Апостол
Соборное Послание Первое Святаго Апостола Иоанна Богослова.
Зачало: 68 69 70 71 72 73 паремия 1 73 паремия 2 73 от полу́ 74 73 паремия 3
Соборное послание Иоаннова первое, зачало 68.
1 Ин 1:1–7
Месяца маиа в 8-й день.
Е́же бе испе́рва, е́же слы́шахом, е́же ви́дехом очи́ма на́шима, е́же узре́хом, и ру́ки на́ша осяза́ша, о Словеси́ Живо́тнем. И Живо́т яви́ся, и ви́дехом, и свиде́тельствуем, и возвеща́ем вам Живо́т ве́чный, И́же бе у Отца́, и яви́ся нам. Е́же ви́дехом и слы́шахом, пове́даем вам, да и вы обще́ние и́мате с на́ми: обще́ние же на́ше со Отце́м и с Сы́ном Его́ Иису́сом Христо́м. И сия́ пи́шем вам, да ра́дость ва́ша бу́дет испо́лнена. И сие́ есть обетова́ние, е́же слы́шахом от Него́, и пове́даем вам, я́ко Бог Свет есть, и тмы в Нем несть ни еди́ныя. А́ще рече́м, я́ко обще́ние и́мамы с Ним, и во тме хо́дим, лжем и не твори́м и́стины. А́ще ли же во све́те хо́дим, я́коже Сам Той есть во све́те, обще́ние и́мамы друг ко дру́гу, и кровь Иису́са Христа́ Сы́на Его́ очища́ет нас от вся́каго греха́.
Соборное послание Иоаннова первое, зачало 69.
1 Ин 1:8–2:6
В четверток 34-я недели.
Возлю́бленнии, а́ще рече́м, я́ко греха́ не и́мамы, себе́ прельща́ем, и и́стины несть в нас. А́ще испове́даем грехи́ на́ша, ве́рен есть и пра́веден да оста́вит нам грехи́ на́ша и очи́стит нас от вся́кия непра́вды. А́ще рече́м, я́ко не согреши́хом, лжа твори́м Его́, и сло́во Его́ несть в нас. Ча́дца моя́, сия́ пишу́ вам, да не согреша́ете, и а́ще кто согреши́т, хода́тая и́мамы ко Отцу́, Иису́са Христа́ Пра́ведника. И Той очище́ние есть о гресе́х на́ших, не о на́ших же то́чию, но и о всего́ ми́ра. И о сем разуме́ем, я́ко позна́хом Его́, а́ще за́поведи Его́ соблюда́ем. Глаго́ляй, я́ко позна́х Его́, и за́поведи Его́ не соблюда́ет, ложь есть, и в сем и́стины несть. И́же бо а́ще блюде́т сло́во Его́, пои́стинне в сем любы́ Бо́жия соверше́нна есть. О сем разуме́ем, я́ко в Нем есмы́. Глаго́ляй, в Нем пребыва́ти, до́лжен есть, я́коже Он ходи́л есть, и сей та́кожде да хо́дит.
Соборное послание Иоаннова первое, зачало 70.
1 Ин 2:7–17
В пяток 34-я недели.
