще ли же скорби́м, о ва́шем утеше́нии и спасе́нии, де́йствующемся в терпе́нии те́хже страда́ний, я́же и мы стра́ждем, и упова́ние на́ше изве́стно о вас. А́ще ли утеша́емся, о ва́шем утеше́нии и спасе́нии, ве́дяще, зане́ я́коже о́бщницы есте́ страсте́м на́шым, та́кожде и утеше́нию.
Послание к коринфяном второе, зачало 167: от полу́.
2 Кор 1:3–7
Великим мучеником.
Бра́тие, благослове́н Бог и Оте́ц Го́спода на́шего Иису́са Христа́, Оте́ц щедро́т и Бог вся́кия уте́хи, утеша́яй нас о вся́кой ско́рби на́шей, я́ко возмощи́ нам уте́шити су́щыя во вся́кой ско́рби, утеше́нием, и́мже утеша́емся са́ми от Бо́га. Зане́ я́коже избы́точествуют страда́ния Христо́ва в нас, та́ко Христо́м избы́точествует и утеше́ние на́ше. А́ще ли же скорби́м, о ва́шем утеше́нии и спасе́нии, де́йствующемся в терпе́нии те́хже страда́ний, я́же и мы стра́ждем, и упова́ние на́ше изве́стно о вас. А́ще ли утеша́емся, о ва́шем утеше́нии и спасе́нии, ве́дяще, зане́ я́коже о́бщницы есте́ страсте́м на́шым, та́кожде и утеше́нию.
Послание к коринфяном второе, зачало 168.
2 Кор 1:8–11
В субботу 20-ю.
Бра́тие, не хощу́ вас не ве́дети о ско́рби на́шей, бы́вшей нам во Аси́и, я́ко по премно́гу и па́че си́лы отяготи́хомся, я́ко не наде́ятися нам и жи́ти. Но са́ми в себе́ осужде́ние сме́рти име́хом, да не наде́ющеся бу́дем на ся, но на Бо́га возставля́ющаго ме́ртвыя, И́же от толи́кия сме́рти изба́вил ны есть и избавля́ет, На́ньже и упова́хом, я́ко и еще́ изба́вит; поспеша́ющим и вам по нас моли́твою, да от мног лиц е́же в нас дарова́ние, мно́гими благодари́тся о вас.
Послание к коринфяном второе, зачало 169.
2 Кор 1:12–20
В пяток 10-я недели.
Бра́тие, похвале́ние на́ше сие́ есть, свиде́тельство со́вести на́шея, я́ко в простоте́ и чистоте́ Бо́жией, а не в му́дрости пло́ти, но благода́тию Бо́жиею жи́хом в ми́ре, мно́жае же у вас. Не ина́я бо пи́шем вам, но я́же чтете́ и разумева́ете, упова́ю же, я́ко и до конца́ уразуме́ете, я́коже и разуме́сте нас от ча́сти, я́ко похвале́ние вам есмы́, я́коже и вы нам, в день Го́спода на́шего Иису́са Христа́. И сим упова́нием хоте́х к вам приити́ пре́жде, да втору́ю благода́ть и́мате, и ва́ми проити́ в Македо́нию, и па́ки от Македо́нии приити́ к вам, и ва́ми проводи́тися во Иуде́ю. Сие́ же хотя́, еда́ что у́бо легкото́ю де́ях? Или́ я́же совещава́ю, по пло́ти совещава́ю, да бу́дет у мене́ е́же ей, ей, и е́же ни, ни. Ве́рен же Бог, я́ко сло́во на́ше, е́же к вам, не бысть ей и ни. И́бо Бо́жий Сын Иису́с Христо́с, и́же у вас на́ми пропове́данный, мно́ю и Силуа́ном и Тимофе́ем, не бысть ей и ни, но в Нем Само́м ей бысть. Ели́ка бо обетова́ния Бо́жия, в Том ей и в Том ами́нь, Бо́гу к сла́ве на́ми.
Послание к коринфяном второе, зачало 170.
2 Кор 1:21–2:4
Неделя 14-я.
Бра́тие, известву́яй нас с ва́ми во Христа́ и пома́завый нас Бог, И́же и запечатле́вый нас, и да́вый обруче́ние Ду́ха в сердца́ на́ша. Аз же свиде́теля Бо́га призыва́ю на мою́ ду́шу, я́ко щадя́ вас, ктому́ не приидо́х в Кори́нф, не я́ко облада́ем ве́рою ва́шею, но я́ко споспе́шницы есмы́ ва́шей ра́дости: ве́рою бо стоите́. Суди́х же в себе́ сие́, не па́ки ско́рбию к вам приити́. А́ще бо аз скорбь творю́ вам, то кто есть веселя́яй мя, то́чию прие́мляй скорбь от мене́? И́бо писа́х вам сие́ и́стое, да не прише́д скорбь на скорбь прииму́, о ни́хже подоба́ше ми ра́доватися, наде́яся на вся вы, я́ко моя́ ра́дость всех вас есть. От печа́ли бо мно́гия и туги́ се́рдца написа́х вам мно́гими слеза́ми, не я́ко да оскорбите́ся, но любо́вь да позна́ете, ю́же и́мам изоби́льно к вам.
Послание к коринфяном второе, зачало 171.
2 Кор 2:3Б–15А
В понедельник 11-я недели.
