Минеи Богослужебные.
(Кíевъ: Тѵпогра́фія Кíево-Пече́рской Ла́вры, 1893).
Воспомина́ніе на небеси́ я́вльшагося зна́менія Честна́го Креста́ во гра́дѣ Іерусали́мѣ, отъ свята́го Ло́бнаго мѣ́ста протяже́ннаго звѣзда́ми да́же до святы́я горы́ Елео́нскія, въ 3-й ча́съ дне́, при царѣ́ Конста́нтіи сы́нѣ вели́каго Константи́на.
И па́мять свята́го му́ченика Ака́кія
ВЕЧЕРЪ.
Стихи́ры Креста́, на 6, гла́съ 4. Подо́бенъ: Зва́нный свы́ше.
Дне́сь ра́дуется вѣ́рныхъ мно́жество боже́ственное:/ явля́ется бо небе́сный Кре́стъ конце́мъ,/ осіява́етъ тве́рдь свѣ́томъ непристу́пнымъ,/ возду́хъ озаря́етъ/ и земли́ лице́ украша́етъ./ Пое́тъ боже́ственными пѣ́сньми Це́рковь Христо́ва,/ слу́житъ, почита́ющи/ свы́ше ю́ соблюда́ющій/ Кре́стъ боже́ственный и пречу́дный,/ его́же си́лою укрѣпля́еми,/ Влады́цѣ присту́пимъ, зову́ще:/ умири́ мíръ/ и просвѣти́ ду́ши на́ша.
Якоже честнѣ́йша лѣ́ствица,/ ви́дѣнъ бы́сть дне́сь/ всечестны́й Кре́стъ и сла́вный,/ отъ земли́ къ небе́снымъ прево́дитъ/ вѣ́рою несумнѣ́нною сего́ почита́ющія./ Ра́дуются вси́ язы́цы,/ те́плѣ притека́ющіи ко креще́нію,/ и Це́рковь, я́ко невѣ́ста, украша́ется/ о́бразомъ боже́ственнымъ,/ его́же бо сокры́ти тща́хуся іуде́и,/ свы́ше возду́хъ озаря́етъ/ и спаса́етъ вѣ́рою/ къ нему́ притека́ющія.
Же́злъ боже́ственныя си́лы/ съ высоты́ яви́ся,/ въ Сіо́нѣ на́мъ по́сланъ Кре́стъ,/ преоблиста́я благода́тію,/ свѣ́томъ безмѣ́рнымъ./ На Кра́ніевѣ мѣ́стѣ сла́внѣмъ/ возсія́ небе́сный Кре́стъ въ концѣ́хъ/ распе́ншагося Бо́га на́шего,/ проповѣ́дая всѣ́мъ/ е́же стра́сти ра́ди мíрови спасе́ніе./ Ему́же покланя́ющеся,/ воспое́мъ немо́лчно/ и вѣ́рою про́симъ/ умири́ти мíръ/ и спасти́ ду́ши на́ша.
Возвѣсти́ша небеса́ сла́ву Твою́, Го́споди, стра́шное Креста́ Твоего́ зна́меніе, и земля́ вся́ со стра́хомъ поклони́ся. Мы́ же, славосло́вяще, благода́рно Тебѣ́ вопіе́мъ: Бо́гъ Сы́й безстра́стенъ, пло́тію пострада́ти за ны́ во́лею прія́лъ еси́, спаси́ лю́ди, я́же стяжа́лъ еси́ Твое́ю кро́вію.
Креста́ Твоего́ о́бразъ ны́нѣ па́че со́лнца возсія́, его́же отъ горы́ святы́я да́же до Ло́бнаго мѣ́ста просте́рлъ еси́ и въ не́мъ Твою́, Спа́се, крѣ́пость уясни́лъ еси́, си́мъ укрѣпля́я на́съ и вѣ́рныя на́ши цари́, я́же и спаса́й вы́ну въ ми́рѣ моли́твами Богоро́дицы, Христе́ Бо́же, и спаси́ на́съ.