Возлю́бленнии, не за́поведь но́ву пишу́ вам, но за́поведь ве́тху, ю́же име́сте испе́рва. За́поведь ве́тха есть сло́во, е́же слы́шасте испе́рва. Па́ки за́поведь но́ву пишу́ вам, е́же есть пои́стинне в Нем и в вас, я́ко тма ми́мо хо́дит и свет и́стинный сей сия́ет. Глаго́ляй во све́те бы́ти, а бра́та своего́ ненави́дит, во тме есть досе́ле. Любя́й бра́та своего́ во све́те пребыва́ет, и собла́зна в нем несть. А ненави́дяй бра́та своего́ во тме есть, и во тме хо́дит, и не весть ка́мо и́дет, я́ко тма ослепи́ о́чи ему́. Пишу́ вам ча́дца, я́ко оставля́ются вам греси́ и́мене Его́ ра́ди. Пишу́ вам отцы́, я́ко позна́сте Безнача́льнаго. Пишу́ вам ю́ноши, я́ко победи́сте лука́ваго. Пишу́ вам де́ти, я́ко позна́сте Отца́. Писа́х вам отцы́, я́ко позна́сте Иско́ннаго. Писа́х вам ю́ноши, я́ко кре́пцы есте́, и сло́во Бо́жие в вас пребыва́ет, и победи́сте лука́ваго. Не люби́те ми́ра, ни я́же в ми́ре, а́ще кто лю́бит мир, несть любве́ О́тчи в нем. Я́ко все е́же в ми́ре, по́хоть плотска́я и по́хоть очи́ма и го́рдость жите́йская, несть от Отца́, но от ми́ра сего́ есть. И мир прехо́дит, и по́хоть его́, а творя́й во́лю Бо́жию пребыва́ет во ве́ки.
Соборное послание Иоаннова первое, зачало 71.
1 Ин 2:18–3:10А
В понедельник 35-я недели.
Де́ти, после́дняя годи́на есть. И я́коже слы́шасте, я́ко анти́христ гряде́т, и ны́не анти́христи мно́зи бы́ша, от сего́ разумева́ем, я́ко после́дний час есть. От нас изыдо́ша, но не бе́ша от нас, а́ще бы от нас бы́ли, пребы́ли у́бо бы́ша с на́ми, но да явя́тся, я́ко не суть вси от нас. И вы пома́зание и́мате от Свята́го, и ве́сте вся. Не писа́х вам, я́ко не ве́сте и́стины, но я́ко ве́сте ю́ и я́ко вся́ка лжа от и́стины несть. Кто есть лжи́вый, то́чию отмета́яйся, я́ко Иису́с несть Христо́с? Сей есть анти́христ, отмета́яйся Отца́ и Сы́на. Всяк отмета́яйся Сы́на, ни Отца́ и́мать, а испове́даяй Сы́на, и Отца́ и́мать. Вы у́бо е́же слы́шасте испе́рва, в вас да пребыва́ет, и а́ще в вас пребу́дет, е́же испе́рва слы́шасте, и вы в Сы́не и Отце́ пребу́дете. И сие́ есть обетова́ние, е́же Сам обеща́ нам, живо́т ве́чный. Сия́ писа́х вам о льстя́щих вас. И вы е́же пома́зание е́же прия́сте от Него́, в вас пребыва́ет, и не тре́буете, да кто учи́т вы, но я́ко то са́мо пома́зание учи́т вы о всем, и и́стинно есть, и несть ло́жно, и я́коже научи́ вас, пребыва́йте в нем. И ны́не ча́дца, пребыва́йте в Нем, да егда́ яви́тся, и́мамы дерзнове́ние и не посрами́мся от Него́ в прише́ствии Его́. А́ще ве́сте, я́ко пра́ведник есть, разуме́йте, я́ко всяк творя́й пра́вду от Него́ роди́ся. Ви́дите, какову́ любо́вь дал есть Оте́ц нам, да ча́да Бо́жия нарече́мся, и есмы́. Сего́ ра́ди мир не зна́ет нас, зане́ не позна́ Его́. Возлю́бленнии, ны́не ча́да Бо́жия есмы́, и не у яви́ся, что бу́дем: ве́мы же, я́ко егда́ яви́тся, подо́бни Ему́ бу́дем, и у́зрим Его́, я́коже есть. И всяк име́яй наде́жду сию́ Нань, очища́ет себе́, я́коже Он чист есть. Всяк творя́й грех, и беззако́ние твори́т, и грех есть беззако́ние. И ве́сте, я́ко Он яви́ся, да грехи́ на́ша во́змет, и греха́ в Нем несть. Всяк, и́же в Нем пребыва́яй, не согреша́ет, всяк согреша́яй не ви́де Его́, ни позна́ Его́. Ча́дца, никто́же да льстит вас. Творя́й пра́вду пра́ведник есть, я́коже Он пра́веден есть. Творя́й грех от диа́вола есть, я́ко испе́рва диа́вол согреша́ет. Сего́ ра́ди яви́ся Сын Бо́жий да разруши́т дела́ диа́воля. Всяк рожде́нный от Бо́га греха́ не твори́т, я́ко се́мя Его́ в нем пребыва́ет, и не мо́жет согреша́ти, я́ко от Бо́га рожде́н есть. Сего́ ра́ди явле́на суть ча́да Бо́жия и ча́да диа́воля.