Бра́тие, моя́ ра́дость всех вас есть. От печа́ли бо мно́гия и туги́ се́рдца написа́х вам мно́гими слеза́ми, не я́ко да оскорбите́ся, но любо́вь да позна́ете, ю́же и́мам изоби́льно к вам. А́ще ли кто оскорби́л мене́, не мене́ оскорби́, но от ча́сти, да не отягчу́, всех вас. Дово́льно бо таково́му запреще́ние сие́, е́же от мно́гих. Те́мже сопроти́вное па́че вам дарова́ти и уте́шити, да не ка́ко мно́гою ско́рбию поже́рт бу́дет таковы́й. Те́мже молю́ вы, утверди́те к нему́ любо́вь. На сие́ бо и писа́х, да разуме́ю иску́сство ва́ше, а́ще во всем послушли́ви есте́. Ему́же а́ще что да́руете, и аз, и́бо аз а́ще что дарова́х, ему́же дарова́х, вас ра́ди, о лице́ Иису́с Христо́ве, да не оби́дими бу́дем от сатаны́, не не разумева́ем бо умышле́ний его́. Прише́д же в Троа́ду во благове́стие Христо́во, и две́ри отве́рзене ми бы́вшей о Го́споде, не име́х поко́я ду́ху моему́, не обре́тшу ми Ти́та бра́та моего́, но отре́кся им, изыдо́х в Македо́нию. Бо́гу же благодаре́ние, всегда́ победи́тели нас творя́щему о Христе́ Иису́се и воню́ ра́зума Его́ явля́ющу на́ми во вся́ком ме́сте. Я́ко Христо́во благоуха́ние есмы́ Бо́гови.
Послание к коринфяном второе, зачало 172.
2 Кор 2:14–3:3
Во вторник 11-я недели.
Бра́тие, Бо́гу благодаре́ние, всегда́ победи́тели нас творя́щему о Христе́ Иису́се и воню́ ра́зума Его́ явля́ющу на́ми во вся́ком ме́сте. Я́ко Христо́во благоуха́ние есмы́ Бо́гови в спаса́емых и в погиба́ющих. О́вем у́бо воня́ сме́ртная в смерть, о́вем же воня́ живо́тная в живо́т. И к сим кто дово́лен? Не́смы бо, я́коже мно́зи, нечи́сто пропове́дающии сло́во Бо́жие, но я́ко от чистоты́, но я́ко от Бо́га, пред Бо́гом, во Христе́ глаго́лем. Зачина́ем ли па́ки нас саме́х извещава́ти вам? Или́ тре́буем, я́коже не́цыи, извещава́тельных посла́ний к вам, или́ от вас извести́тельных? Посла́ние бо на́ше вы есте́, напи́саное в сердца́х на́ших, зна́емое и прочита́емое от всех челове́к. Явля́еми, я́ко есте́ посла́ние Христо́во слу́женое на́ми, напи́сано не черни́лом, но Ду́хом Бо́га жи́ва, не на скрижа́лех ка́менных, но на скрижа́лех се́рдца пло́тяных.
Послание к коринфяном второе, зачало 173.
2 Кор 3:4–11
В среду 11-я недели.
Сие же и святому Убрусу.
Бра́тие, наде́яние таково́ и́мамы Христо́м к Бо́гу, не я́ко дово́льни есмы́ от себе́ помы́слити что, я́ко от себе́, но дово́льство на́ше от Бо́га. И́же и удово́ли нас служи́тели бы́ти Но́ву Заве́ту, не пи́смени, но ду́ху: писмя́ бо убива́ет, а дух животвори́т. А́ще ли служе́ние сме́рти писмены́, образова́но в ка́менех, бысть в сла́ву, я́ко не мощи́ взира́ти сыно́м Изра́илевым на лице́ Моисе́ово, сла́вы ра́ди ли́ца его́ престаю́щия. Ка́ко не мно́жае па́че служе́ние ду́ха бу́дет в сла́ве? А́ще бо служе́ние осужде́ния, сла́ва, мно́го па́че избы́точествует служе́ние пра́вды в сла́ве. И́бо не просла́вися просла́вленное в ча́сти сей, за превосходя́щую сла́ву. А́ще бо престаю́щее, сла́вою, мно́го па́че пребыва́ющее, в сла́ве.
Послание к коринфяном второе, зачало 174.
2 Кор 3:12–18
В субботу 21-ю.
Бра́тие, иму́ще таково́ упова́ние, мно́гим дерзнове́нием де́йствуем, и не я́коже Моисе́й полага́ше покрыва́ло на лице́ свое́м, за е́же не мощи́ взира́ти сыно́м Изра́илевым на коне́ц престаю́щаго. Но ослепи́шася помышле́ния их: да́же бо до сего́ дне то́жде покрыва́ло во чте́нии Ве́тхаго Заве́та пребыва́ет не открове́но, зане́ о Христе́ престае́т. Но да́же до днесь, внегда́ чте́тся Моисе́й, покрыва́ло на се́рдце их лежи́т, внегда́ же обратя́тся ко Го́споду, взима́ется покрыва́ло. Госпо́дь же Дух есть, а иде́же Дух Госпо́день, ту свобо́да. Мы же вси открове́нным лице́м сла́ву Госпо́дню взира́юще, в то́йже о́браз преобразу́емся от сла́вы в сла́ву, я́коже от Госпо́дня Ду́ха.
Послание к коринфяном второе, зачало 175.
2 Кор 4:1–6
В четверток 11-я недели.
Бра́тие, иму́ще служе́ние сие́, я́коже поми́ловани бы́хом, не стужа́ем си. Но отреко́хомся та́йных сра́ма, не в лука́вствии ходя́ще, ни льстя́ще словесе́ Бо́жия, но явле́нием и́стины представля́юще себе́ ко вся́кой со́вести челове́честей, пред Бо́гом. А́ще ли же есть покрове́но благовествова́ние на́ше, в ги́бнущих есть покрове́но, в ни́хже бог ве́ка сего́ ослепи́ ра́зумы неве́рных, во е́же не возсия́ти им све́ту благовествова́ния сла́вы Христо́вы, И́же есть о́браз Бо́га неви́димаго. Не себе́ бо пропове́даем, но Христа́ Иису́са Го́спода, себе́ же саме́х рабы́ вам Иису́са Го́спода ра́ди. Я́ко Бог реки́й из тмы све́ту возсия́ти, и́же возсия́ в сердца́х на́ших, к просвеще́нию ра́зума сла́вы Бо́жия о лице́ Иису́с Христо́ве.
Послание к коринфяном второе, зачало 176.
2 Кор 4:6–15
Неделя 15-я.