Кано́нъ Ака́кія, творе́ніе Ѳеофа́ново, гла́съ 4.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.
Добро́тою беззло́бія, сла́вне, укра́шенъ, до́брыхъ винѣ́ Исто́чнику со дерзнове́ніемъ предста́лъ еси́, Его́же ны́нѣ на́мъ благопремѣ́нна твои́ми мольба́ми устро́й.
Моле́бникъ и́стинный, дне́сь на́съ Ака́кій, высо́кимъ проповѣ́даніемъ вопія́, созыва́етъ на трапе́зу, со тща́ніемъ у́бо теце́мъ и весе́ліемъ, мучениколю́бцы.
Вода́мъ прича́щся оставле́нія креще́ніемъ, сыновство́ прія́тъ благода́ти Бо́жія и второ́му креще́нію муче́нія кро́вію сподо́бился еси́, преблаже́нне.
Не терпя́ беззако́нія, сла́вне, возноси́мо зрѣ́ти, Христо́во Божество́ я́сно предъ суди́щемъ проповѣ́далъ еси́ мучителей, Ака́кіе, беззло́бію я́ко тезоимени́тъ.
Богоро́диченъ: Въ Тебѣ́, обра́дованная Пречи́стая, ви́дѣна бы́ша Бо́жія ше́ствія проявле́нно, Дѣ́ву сохра́ньшаго и по рождествѣ́ нетлѣ́нну Тя́ ро́ждшую соблю́дшаго.
Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.
Ра́зумомъ боже́ственнымъ, и прему́дростію, и сло́вомъ укра́шенъ, му́дрыхъ плете́нія неразу́мная разори́лъ еси́, тѣ́мже твою́ сла́вную па́мять почита́емъ.
Му́жественнымъ и тве́рдымъ сія́я смы́сломъ, ты́ развраще́нія нечести́выхъ и ополче́нія побѣди́лъ еси́ и пре́лести разори́лъ еси́ утвержде́нія.
Укрѣпля́емь си́лою Бо́га Вседержи́теля, гнило́е и немощно́е безбо́жія обличи́лъ еси́, тѣ́мже побѣдоно́сца тя́, му́чениче, проповѣ́дуемъ.
Ка́льнаго питія́ и преле́стнаго и ти́ны избѣ́глъ еси́, благоче́стія просвѣще́ніемъ и свѣтолу́чными сія́ніи у́мъ осія́я, му́чениче Ака́кіе.
Богоро́диченъ: Держа́ву сме́рти и кля́твы дре́внія осужде́ніе, заче́нши Жи́знь, Богороди́тельнице, упраздни́ла еси́, тѣ́мже Твое́ пречи́стое чти́мъ Рождество́.
Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.
Необори́мь, я́коже сто́лпъ, вѣ́рою пребы́сть, ни муче́ній ту́чами, ни я́звленными приложе́ніи, ни біе́ній вѣ́тры коле́блемь, но взыва́ше велегла́сно: сла́ва си́лѣ Твое́й, Го́споди.
Окормля́емь вѣ́трилы и дыха́ніи Ду́ха Свята́го, блаже́нне, въ приста́нищи ти́сѣ ты́ почи́лъ еси́ и стремле́нія во́лнъ и вѣ́тровъ не ужаса́лся еси́, му́чениче Христо́въ всече́стне.
Моля́ держа́ву Бо́жію непобѣди́мую, одолѣва́лъ еси́ всю́ супроти́вную си́лу и все́ ору́жіе и́хъ отъя́тъ, ра́дуяся, я́ко побѣди́тель, достосла́вне.
Наставля́емь Боже́ственнымъ явле́ніемъ, тече́нія коне́цъ гра́дъ царе́въ сотвори́въ, его́же граждани́нъ бы́лъ еси́, преблаже́нне, вся́ко наше́ствіе ва́рварское отрѣва́я.
Богоро́диченъ: Умерщвле́на мя́, Дѣ́во, и неизбѣ́жными одержи́ма грѣха́ связа́ніи, еди́на Богома́ти, возста́ви, Яже Жи́знь заче́ншая вѣ́чную, избавле́ніе всѣ́мъ вѣ́рнымъ даю́щую.
Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.
Кре́стъ поне́слъ еси́ на ра́мѣхъ, неукло́нно Христу́ послѣ́дуя, къ жи́зни нетлѣ́ннѣй веду́щему тя́ и къ Свѣ́ту невече́рнему вводя́щу, пребога́те.
Го́рькія тѣ́ла, всеблаже́нне, ра́ны и уде́съ отсѣче́нія пи́щу безконе́чную тебѣ́ исхода́таиша, и му́ченическій вѣне́цъ, и а́нгельское ра́дованіе.
Юноша незло́бивъ, и цѣлому́дръ, и кро́токъ, и крѣ́покъ на стра́сти тѣле́сныя, и на де́моны же́стокъ, и невѣ́рнымъ непристу́пенъ показа́лся еси́, всеприснопа́мятне.
Богоро́диченъ: Истиннаго Бо́га на́мъ ро́ждшую пло́тски, Отцу́ Единоро́днаго, Богоро́дицу Всечи́стую Тя́ имену́емъ, гла́съ вку́пѣ соста́вльше Рождеству́ Твоему́.
Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.
Гла́домъ тя́, и́же да́ра боже́ственнаго гла́дствующіи, осужда́ютъ, му́чениче, приснопита́емаго небе́сными дарова́ніи и пи́щу неконча́емую иму́щаго.
Посрами́въ мучи́телей безбо́жное шата́ніе и злонача́льнаго змíя пучи́ною потопи́лъ еси́ твои́хъ крове́й, побѣдоно́сецъ къ небеси́ возлетѣ́лъ еси́, Ака́кіе.
Сме́ртію сме́рти Влады́чнѣ, преблаже́нне, подо́бяся, му́чениче, вѣ́чно съ Ни́мъ ца́рствуеши, зрѣ́нія Его́ и ра́дости насыща́яся.
Богоро́диченъ: Разруши́ла еси́ сме́рти, Чи́стая, осужде́ніе и зако́на кля́тву, Христа́ ро́ждшая, Разори́теля сме́рти, и благослове́ніе всѣ́мъ источи́вшаго.
Ту́чами крове́й твои́хъ, му́чениче Ака́кіе, врага́ потопи́въ, вся́ ополче́нія мучи́тельская посрами́лъ еси́, дости́гъ а́нгельскія невеще́ственныя ли́ки, прія́лъ еси́ нетлѣ́нія неувяда́емый вѣне́цъ. Тѣ́мже мольба́ми твои́ми спаси́ отъ бѣ́дъ на́съ.
Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.
Усѣ́ченъ во главу́, къ мы́сленнѣй впери́лся еси́ Церко́внѣй Главѣ́, побѣ́днымъ вѣнце́мъ укра́шенъ и зовы́й, пребога́те: препѣ́тый Го́споди, Бо́же оте́цъ на́шихъ, благослове́нъ еси́.
Съ му́ченики Христо́вы, я́ко всеи́стиненъ му́ченикъ, сочета́лся еси́ терпѣли́вно, безбо́жныя мучи́тели побѣди́въ, взыва́я, Ака́кіе: препѣ́тый Го́споди, Бо́же оте́цъ на́шихъ, благослове́нъ еси́.
Воскрили́въ у́мъ ко блаже́ннѣй наде́жди, соблюда́емѣй вѣ́рнымъ, въ му́ченическое вше́лъ еси́ суди́ще, воспѣва́я ду́хомъ: Бо́же оте́цъ на́шихъ, благослове́нъ еси́.
Богоро́диченъ: Рече́нія, Дѣ́во, проро́къ и дре́вніи о́брази Твое́ прообразу́ютъ я́вѣ, Богома́ти, чи́стое Рождество́, е́же пою́ще, взыва́емъ: оте́цъ на́шихъ Бо́же, благослове́нъ еси́.
Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.