Соборное послание Иоаннова первое, зачало 72.
1 Ин 3:10Б–20
Во вторник 35-я недели.
Возлю́бленнии, всяк не творя́й пра́вды несть от Бо́га, и не любя́й бра́та своего́. Я́ко се есть завеща́ние, е́же слы́шасте испе́рва, да лю́бим друг дру́га, не я́коже Ка́ин от лука́ваго бе и закла́ бра́та своего́. За ку́ю вину́ закла́ его́? Я́ко дела́ его́ лука́ва бе́ша, а бра́та его́ пра́ведна. Не чуди́теся, бра́тие моя́, а́ще ненави́дит вас мир. Мы ве́мы, я́ко преидо́хом от сме́рти в живо́т, я́ко лю́бим бра́тию, не любя́й бо бра́та пребыва́ет в сме́рти. Всяк ненави́дяй бра́та своего́ человекоуби́йца есть, и ве́сте, я́ко всяк человекоуби́йца не и́мать живота́ ве́чнаго в себе́ пребыва́юща. О сем позна́хом любо́вь, я́ко Он по нас ду́шу Свою́ положи́, и мы до́лжни есмы́ по бра́тии ду́шы полага́ти. И́же у́бо и́мать бога́тство ми́ра сего́, и ви́дит бра́та своего́ тре́бующа, и затвори́т утро́бу свою́ от него́, ка́ко любы́ Бо́жия пребыва́ет в нем? Ча́дца моя́, не лю́бим сло́вом ниже́ язы́ком, но де́лом и и́стиною. И о сем разуме́ем, я́ко от и́стины есмы́, и пред Ним смиря́ем сердца́ на́ша, зане́ а́ще зазира́ет нам се́рдце на́ше, я́ко бо́лий есть Бог се́рдца на́шего и весть вся.
Соборное послание Иоаннова первое, зачало 73: паремия 1-я.
1 Ин 3:21–4:6
В среду 35-я недели.
Сие же и на вечерни Иоанну Богослову, чтение первое.
Возлю́бленнии, а́ще се́рдце на́ше не за́зрит нам, дерзнове́ние и́мамы к Бо́гу. И его́же а́ще про́сим, прие́млем от Него́, я́ко за́поведи Его́ соблюда́ем, и уго́дная пред Ним твори́м. И сия́ есть за́поведь Его́, да ве́руем во И́мя Сы́на Его́ Иису́са Христа́ и лю́бим друг дру́га, я́коже дал есть за́поведь нам. И соблюда́яй за́поведи Его́, в Нем пребыва́ет, и Той в нем, и о сем разуме́ем, я́ко пребыва́ет в нас, от Ду́ха, Его́же дал есть нам. Возлю́бленнии, не вся́кому ду́ху ве́руйте, но искуша́йте ду́хи, а́ще от Бо́га суть, я́ко мно́зи лжепроро́цы изыдо́ша в мир. О сем познава́йте Ду́ха Бо́жия и ду́ха ле́стча: всяк дух, и́же испове́дует Иису́са Христа́ во пло́ти прише́дша, от Бо́га есть. И всяк дух, и́же не испове́дует Иису́са Христа́ во пло́ти прише́дша, от Бо́га несть, и сей есть анти́христов, его́же слы́шасте, я́ко гряде́т, и ны́не в ми́ре есть уже́. Вы от Бо́га есте́, ча́дца, и победи́сте тех, я́ко бо́лий есть И́же в вас, не́жели и́же в ми́ре. Они́ от ми́ра суть, сего́ ра́ди от ми́ра глаго́лют, и мир тех послу́шает. Мы от Бо́га есмы́, и́же зна́ет Бо́га, послу́шает нас, и и́же несть от Бо́га, не послу́шает нас. О сем познава́ем Ду́ха И́стины и ду́ха ле́стча.