Сие же и преподобным.
Бра́тие, Бог реки́й из тмы све́ту возсия́ти, и́же возсия́ в сердца́х на́ших, к просвеще́нию ра́зума сла́вы Бо́жия о лице́ Иису́с Христо́ве. И́мамы же сокро́вище сие́ в скуде́льных сосу́дех, да премно́жество си́лы бу́дет Бо́жия, а не от нас. Во всем скорбя́ще, но не стужа́юще си, неча́еми, но не отчаява́еми, гони́ми, но не оставля́еми, низлага́еми, но не погиба́юще. Всегда́ ме́ртвость Го́спода Иису́са в те́ле нося́ще, да и живо́т Иису́сов в те́ле на́шем яви́тся. При́сно бо мы живи́и в смерть предае́мся Иису́са ра́ди, да и живо́т Иису́сов яви́тся в ме́ртвенней пло́ти на́шей. Те́мже смерть у́бо в нас де́йствует, а живо́т в вас. Иму́ще же то́йже дух ве́ры, по пи́санному: ве́ровах, те́мже возглаго́лах, и мы ве́руем, те́мже и глаго́лем, ве́дяще, я́ко Воздви́гий Го́спода Иису́са, и нас со Иису́сом воздви́гнет, и предпоста́вит с ва́ми. Вся бо вас ра́ди, да благода́ть умно́жившаяся, мно́жайшими благодаре́нии избы́точествит в сла́ву Бо́жию.
Послание к коринфяном второе, зачало 177.
2 Кор 4:13–18
В пяток 11-я недели.
Бра́тие, иму́ще то́йже дух ве́ры, по пи́санному: ве́ровах, те́мже возглаго́лах, и мы ве́руем, те́мже и глаго́лем, ве́дяще, я́ко Воздви́гий Го́спода Иису́са, и нас со Иису́сом воздви́гнет, и предпоста́вит с ва́ми. Вся бо вас ра́ди, да благода́ть умно́жившаяся, мно́жайшими благодаре́нии избы́точествит в сла́ву Бо́жию. Те́мже не стужа́ем си, но а́ще и вне́шний наш челове́к тле́ет, но вну́тренний обновля́ется по вся дни. Е́же бо ны́не ле́гкое печа́ли на́шея, по преумноже́нию в преспе́яние тяготу́ ве́чныя сла́вы соде́ловает нам. Не смотря́ющым нам ви́димых, но неви́димых: ви́димая бо вре́менна, неви́димая же ве́чна.
Послание к коринфяном второе, зачало 178.
2 Кор 5:1–10А
В субботу 22-ю.
Сие же и в среду усопшим.
Бра́тие, ве́мы я́ко а́ще земна́я на́ша хра́мина те́ла разори́тся, созда́ние от Бо́га и́мамы, хра́мину нерукотворе́ну, ве́чну на небесе́х. И́бо о сем воздыха́ем, в жили́ще на́ше небе́сное облещи́ся жела́юще, а́ще и обле́кшеся, не на́зи обря́щемся. И́бо су́щии в те́ле сем воздыха́ем отягча́еми, поне́же не хо́щем совлещи́ся, но пооблещи́ся, да поже́рто бу́дет ме́ртвенное живото́м. Сотвори́вый же нас в сие́ и́стое Бог, И́же и даде́ нам обруче́ние Ду́ха. Дерза́юще у́бо всегда́ и ве́дяще, я́ко живу́ще в те́ле отхо́дим от Го́спода: ве́рою бо хо́дим, а не виде́нием. Дерза́ем же и благоволи́м па́че отити́ от те́ла и вни́ти ко Го́споду. Те́мже и тщи́мся, а́ще входя́ще, а́ще отходя́ще, благоуго́дни Ему́ бы́ти. Всем бо яви́тися нам подоба́ет пред суди́щем Христо́вым.
Послание к коринфяном второе, зачало 179.
2 Кор 5:10–15
В понедельник 12-я недели.
Бра́тие, всем нам яви́тися подоба́ет пред суди́щем Христо́вым, да прии́мет ко́ждо, я́же с те́лом соде́ла, или́ бла́га, или́ зла. Ве́дуще у́бо страх Госпо́день, челове́ки увещава́ем, Бо́гови же явле́ни бы́хом, упова́ем же, я́ко и в со́вестех ва́ших явле́ни есмы́. Не па́ки бо себе́ хва́лим пред ва́ми, но вину́ дае́м вам похвале́нию по нас, да и́мате к хва́лящымся в лице́, а не в се́рдцы. А́ще бо изуми́хомся, Бо́гови, а́ще ли целому́дрствуем, вам. И́бо любы́ Бо́жия содержи́т нас, су́ждших сие́: я́ко а́ще Еди́н за всех у́мре, то у́бо вси умро́ша. Христо́с же за вся у́мре, да живу́щии не ктому́ себе́ живу́т, но уме́ршему за них и воскре́сшему.
Послание к коринфяном второе, зачало 180.
2 Кор 5:15–21
Во вторник 12-я недели.
Бра́тие, Христо́с за вся у́мре, да живу́щии не ктому́ себе́ живу́т, но уме́ршему за них и воскре́сшему. Те́мже и мы отны́не ни еди́наго ве́мы по пло́ти, а́ще же и разуме́хом по пло́ти Христа́, но ны́не ктому́ не разуме́ем. Те́мже а́ще ка́я о Христе́, нова́ тварь: дре́вняя мимоидо́ша, се бы́ша вся нова́. Вся́ческая же от Бо́га, примири́вшаго нас Себе́ Иису́с Христо́м и да́вшаго нам служе́ние примире́ния. Зане́ Бог бе во Христе́ мир примиря́я Себе́, не вменя́я им согреше́ний их и положи́в в нас сло́во примире́ния. По Христе́ у́бо мо́лим, я́ко Бо́гу моля́щу на́ми, мо́лимся у́бо по Христе́, примири́теся с Бо́гом. Не ве́девшаго бо греха́ по нас грех сотвори́, да мы бу́дем пра́вда Бо́жия о Нем.