Въ вы́шнюю митропо́лію, прему́дре, ца́рствующую и́стинно, всели́лся еси́, ю́же созда́ Госпо́дь и святы́мъ проугото́ва, надѣ́ющимся на Него́ и вѣ́рою зову́щимъ: благослови́те, вся́ дѣла́ Госпо́дня, Го́спода.
Претерпѣ́лъ еси́ любо́вію му́къ томле́ніе, гла́домъ же та́я, помина́лъ еси́, изря́дне, присносу́щное наслажде́ніе, и пи́щу, и ра́дость пребыва́ющую вопію́щимъ: благослови́те, вся́ дѣла́ Госпо́дня, Го́спода.
Удо́бь и зѣло́ ско́ро ра́товалъ еси́ супротивобо́рцы твоя́, непобѣди́ма побо́рника, помо́щника же, и засту́пника, и состра́ждуща Христа́ имѣ́я, пребога́те, Ему́же вопіе́мъ: благослови́те, вся́ дѣла́ Госпо́дня, Го́спода.
Ака́кіе блаже́нне, пронарече́нъ бы́въ, житіе́ незло́биво имѣ́лъ еси́ и непоро́чно, укра́шено кро́вію страда́нія, прехва́льне, и добродѣ́тельми му́ченическими удобря́емь, и зовы́й: благослови́те, вся́ дѣла́ Госпо́дня, Го́спода.
Богоро́диченъ: Та́инство стра́нно вои́стинну подъ со́лнцемъ еди́на показа́ла еси́: Бо́га бо родила́ еси́, Чи́стая, Неви́димаго, и Безнача́льнаго, и Невмѣсти́маго всѣ́ми, и Непостижи́маго. Ему́же вопіе́мъ: благослови́те, вся́ дѣла́ Госпо́дня, Го́спода.
Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.
Имы́й, блаже́нне, страда́льческаго противле́нія сія́тельное, е́же отъ побѣ́ды, престо́лу предста́лъ еси́ Влады́чню, со а́нгельскими лику́я во́инствы и всѣ́мъ спасе́нія прося́, твою́ па́мять блажа́щимъ.
Свѣтла́ твоя́ на враги́, пребога́те, побѣ́дная храбо́рства, тебѣ́ же по́чести мно́го бо́льше тво́й Подвигополо́жникъ подава́ше и Боже́ственнаго свѣтоли́тія исполне́ніе. Тѣ́мже тя́ вси́ ублажа́емъ.
Бли́зъ бы́лъ еси́ Христа́, вседо́блественне, и́бо стра́сть и ско́рбь претерпѣ́лъ еси́, тѣ́мже тя́ видѣ́нія я́сно и боговидѣ́нія сподо́би, Имже на земли́ вины́ стяжа́лъ еси́, издале́ча сія́ облобыза́я.
Богоро́диченъ: Краснѣ́йшій добро́тою Тво́й Пло́дъ, Всенепоро́чная, па́че всѣ́хъ яви́ся, заре́ю тва́рь украша́я добротвори́тельныя красоты́, Его́же прилѣ́жно моля́щи спасти́ Тя́ непреста́нно велича́ющія.
На еди́наго змíя я́рость взе́мъ/ и Христо́вою непребори́мою/ и непобѣди́мою си́лою препоя́сався,/ богому́дре Ака́кіе,/ злы́хъ обрѣта́теля на зе́млю низве́рглъ еси́,/ превознесе́нную низложи́въ си́лу,/ и сея́ дѣ́йствующія служи́тели посрами́лъ еси́.
Злы́хъ отчужде́нію,/ до́брыхъ присвое́нію/ поучи́вся свы́ше,/ дѣ́ломъ бы́лъ еси́,/ и́мже пронаре́клся еси́ пе́рвѣе,/ Ака́кіе прему́дре,/ а́ще и па́че про́званъ/ е́же бѣ́ по́слѣжде:/ про́мыслъ бо вели́кихъ веще́й вину́/ неизрече́нно и неви́димо предлага́етъ издале́ча.