Соборное послание Иоаннова первое, зачало 73: паремия 2-я.
1 Ин 4:11–16
Паремия вторая.
Возлю́бленнии, а́ще си́це возлюби́л есть нас Бог, и мы до́лжни есмы́ друг дру́га люби́ти. Бо́га никто́же нигде́же ви́де. А́ще друг дру́га лю́бим, Бог в нас пребыва́ет, и любы́ Его́ соверше́нна есть в нас. О сем разуме́ем, я́ко в Нем пребыва́ем и Той в нас, я́ко от Ду́ха Своего́ дал есть нам. И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру. И́же а́ще испове́сть, я́ко Иису́с есть Сын Бо́жий, Бог в нем пребыва́ет, и той в Бо́зе. И мы позна́хом и ве́ровахом любо́вь, ю́же и́мать Бог в нас. Бог Любы́ есть, и пребыва́яй в любви́ в Бо́зе пребыва́ет, и Бог в нем пребыва́ет.
Соборное послание Иоаннова первое, зачало 73: от полу́.
1 Ин 4:12–19
Септемвриа 26.
Возлю́бленнии, Бо́га никто́же нигде́же ви́де. А́ще друг дру́га лю́бим, Бог в нас пребыва́ет, и любы́ Его́ соверше́нна есть в нас. О сем разуме́ем, я́ко в Нем пребыва́ем, и Той в нас, я́ко от Ду́ха Своего́ дал есть нам. И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру. И́же а́ще испове́сть, я́ко Иису́с есть Сын Бо́жий, Бог в нем пребыва́ет, и той в Бо́зе. И мы позна́хом и ве́ровахом любо́вь, ю́же и́мать Бог в нас. Бог любы́ есть, и пребыва́яй в любви́ в Бо́зе пребыва́ет, и Бог в нем пребыва́ет. О сем соверша́ется любы́ с на́ми, да дерзнове́ние и́мамы в день су́дный, зане́ я́коже Он есть, и мы есмы́ в ми́ре сем. Стра́ха несть в любви́, но соверше́нна любы́ вон изгоня́ет страх, я́ко страх му́ку и́мать, боя́йся же не соверши́ся в любви́. Мы лю́бим Его́, я́ко Той пе́рвее возлюби́л есть нас.
Соборное послание Иоаннова первое, зачало 74.
1 Ин 4:20–5:21
В четверток 35-я недели.
Возлю́бленнии, а́ще кто рече́т, я́ко люблю́ Бо́га, а бра́та своего́ ненави́дит, ложь есть, и́бо не любя́й бра́та своего́, его́же ви́де, Бо́га, Его́же не ви́де, ка́ко мо́жет люби́ти? И сию́ за́поведь и́мамы от Него́, да любя́й Бо́га лю́бит и бра́та своего́. Всяк ве́руяй, я́ко Иису́с есть Христо́с, от Бо́га рожде́н есть, и всяк любя́й Ро́ждшаго лю́бит и рожде́ннаго от Него́. О сем ве́мы, я́ко лю́бим ча́да Бо́жия, егда́ Бо́га лю́бим и за́поведи Его́ соблюда́ем. Сия́ бо есть любы́ Бо́жия, да за́поведи Его́ соблюдаем, и за́поведи Его́ тя́жки не суть. Я́ко всяк рожде́нный от Бо́га побежда́ет мир, и сия́ есть побе́да, побе́ждшая мир, ве́ра на́ша. Кто есть побежда́яй мир, то́кмо ве́руяй, я́ко Иису́с есть Сын Бо́жий? Сей есть прише́дый водо́ю и кро́вию и Ду́хом, Иису́с Христо́с, не водо́ю то́чию, но водо́ю и кро́вию, и Дух есть свиде́тельствуяй, я́ко