Послание к коринфяном второе, зачало 181.
2 Кор 6:1–10
Неделя 16-я.
Сие же и мученицам.
Бра́тие, поспе́шствующе мо́лим, не вотще́ благода́ть Бо́жию прия́ти вам. Глаго́лет бо: во вре́мя прия́тно послу́шах тебе́, и в день спасе́ния помого́х ти. Се ны́не вре́мя благоприя́тно, се ны́не день спасе́ния. Ни еди́но ни в че́мже даю́ще претыка́ние, да служе́ние безпоро́чно бу́дет, но во всем представля́юще себе́ я́коже Бо́жия слуги́, в терпе́нии мно́зе, в ско́рбех, в беда́х, в теснота́х, в ра́нах, в темни́цах, в нестрое́ниих, в труде́х, во бде́ниих, в поще́ниих, во очище́нии, в ра́зуме, в долготерпе́нии, в бла́гости, в Ду́се Свя́те, в любви́ нелицеме́рне, в словеси́ и́стины, в си́ле Бо́жией, ору́жии пра́вды десны́ми и шу́ими, сла́вою и безче́стием, гажде́нием и благохвале́нием, я́ко лестцы́, и и́стинни, я́ко незна́еми, и познава́еми, я́ко умира́юще, и се жи́ви есмы́, я́ко наказу́еми, а не умерщвля́еми, я́ко скорбя́ще, при́сно же ра́дующеся, я́ко ни́щи, а мно́гих богатя́ще, я́ко ничто́же иму́ще, а вся содержа́ще.
Послание к коринфяном второе, зачало 182.
2 Кор 6:11–16А
В среду 12-я недели.
Бра́тие, уста́ на́ша отверзо́шася к вам, Кори́нфяне, се́рдце на́ше распространи́ся. Не те́сно вмеща́етеся в нас, утесня́етеся же во утро́бах ва́ших. То́жде возме́здие, я́коже ча́дом глаго́лю, распространи́теся и вы. Не быва́йте удо́бь прело́жни ко ино́му ярму́, я́коже неве́рнии. Ко́е бо прича́стие пра́вде к беззако́нию? Или́ ко́е обще́ние све́ту ко тьме? Ко́е же согла́сие Христо́ви с велиа́ром? Или́ ка́я часть ве́рну с неве́рным? Или́ ко́е сложе́ние це́ркви Бо́жией со и́долы? Вы бо есте́ це́ркви Бо́га жи́ва, я́коже рече́ Бог.
Послание к коринфяном второе, зачало 182: от полу́.
2 Кор 6:16Б–7:1
Неделя 17-я.
Бра́тие, вы есте́ Це́ркви Бо́га Жи́ва, я́коже рече́ Бог, я́ко вселю́ся в них и похожду́, и бу́ду им Бог, и ти́и бу́дут Мне лю́дие. Те́мже изыди́те от среды́ их, и отлучи́теся, глаго́лет Госпо́дь, и нечистоте́ не прикаса́йтеся, и Аз прииму́ вы. И бу́ду вам во Отца́, и вы бу́дете Мне в сы́ны и дще́ри, глаго́лет Госпо́дь Вседержи́тель. Сицева́ у́бо иму́ще обетова́ния, о возлю́бленнии, очи́стим себе́ от вся́кия скве́рны пло́ти и ду́ха, творя́ще святы́ню в стра́се Бо́жии.
Послание к коринфяном второе, зачало 183.
2 Кор 7:1Б–10А
Четверток 12-я недели.
Бра́тие, очи́стим себе́ от вся́кия скве́рны пло́ти и ду́ха, творя́ще святы́ню в стра́се Бо́жии. Вмести́те ны: ни еди́наго оби́дехом, ни еди́наго истли́хом, ни еди́наго лихои́мствовахом. Не на осужде́ние глаго́лю, пре́жде бо рех, я́ко в сердца́х на́ших есте́, во е́же умре́ти с ва́ми и сожи́ти. Мно́го ми дерзнове́ние к вам, мно́га ми похвала́ по вас, испо́лнихся уте́хи, преизбы́точествую ра́достию о вся́кой печа́ли на́шей. И́бо прише́дшым нам в Македо́нию, ни еди́наго име́ поко́я плоть на́ша, но во всем скорбя́ще: внеу́ду бра́ни, внутрью́ду боя́зни. Но утеша́яй смире́нныя, уте́ши нас Бог прише́ствием Ти́товым, не то́кмо же прише́ствием его́, но и утеше́нием, и́мже уте́шися о вас, пове́дая нам ва́ше жела́ние, ва́ше рыда́ние, ва́шу ре́вность по мне, я́ко ми па́че возра́доватися. Я́ко а́ще и оскорби́х вас посла́нием, не раска́юся, а́ще и раска́ял бых ся. Ви́жду бо, я́ко посла́ние о́но, а́ще и в час, оскорби́ вас. Ны́не ра́дуюся, не я́ко ско́рбни бы́сте, но я́ко оскорби́стеся в покая́ние: оскорбе́сте бо по Бо́зе, да ни о еди́ном отщетите́ся от нас. Печа́ль бо, я́же по Бо́зе, покая́ние нераска́янно во спасе́ние соде́ловает.
Послание к коринфяном второе, зачало 184.
2 Кор 7:10–16
Пяток 12-я недели.