Ве́лій во градѣ́хъ и всѣ́мъ ца́рствующій/ честны́й тво́й хра́мъ,/ я́ко вѣне́цъ ца́рскій и́мать/ и столпа́ предлага́етъ стяжа́вшимъ тя́,/ му́дра граждани́на,/ и храни́теля прія́тна,/ и до́бля ору́жника,/ внеза́пная враго́въ и супоста́товъ/ наи́тія отгоня́ща.
Ублажа́ю Тя́, Пречи́стая,/ человѣ́ки похи́тившую/ изъ глубины́ зо́лъ и неча́янія:/ пѣсносло́влю Тя́, Богоневѣ́сто,/ Присноблаже́нную,/ и сла́влю Твое́, Чи́стая, недоумѣ́нное рождество́,/ я́ко родила́ еси́ Спа́са мíра/ и кля́твы свободи́ла еси́, Дѣ́во,/ пра́дѣднія человѣ́чество.
На Крестѣ́ Тя я́ко узрѣ́/ пригвожде́на, Го́споди,/ Агница и Ма́ти Твоя́ дивля́шеся/ и, что́ видѣ́ніе сіе́, — взыва́ше, —/ Сы́не вожделѣ́нне?/ Сія́ Тебѣ́ невѣ́рный собо́ръ воздаде́ беззако́нный,/ и́же мно́гихъ Твои́хъ чуде́съ наслади́выйся?/ Но сла́ва неизглаго́ланному/ соше́ствію Твоему́, Влады́ко.
НА УТРЕНИ.
Кано́нъ пра́здника со ирмосо́мъ на 6 и Креста́ на 6, гла́съ 4.
Ирмо́съ: Колесни́цы фарао́новы и си́лу его́ вве́рже въ мо́ре Крѣ́пкій во бра́нехъ, воспое́мъ пѣ́снь но́вую, я́ко просла́вися.
Яви́лъ еси́ на земли́ зарю́ Креста́, и́мже, діа́вола низложи́въ, человѣ́ческій ро́дъ спа́слъ еси́, Го́споди, тѣ́мже пое́мъ сла́ву Твою́.
Ра́зума непоко́рство Кресто́мъ Изба́витель разори́ вражду́ Отчимъ благоволе́ніемъ. Пое́мъ Ему́ пѣ́снь но́ву, сла́вно бо просла́вися.
Яко во Еде́мѣ живо́тное дре́во всади́лъ еси́, Христе́, та́ко ски́петръ побѣдотво́рный, Кре́стъ Тво́й свѣтови́дно возсія́лъ еси́ на го́ру святу́ю.
Богоро́диченъ: Юже проро́ческій прови́дѣ ли́къ, я́коже две́рь небе́сную и неопали́мую купину́, Тя́, Дѣ́во Ма́ти Чи́стая, Бо́га ро́ждшую, позна́хомъ.
Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.
Яко щито́мъ, защища́емы непобѣди́маго Креста́ зна́меніемъ, Влады́ко, его́же не терпя́, ме́рзкій исчеза́етъ съ де́монскимъ мно́жествомъ.
Вся́ Кре́стъ Тво́й возвесели́, распя́таго Тя́ Бо́га исповѣ́дающія, и я́ко пресвѣ́тлою и непристу́пною красото́ю осія́.
Богоро́диченъ: Ра́дуйся, Ма́ти Неискусобра́чная, Бо́га Сло́ва во утро́бѣ Твое́й вмѣсти́вшая, и ро́ждши воплоще́ннаго Бо́га ку́пно и Человѣ́ка.
Показа́вый Креста́ боже́ственный о́бразъ на небеси́, су́щія на земли́ наста́вити къ Твоему́ позна́нію, Христе́ Бо́же, дне́сь просія́ невече́рняя свѣ́тлость, и свѣ́тъ лица́ Твоего́ на на́съ зна́менася. Того́ у́бо вси́ и́мамы, вѣ́рніи, ору́жіе ми́ра, непобѣди́мую побѣ́ду. Два́жды.
Ирмо́съ: Услы́шахъ слу́хъ Тво́й, Го́споди, я́ко яви́лся еси́ на земли́, и просла́вихъ Твою́ си́лу.