Дух есть и́стина. Я́ко трие́ суть свиде́тельствующии на небеси́, Оте́ц, Сло́во и Святы́й Дух, и Си́и три еди́но суть. И трие́ суть свиде́тельствующии на земли́, дух и вода́, и кровь, и трие́ во еди́но суть. А́ще свиде́тельство челове́ческое прие́млем, свиде́тельство Бо́жие бо́ле есть, я́ко сие́ есть свиде́тельство Бо́жие, е́же свиде́тельствова о Сы́не Свое́м. Ве́руяй в Сы́на Бо́жия и́мать свиде́тельство в себе́, не ве́руяй Бо́гови лжа сотвори́л есть Его́, я́ко не ве́рова во свиде́тельство, е́же свиде́тельствова Бог о Сы́не Свое́м. И сие́ есть свиде́тельство, я́ко живо́т ве́чный дал есть нам Бог, и сей живо́т в Сы́не Его́ есть. Име́яй Сы́на Бо́жия и́мать живо́т, а не име́яй Сы́на Бо́жия живота́ не и́мать. Сия́ писа́х вам ве́рующым во и́мя Сы́на Бо́жия, да ве́сте, я́ко живо́т ве́чный и́мате, и да ве́руете во и́мя Сы́на Бо́жия. И сие́ есть дерзнове́ние, е́же и́мамы к Нему́, я́ко а́ще чесо́ про́сим по во́ли Его́, послу́шает нас. И а́ще ве́мы, я́ко послу́шает нас, е́же а́ще про́сим, ве́мы, я́ко и́мамы проше́ния, и́хже проси́хом от Него́. А́ще кто у́зрит бра́та своего́ согреша́юща грех не к сме́рти, да про́сит, и даст ему́ живо́т, согреша́ющым не к сме́рти. Есть грех к сме́рти, не о том глаго́лю, да мо́лится. Вся́ка непра́вда грех есть, и есть грех не к сме́рти. Ве́мы, я́ко всяк рожде́нный от Бо́га не согреша́ет, но рожде́нный от Бо́га блюде́т себе́, и лука́вый не прикаса́ется ему́. Ве́мы, я́ко от Бо́га есмы́, и мир весь во зле лежи́т. Ве́мы же, я́ко Сын Бо́жий прии́де и дал есть нам свет и ра́зум, да позна́ем Бо́га и́стиннаго и да бу́дем во и́стиннем Сы́не Его́ Иису́се Христе́, Сей есть и́стинный Бог и живо́т ве́чный. Ча́дца, храни́те себе́ от треб и́дольских. Ами́нь.
Соборное послание Иоаннова первое, зачало 74: паремия 3-я.
1 Ин 4:20–5:5
Паремия третия.
Возлю́бленнии, а́ще кто рече́т, я́ко люблю́ Бо́га, а бра́та своего́ ненави́дит, ложь есть, и́бо не любя́й бра́та своего́, его́же ви́де, Бо́га, Его́же не ви́де, ка́ко мо́жет люби́ти? И сию́ за́поведь и́мамы от Него́, да любя́й Бо́га лю́бит и бра́та своего́. Всяк ве́руяй, я́ко Иису́с есть Христо́с, от Бо́га рожде́н есть, и всяк любя́й Ро́ждшаго лю́бит и рожде́ннаго от Него́. О сем ве́мы, я́ко лю́бим ча́да Бо́жия, егда́ Бо́га лю́бим и за́поведи Его́ соблюда́ем. Сия́ бо есть любы́ Бо́жия, да за́поведи Его́ соблюда́ем, и за́поведи Его́ тя́жки не суть. Я́ко всяк рожде́нный от Бо́га побежда́ет мир, и сия́ есть побе́да, побе́ждшая мир, ве́ра на́ша. Кто есть побежда́яй мир, то́кмо ве́руяй, я́ко Иису́с есть Сын Бо́жий?