Бра́тие, печа́ль я́же по Бо́зе, покая́ние нераска́янно во спасе́ние соде́ловает, а сего́ ми́ра печа́ль смерть соде́ловает. Се бо сие́ са́мое, е́же по Бо́зе оскорби́тися вам, коли́ко соде́ла в вас тща́ние? Но отве́т, но негодова́ние, но страх, но вожделе́ние, но ре́вность, но отмще́ние? Во всем предста́висте себе́ чи́сты бы́ти в ве́щи. А́ще бо и писа́х вам, не оби́девшаго ра́ди, ниже́ оби́димаго ра́ди, но за е́же яви́тися в вас тща́нию на́шему, е́же о вас пред Бо́гом. Сего́ ра́ди уте́шихомся о утеше́нии ва́шем: ли́шше же па́че возра́довахомся о ра́дости Ти́тове, я́ко поко́ися дух его́ от всех вас. Я́ко а́ще что ему́ о вас похвали́хся, не посрами́хся, но я́ко вся вои́стинну глаго́лахом вам, та́ко и похвале́ние на́ше, е́же к Ти́ту, и́стинно бысть. И утро́ба его́ и́злиха к вам есть, воспомина́ющаго всех вас послуша́ние, я́ко со стра́хом и тре́петом прия́сте его́. Ра́дуюся у́бо, я́ко во всем дерза́ю в вас.
Послание к коринфяном второе, зачало 185.
2 Кор 8:1–5
Суббота 23-я.
Бра́тие, сказу́ю вам благода́ть Бо́жию, да́нную в це́рквах Македо́нских, я́ко во мно́зем искуше́нии скорбе́й избы́ток ра́дости их, и я́же во глубине́ нищета́ их избы́точествова в бога́тство простоты́ их. Я́ко по си́ле их, свиде́тельствую, и па́че си́лы доброхо́тни, со мно́гим моле́нием моля́ще нас, благода́ть и обще́ние служе́ния, е́же во святы́х, прия́ти нам. И не я́коже наде́яхомся, но себе́ вда́ша пе́рвее Го́сподеви, и нам во́лею Бо́жиею.
Послание к коринфяном второе, зачало 186.
2 Кор 8:7–15
Понедельник 13-я недели.
Бра́тие, я́ко во всем избы́точествуете, ве́рою и сло́вом, и ра́зумом, и вся́цем тща́нием, и любо́вию, я́же от вас к нам, да и в сей благода́ти избы́точествуете. Не по повеле́нию глаго́лю, но за ины́х тща́ние и ва́шея любве́ и́стинное искуша́я. Ве́сте бо благода́ть Го́спода на́шего Иису́са Христа́, я́ко вас ра́ди обнища́ бога́т сый, да вы нището́ю Его́ обогатите́ся. И сове́т даю́ о сем: се бо вам есть на по́льзу, и́же не то́чию, е́же твори́ти, но и е́же хоте́ти, пре́жде нача́сте от преше́дшаго ле́та. Ны́не же и е́же твори́ти сконча́йте, да я́коже бысть усе́рдие хоте́ти, та́ко да бу́дет и испо́лнити от е́же име́ти. А́ще бо усе́рдие предлежи́т, по ели́ку а́ще кто и́мать, благоприя́тен есть, а не по ели́ку не и́мать. Не бо да ины́м у́бо отра́да, вам же скорбь, но от изравне́ния. В ны́нешнее вре́мя ва́ше избы́точествие во о́нех лише́ние, да и о́нех избы́ток бу́дет в ва́ше лише́ние, я́ко да бу́дет ра́венство, я́коже есть пи́сано: и́же мно́гое не преумно́жил есть, и и́же ма́лое не ума́лил.
Послание к коринфяном второе, зачало 187.
2 Кор 8:16–9:5
Вторник 13-я недели.
Бра́тие, благодаре́ние Бо́гови, да́вшему то́жде тща́ние о вас в се́рдце Ти́тово, я́ко моле́ние у́бо прия́т, тщали́вейший же сый, свое́ю во́лею изы́де к вам. Посла́хом же с ним и бра́та, его́же похвала́ во Ева́нгелии по всем це́рквам. Не то́чию же, но и освя́щся от церкве́й с на́ми ходи́ти, со благода́тию се́ю, служи́мою на́ми к Самого́ Го́спода сла́ве и усе́рдию ва́шему, блюду́щеся того́, да не кто нас порече́т во оби́лии сем служи́мем на́ми, промышля́юще до́брая не то́кмо пред Бо́гом, но и пред челове́ки. Посла́хом же с ни́ми и бра́та на́шего, его́же искуси́хом во мно́гих мно́гащи встанли́ва су́ща, ны́не же зело́ встанли́вейша, наде́янием мно́гим е́же в вас. А́ще ли же о Ти́те, о́бщник мне и в вас поспе́шник, а́ще ли бра́тия на́ша, посла́нницы церкве́й, сла́ва Христо́ва. Показа́ние у́бо любве́ ва́шея и на́шего хвале́ния о вас, в них покажи́те, в лице́ церкве́й. О слу́жбе бо, я́же ко святы́м, ли́шше ми есть писа́ти вам, вем бо усе́рдие ва́ше, и́мже о вас хвалю́ся Македо́няном, я́ко Аха́иа пригото́вися от мимоше́дшаго ле́та, и я́же от вас ре́вность раздражи́ мно́жайших. Посла́х же бра́тию, да не похвале́ние на́ше, е́же о вас, испра́зднится в ча́сти сей, но да я́коже глаго́лах, пригото́вани бу́дете. Да не ка́ко, а́ще прии́дут со мно́ю Македо́няне и обря́щут вы не пригото́ванных, постыди́мся мы, да не глаго́лем вы, в ча́сти сей похвале́ния. Потре́бно у́бо умы́слих умоли́ти бра́тию, да пре́жде прии́дут к вам и предугото́вят пре́жде возвеще́нное благослове́ние ва́ше, сие́ гото́во бы́ти та́ко, я́коже благослове́ние, а не я́ко лихои́мство.
Послание к коринфяном второе, зачало 188.
2 Кор 9:6–11
Неделя 18-я.