Та́йно у́бо пе́рвѣе, чу́вственно же дне́сь, просія́лъ еси́, Христе́, Пречи́стаго Креста́ Твоего́ о́бразъ.
Беззако́нныхъ богоубíйцъ де́рзость, кре́стнымъ о́бразомъ просвѣти́въ, изобличи́лъ еси́, Спа́се Ще́дре.
Утверди́лъ еси́ христіа́нскую вѣ́ру невеще́ственнымъ Твои́мъ свѣ́томъ, Кре́стъ на́мъ, Христе́, начерта́въ.
Богоро́диченъ: Ма́ти Чи́стая, Благослове́нная Влады́чице, Его́же родила́ еси́, Бо́га моли́твами Твои́ми ми́лостива сотвори́ на́мъ.
Ирмо́съ: Возсія́вый свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се Сы́не Бо́жій.
Смертоно́сное дре́во во Еде́мѣ Ада́му, дре́вле преступи́вшему, сме́рть принесе́; Кре́стъ же живоно́сный, ны́нѣ я́влься, мíра просвѣти́ концы́.
Соста́вивый сло́вомъ первозда́нное сія́ніе, я́ко Сы́ну Оте́цъ, Кре́стъ ны́нѣ свѣтоза́ренъ напису́етъ, Распе́ншемуся свидѣ́тельствуя Божество́.
Во свѣ́тѣ незаходи́мѣ превы́спренній свѣ́тъ, во Отцѣ́ у́зримъ вѣ́рою, Христе́, Тя́, Сы́на, и Тво́й Ду́хъ, душа́мъ на́шимъ просія́нъ.
Богоро́диченъ: Болѣ́зней ма́тернихъ, Отрокови́це, не позна́ла еси́, преесте́ственно заче́нши Бо́га и ро́ждши пло́тію, тѣ́мже Тя́ вси́ досто́йно сла́вимъ.
Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.
Да покры́ются у́бо о́чи беззако́нныхъ, кре́стныя бо добро́ты блиста́ющія не могу́ще зрѣ́ти.
Да насладя́тся заре́ю Пречи́стаго Креста́ Бо́га вѣ́дящіи, на дре́вѣ распе́ншагося пло́тію.
Богоро́диченъ: Яже Бо́га ро́ждшая, Дѣ́во Неискусобра́чная, о на́съ не преста́й Сы́на Твоего́ моля́щи.
Отве́рзый небеса́ заключе́нная, на небеси́ пресвѣ́тлыя лучи́, на земли́ возсія́ пречи́стый Кре́стъ: тѣ́мже, сія́ніе его́ дѣ́йства пріе́мше, къ незаходи́мому наставля́емся Свѣ́ту и во бране́хъ и́мамы его́ ору́жіе ми́ра, непобѣди́мую побѣ́ду.
Зна́меніе се стра́шное вели́каго Бо́га ви́дѣ вели́кій Константи́нъ и слы́шаше глаго́лющу въ не́мъ Іису́су, пе́рвѣе глаго́лавшу царю́ христіа́нъ вѣ́рныхъ самодержа́вному: да́же у́бо до втора́го прише́ствія се́й, твоему́ гра́ду достоя́ніе сохраня́я, и пребу́детъ и да́же до сконча́нія, и градо́мъ всѣ́мъ первосѣда́ніе. Стѣна́ же тому́ бу́детъ Кре́стъ, ору́жіе ми́ра, непобѣди́мая побѣ́да.
Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.
Возне́сшееся на Кре́стъ Со́лнце въ полу́дне, Его́же зря́щи чу́вственное со́лнце, лучи́ своя́ скры́: препѣ́тый Го́споди, Бо́же оте́цъ на́шихъ, благослове́нъ еси́.
Богови́дцу во огни́ дре́вле бесѣ́дова и мра́цѣ, крестоявле́ннымъ же блиста́ніемъ я́ко Бо́гъ сла́вимь дне́сь: препѣ́тый Го́споди, Бо́же оте́цъ на́шихъ, благослове́нъ еси́.