Бра́тие, се́яй ску́достию, ску́достию и по́жнет, а се́яй о благослове́нии, о благослове́нии и по́жнет. Ко́ждо я́коже изволе́ние и́мать се́рдцем, не от ско́рби, ни от ну́жды: доброхо́тна бо да́теля лю́бит Бог. Си́лен же Бог вся́ку благода́ть изоби́ловати в вас, да о всем всегда́ вся́ко дово́льство иму́ще, избы́точествуете во вся́ко де́ло бла́го, я́коже есть пи́сано: расточи́, даде́ убо́гим, пра́вда его́ пребыва́ет во ве́ки. Дая́й же се́мя се́ющему и хлеб в снедь, да пода́ст и умно́жит се́мя ва́ше, и да возрасти́т жи́та пра́вды ва́шея, да о всем богатя́щеся во вся́ку простоту́, я́же содева́ет на́ми благодаре́ние Бо́гу.
Послание к коринфяном второе, зачало 189.
2 Кор 9:12–10:7
Среда 13-я недели.
Бра́тие, рабо́та сего́ служе́ния не то́кмо есть исполня́ющая лише́ния святы́х, но и избы́точествующая мно́гими благодаре́ньми Бо́гови. Искуше́нием служе́ния сего́ сла́вяще Бо́га о покоре́нии испове́дания ва́шего в Благовествова́нии Христо́во, и о простоте́ сообще́ния к ним и ко всем, и тех моли́твою по вас, возжеле́ющим вас за премно́гую благода́ть Бо́жию на вас. Благодаре́ние же Бо́гови о неисповеди́мем Его́ да́ре. Сам же аз Па́вел молю́ вы кро́тостию и ти́хостию Христо́вою, и́же в лице́ у́бо смире́н в вас, не сый же у вас дерза́ю в вас. Молю́ же е́же не сый ту дерза́ти наде́янием, и́мже помышля́ю сме́ти на не́кия непщу́ющыя нас я́ко по пло́ти ходя́щих. Во пло́ти бо ходя́ще, не по пло́ти во́инствуем: ору́жия бо во́инства на́шего не плотска́я, но си́льна Бо́гови на разоре́ние тве́рдем, помышле́ния низлага́юще, и вся́ко возноше́ние взима́ющееся на ра́зум Бо́жий, и пленя́юще всяк ра́зум в послуша́ние Христо́во, и гото́во иму́ще отмсти́ти вся́ко преслуша́ние, егда́ испо́лнится ва́ше послуша́ние. И́же ли пред лице́м, зри́те? А́ще кто наде́ется себе́ Христо́ва бы́ти, да помышля́ет па́ки от себе́, зане́, я́коже он Христо́в, та́кожде и мы Христо́вы.
Послание к коринфяном второе, зачало 190.
2 Кор 10:7Б–18
Четверток 13-я недели.
Бра́тие, а́ще кто наде́ется себе́ Христо́ва бы́ти, да помышля́ет па́ки от себе́, зане́ я́коже он Христо́в, та́кожде и мы Христо́вы. А́ще бо и ли́шше что похвалю́ся о вла́сти на́шей, ю́же даде́ нам Госпо́дь в созда́ние, а не на разоре́ние ва́ше, не постыжу́ся. Но да не явлю́ся, я́ко страшя́ вас посла́ньми. Я́ко посла́ния у́бо, рече́, тя́жка и кре́пка, а прише́ствие те́ла не́мощно, и сло́во уничиже́нно. Сие́ да помышля́ет таковы́й, я́ко я́цы же есмы́ сло́вом посла́ний, отстоя́ще, такови́и и ту су́ще есмы́ де́лом. Не сме́ем бо суди́ти, или́ прикла́довати себе́ ины́м хва́лящым себе́ саме́х, но са́ми в себе́ себе́ измеря́юще, и прилага́юще себе́, себе́ не разумева́ют. Мы же не в безме́рная похва́лимся, но по ме́ре пра́вила, его́же раздели́ нам Бог ме́ру, достиза́ти да́же и до вас. Не я́ко бо не дося́жуще до вас, па́че простира́ем себе́, да́же бо и до вас достиго́хом благове́стием Христо́вым. Не в безме́рная хва́лящеся, ниже́ в чужди́х труде́х, упова́ние же иму́ще, расту́щей ве́ре ва́шей, в вас велича́тися по пра́вилу на́шему изоби́льно, во е́же и в да́льших вас страна́х благовести́ти, не чужи́м пра́вилом в гото́вая похвали́тися. Хваля́йся же, о Го́споде да хва́лится. Не хваля́й бо себе́ сей иску́сен, но его́же Бог восхваля́ет.
Послание к коринфяном второе, зачало 191.
2 Кор 11:1–6
Суббота 24-я.
Бра́тие, о да бы́сте ма́ло потерпе́ли безу́мию моему́! Но и потерпи́те мя. Ревну́ю бо о вас Бо́жиею ре́вностию: обручи́х бо вас еди́ному му́жу, де́ву чи́сту предста́вити Христо́ви. Бою́ся же, да не ка́ко, я́коже змия́ Е́ву прельсти́ лука́вством свои́м, та́ко истле́ют и ра́зумы ва́ша от простоты́, я́же о Христе́. А́ще бо гряды́й и́наго Иису́са пропове́дает, его́же не пропове́дахом, или́ Ду́ха ина́го прие́млете, его́же не прия́сте, или́ благовествова́ние и́но, е́же не прия́сте, до́бре бы́сте потерпе́ли. Непщу́ю бо ничи́мже лиши́тися пре́дних Апо́стол. А́ще бо и неве́жда сло́вом, но не ра́зумом, но везде́ я́вльшеся о всем в вас.
Послание к коринфяном второе, зачало 192.
2 Кор 11:5–21А
Пяток 13-я недели.
Бра́тие, непщу́ю ничи́мже лиши́тися пре́дних Апо́стол. А́ще бо и неве́жда сло́вом, но не ра́зумом, но везде́ я́вльшеся о всем в вас. Или́ грех сотвори́х себе́ смиря́я, да вы вознесе́теся, я́ко ту́не Бо́жие Благовествова́ние благовести́х вам? От ины́х церкве́й уи́м, прии́м обро́к к ва́шему служе́нию, и прише́д к вам, и в ску́дости быв, не стужи́х ни еди́ному. Ску́дость бо мою́ испо́лниша бра́тия, прише́дше от Македо́нии, и во всем без стуже́ния вам себе́ соблюдо́х и соблюду́. Есть и́стина Христо́ва во мне, я́ко похвале́ние сие́ не загради́тся о мне в страна́х Аха́йстех. Почто́? Зане́ не люблю́ ли вас? Бог весть. А е́же творю́, и сотворю́, да отсеку́ вину́ хотя́щым вины́, да о не́мже хва́лятся, обря́щутся я́коже и мы. Такови́и бо лжи́ви апо́столи, де́лателе льсти́вии, преобразу́ющеся во Апо́столы Христо́вы. И не ди́вно: сам бо сатана́ преобразу́ется во А́нгела све́тла. Не ве́лие у́бо, а́ще и служи́телие его́ преобразу́ются я́ко служи́тели пра́вды, и́мже кончи́на бу́дет по дело́м их. Па́ки глаго́лю, да никто́же мнит мя безу́мна бы́ти, а́ще ли ни, поне́ я́ко безу́мна приими́те мя, да и аз ма́ло что похвалю́ся. А е́же глаго́лю, не глаго́лю по Го́споде, но я́ко в безу́мии в сей ча́сти похвалы́. Поне́же мно́зи хва́лятся по пло́ти, и аз похвалю́ся. Любе́зно бо прие́млете безу́мныя, му́дри су́ще. Прие́млете бо, а́ще кто вас порабоща́ет, а́ще кто пояда́ет, а́ще кто не вле́поту прото́рит, а́ще кто по лицу́ бие́т вы, а́ще кто велича́ется. По досажде́нию глаго́лю, зане́ а́ки мы изнемого́хом.
Послание к коринфяном второе, зачало 193.
2 Кор 11:21Б–12:9
Иуниа 29, святым Апостолом.
Бра́тие, о не́мже а́ще дерза́ет кто, несмы́сленно глаго́лю, дерза́ю и аз. Евре́и ли суть? И аз. Изра́ильте ли суть? И аз. Се́мя Авраа́мле ли суть? И аз. Служи́телие ли Христо́вы суть? Не в му́дрости глаго́лю, па́че аз. В труде́х мно́жае, в ра́нах пребо́ле, в темни́цах и́злиха, в сме́ртех мно́гащи. От иуде́й пятькра́ты четы́ридесять, ра́зве еди́ныя, прия́х. Три́щи па́лицами бие́н бых, еди́ною ка́меньми наме́тан бых; трикра́ты кора́бль опрове́ржеся со мно́ю; нощь и день во глубине́ сотвори́х. В пу́тных ше́ствиих мно́жицею: беды́ в река́х, беды́ от разбо́йник, беды́ от сро́дник, беды́ от язы́к, беды́ во граде́х, беды́ в пусты́ни, беды́ в мо́ри, беды́ во лжебра́тии. В труде́ и по́двизе, во бде́ниих мно́жицею, во а́лчбе и жа́жди, в поще́ниих мно́гащи, в зиме́ и наготе́. Кроме́ вне́шних, нападе́ние е́же по вся дни, и попече́ние всех церкве́й. Кто изнемога́ет, и не изнемога́ю; кто соблазня́ется, и аз не разжиза́юся? А́ще хвали́тися ми подоба́ет, я́же о не́мощи мое́й похвалю́ся. Бог и Оте́ц Го́спода на́шего Иису́са Христа́ весть, Сый благослове́н во ве́ки, я́ко не лгу. В Дама́сце язы́ческий князь Аре́фы царя́ стрежа́ше Дама́ск град, я́ти мя хотя́, и око́нцем в ко́шнице све́шен бых по стене́, и избего́х из руку́ его́. Похвали́тися же не по́льзует ми: прииду́ бо в виде́ния и открове́ния Госпо́дня. Вем челове́ка о Христе́, пре́жде лет четырина́десяти, а́ще в те́ле, не вем, а́ще ли кроме́ те́ла, не вем, Бог весть, восхище́на бы́вша такова́го до тре́тияго Небесе́. И вем такова́ челове́ка, а́ще в те́ле, или́ кроме́ те́ла, не вем, Бог весть, я́ко восхище́н бысть в рай, и слы́ша неизрече́нны глаго́лы, и́хже не леть есть челове́ку глаго́лати. О такове́м похвалю́ся, о себе́ же не похвалю́ся, то́кмо о не́мощех мои́х. А́ще бо восхощу́ похвали́тися, не бу́ду безу́мен, и́стину бо реку́, щажду́ же, да не ка́ко кто вознепщу́ет о мне па́че, е́же ви́дит мя, или́ слы́шит что от мене́. И за премно́гая открове́ния да не превозношу́ся, даде́ся ми па́костник пло́ти, а́ггел сатани́н, да ми па́кости де́ет, да не превозношу́ся. О сем трикра́ты Го́спода моли́х, да и отсту́пит от мене́. И рече́ ми: довле́ет ти благода́ть Моя́, си́ла бо Моя́ в не́мощи соверша́ется. Сла́дце у́бо похвалю́ся па́че в не́мощех мои́х, да всели́тся в мя си́ла Христо́ва.
Послание к коринфяном второе, зачало 194.
2 Кор 11:31–12:9
Неделя 19-я.