Отъ Свѣ́та и во свѣ́тѣ Свѣ́тъ соприсносу́щный сія́я и пречи́стымъ Твои́мъ свѣ́томъ Креста́ Твоего́ побѣ́ду показа́лъ еси́: препѣ́тый Го́споди, Бо́же оте́цъ на́шихъ, благослове́нъ еси́.
Богоро́диченъ: Несказа́нно во утро́бѣ и преесте́ственно пріе́мшую Непремѣ́ннаго Бо́га, за милосе́рдіе къ человѣ́комъ прише́дшаго, благоче́стно воспое́мъ я́ко Ма́терь Бо́га на́шего во вѣ́ки.
Ирмо́съ: Во о́бразѣ а́нгела, я́вльшагося въ пещи́ о́гненнѣй пѣсносло́вцемъ, Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.
На престо́лѣ сла́вы ви́дѣна бы́вша и на дре́вѣ кре́стнѣмъ пригвожде́на существо́мъ пло́ти, по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.
Свѣ́томъ пречи́стымъ вообра́жшаго на Кра́ніевѣ Кре́стъ, на горѣ́ святѣ́й, по́йте, о́троцы, свя́щенницы, благослови́те, лю́діе, превозноси́те во вся́ вѣ́ки.
Славосло́вяще Еди́наго отъ Тро́ицы, заре́ю кре́стною вселе́нную просвѣща́юща, по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.
Богоро́диченъ: Неизрече́нно и безъ сѣ́мене заче́ншую и ро́ждшую ра́дость вселе́нныя, Христа́ Бо́га, по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.
Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.
Дре́вле во огни́ же и мра́цѣ непокори́вымъ узако́нивый, ны́нѣ же вѣ́рнымъ Твои́мъ лю́демъ Креста́ Твоего́ о́бразъ начерта́лъ еси́, па́че свѣти́лъ сія́ющь, его́же досто́йно велича́емъ.
Пла́кася тмо́ю тва́рь распе́ншихъ Тя́ де́рзости, ны́нѣ же благолѣ́пнѣйшимъ свѣ́томъ живоно́сный просія́ Кре́стъ Тво́й, Христе́, церко́вную показа́ сокрове́нную красоту́.
О Тебѣ́ упова́ніе возвы́сивше, бога́тіи лю́діе Твои́, Тебѣ́ на мольбу́ Кре́стъ и стра́шную кро́вь Твою́ предлага́ютъ, но благопребы́тно пода́ждь на́мъ, Сло́ве Бо́жій, избавле́ніе.
Богоро́диченъ: Просвѣти́ на́съ, ро́ждшая Свѣ́тъ непристу́пный, Дѣ́во, и испо́лни на́съ весе́лія, и ра́дости, и боже́ственнаго ра́зума, чи́стымъ се́рдцемъ Тя́ благоразу́мно велича́ющія.
Кре́стъ — храни́тель всея́ вселе́нныя, Кре́стъ — красота́ Це́ркве, Кре́стъ — Царе́й держа́ва, Кре́стъ — вѣ́рныхъ утвержде́ніе, Кре́стъ — а́нгеловъ сла́ва и де́моновъ я́зва. Два́жды.
НА ЛИТУРГІИ.
Проки́менъ, гла́съ 7: Возноси́те Го́спода Бо́га на́шего/ и покланя́йтеся подно́жію но́гу Его́, я́ко свя́то е́сть. Сти́хъ: Госпо́дь воцари́ся, да гнѣ́ваются лю́діе. Апо́столъ къ Кори́нѳяномъ, зача́ло 125. Аллилу́ія, гла́съ 1: Помяни́ со́нмъ Тво́й, его́же стяжа́лъ еси́ испе́рва. Сти́хъ: Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́. Ева́нгеліе Іоа́нна, зача́ло 60. Прича́стенъ: Зна́менася на на́съ свѣ́тъ лица́ Твоего́, Го́споди.
Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́вры, 1893. — Л. 38 об. – 44 об.