Бра́тие, Бог и Оте́ц Го́спода на́шего Иису́са Христа́ весть, сый благослове́н во ве́ки, я́ко не лгу. В Дама́сце язы́ческий князь Аре́фы царя́ стрежа́ше Дама́ск град, я́ти мя хотя́, и око́нцем в ко́шнице све́шен бых по стене́, и избего́х из руку́ его́. Похвали́тися же не по́льзует ми: прииду́ бо в виде́ния и открове́ния Госпо́дня. Вем челове́ка о Христе́, пре́жде лет четырина́десяти, а́ще в те́ле, не вем, а́ще ли кроме́ те́ла, не вем, Бог весть, восхище́на бы́вша такова́го до тре́тияго небесе́. И вем такова́ челове́ка, а́ще в те́ле, или́ кроме́ те́ла, не вем, Бог весть, я́ко восхище́н бысть в рай, и слы́ша неизрече́нны глаго́лы, и́хже не леть есть челове́ку глаго́лати. О такове́м похвалю́ся, о себе́ же не похвалю́ся, то́кмо о не́мощех мои́х. А́ще бо восхощу́ похвали́тися, не бу́ду безу́мен, и́стину бо реку́: щажду́ же, да не ка́ко кто вознепщу́ет о мне па́че, е́же ви́дит мя, или́ слы́шит что от мене́. И за премно́гая открове́ния да не превозношу́ся, даде́ся ми па́костник пло́ти, а́ггел сатани́н, да ми па́кости де́ет, да не превозношу́ся. О сем трикра́ты Го́спода моли́х, да и отсту́пит от мене́, и рече́ ми: довле́ет ти благода́ть Моя́, си́ла бо Моя́ в не́мощи соверша́ется. Сла́дце у́бо похвалю́ся па́че в не́мощех мои́х, да всели́тся в мя си́ла Христо́ва.
Послание к коринфяном второе, зачало 195.
2 Кор 12:10–19
Понедельник 14-я недели.
Бра́тие, благоволю́ в не́мощех, в досажде́ниих, в беда́х, во изгна́ниих, в теснота́х по Христе́: егда́ бо немощству́ю, тогда́ си́лен есмь. Бых несмы́слен хваля́ся, вы мя пону́дисте. Аз бо до́лжен бех от вас хвали́мь быва́ти, ничи́мже бо лиши́хся пе́рвейших Апо́стол, а́ще и ничто́же есмь. Зна́мения бо Апо́столова соде́яшася в вас во вся́ком терпе́нии, в зна́мениих и чудесе́х и си́лах. Что бо есть, его́же лиши́стеся па́че про́чих це́рквей, а́ще то́чию я́ко аз сам не стужи́х вам? Дади́те ми непра́вду сию́. Се тре́тие гото́в есмь приити́ к вам, и не стужу́ вам: не ищу́ бо ва́ших, но вас. Не до́лжна бо суть ча́да роди́телем сниска́ти име́ния, но роди́тели ча́дом. Аз же в сла́дость иждиву́ и иждиве́н бу́ду по душа́х ва́ших, а́ще и изли́шше вас любя́, ме́ньши люби́мь есмь. Бу́ди же, аз не отягчи́х вас, но кова́рен сый, ле́стию вас прия́х. Еда́ ко́им от по́сланных к вам лихои́мствовах вас? Умоли́х Ти́та, и с ним посла́х бра́та, еда́ лихои́мствова чим вас Тит? Не те́мже ли ду́хом ходи́хом? Не те́ми же ли стопа́ми? Па́ки ли мните́, я́ко отве́т вам твори́м? Пред Бо́гом, о Христе́ глаго́лем: вся же, возлю́бленнии, о ва́шем созда́нии и утвержде́нии.
Послание к коринфяном второе, зачало 196.
2 Кор 12:20–13:2
Во вторник 14-я недели.
Бра́тие, бою́ся, еда́ ка́ко прише́д, не я́цех же хощу́, обря́щу вас, и аз обря́щуся вам, якова́ же не хо́щете: да не ка́ко бу́дут рве́ния, за́висти, я́рости, ре́ти, клеветы́, шепта́ния, киче́ния, нестрое́ния. Да не па́ки прише́дша мя смири́т Бог мой у вас, и воспла́чуся мно́гих пре́жде согре́шших и не пока́явшихся о нечистоте́ и блуже́нии и студоло́жствии, я́же соде́яша. Трети́цею се гряду́ к вам: при усте́х двою́ или́ трие́х свиде́телей ста́нет всяк глаго́л. Пре́жде рех и предглаго́лю, я́ко у вас быв второ́е, и не сый ны́не пишу́ пре́жде согре́шшым и про́чым всем, я́ко а́ще прииду́ па́ки, не пощажу́.
Послание к коринфяном второе, зачало 197.
2 Кор 13:3–13
В среду 14-я недели.
Бра́тие, поне́же искуше́ния и́щете глаго́лющаго во мне Христа́, И́же в вас не изнемога́ет, но мо́жет в вас. И́бо а́ще и ра́спят бысть от не́мощи, но жив есть от си́лы Бо́жия, и́бо и мы немощству́ем в Нем, но жи́ви бу́дем с Ним от си́лы Бо́жия в вас. Себе́ искуша́йте, а́ще есте́ в ве́ре: себе́ искуша́йте. Или́ не зна́ете себе́, я́ко Иису́с Христо́с в вас есть? А́ще то́чию чим неиску́сни есте́. Упова́ю же, я́ко разуме́ти и́мате, я́ко мы не́смы неиску́сни. Мо́лимся же к Бо́гу, не сотвори́ти вам ни еди́наго зла, не я́ко да мы иску́сни яви́мся, но да вы до́брое сотворите́, мы же я́ко неиску́сни бу́дем. Ничто́же бо мо́жем на и́стину, но по и́стине. Ра́дуемся бо, егда́ мы немощству́ем, вы же си́льни быва́ете, се бо и мо́лимся, о ва́шем соверше́нии. Сего́ ра́ди не сый у вас сия́ пишу́, да не прише́д безща́дно сотворю́ по вла́сти, ю́же Госпо́дь дал ми есть в созда́ние, а не на разоре́ние. Про́чее же, бра́тие, ра́дуйтеся, соверша́йтеся, утеша́йтеся, то́жде му́дрствуйте, мир име́йте. И Бог любве́ и ми́ра бу́дет с ва́ми. Целу́йте друг дру́га лобза́нием святы́м. Целу́ют вы святи́и вси. Благода́ть Го́спода на́шего Иису́са Христа́, и любы́ Бо́га и Отца́, и обще́ние Свята́го Ду́ха со все́ми ва́ми. Ами́нь.