Минеи Богослужебные.
СЛУ́ЖБА СВЯТИ́ТЕЛЮ ПАТРИКІ́Ю, ПРОСВѢТИ́ТЕЛЮ ИРЛА́НДІИ.
(Твореніе Валеріи Хекке. Одобрена РПЦЗ въ 1984 г.)
На Го́споди воззва́хъ.., стихи́ры, гла́съ 1:
Дубра́вы и хо́лми Ирскія земли́, возвесели́теся,/ езе́ра и рѣ́ки, взыгра́йте,/ се́ бо прибли́жися ва́мъ благослове́ніе/ и окропле́ніе свы́ше благода́тію Бо́жіею,/ гряде́тъ бо къ ва́мъ просвѣти́тель ва́шъ и оте́цъ духо́вный,/ ко апо́стольству Бо́гомъ призва́нный,/ и ревни́тель вѣ́ры Правосла́вныя,/ Патрикíй, во святи́телехъ сла́вный.
Вопіе́тъ Патрикíй святы́й ко новопросвѣще́ннымъ христіа́номъ:/ внемли́те, ча́да моя́ духо́вная,/ а́зъ ва́съ роди́хъ Ева́нгельскимъ сло́вомъ,/ обручи́хъ ва́съ, я́ко невѣ́сту, Христу́ Бо́гу,/ сто́йте у́бо въ вѣ́рѣ/ и исповѣ́дайте ю́ небоя́зненно,/ противоборе́нія язы́ческаго не убо́йтеся,/ да Бо́гъ ва́мъ Помо́щникъ вели́кій и Покрови́тель яви́тся.
Ве́лія твоя́ вѣ́ра,/ святи́телю Патрикíе,/ се́ бо оте́чествіе твое́/ и страны́, Христо́мъ просвѣще́нныя, оста́вль,/ въ зе́млю, во тмѣ́ язы́честѣй пребыва́ющую, поте́клъ еси́,/ благовѣ́стіе Христо́во принося́ заблужда́ющимъ,/ и не отступи́лъ еси́,/ до́ндеже въ вѣ́ру Правосла́вную зе́млю всю́ обрати́лъ еси́,/ тѣ́мже тя́ досто́йно восхваля́емъ.
Кто́ изрече́тъ болѣ́зни и боре́нія,/ я́же претерпѣ́лъ еси́, Патрикíе,/ проповѣ́дуя сло́во Бо́жіе/ во тмѣ́ язы́честѣй сѣдя́щимъ?/ Кто́ изочте́тъ ка́пли сле́зныя,/ я́же но́щію пролива́лъ еси́,/ въ пусты́нномъ уедине́ніи моля́ся,/ страхова́нія отъ звѣре́й ди́віихъ/ и наважде́ній діа́вольскихъ прогоня́я си́лою Креста́ Госпо́дня?/ его́же надъ все́ю земле́ю Ирскою/ побѣ́дно водрузи́лъ еси́.
Что́ зри́мое видѣ́ніе,/ е́же Мои́ма очи́ма ви́дится, о Влады́ко?/ Содержа́й всю́ тва́рь, на дре́во воздви́женъ бы́въ,/ и умира́еши, всѣ́мъ дая́й жи́знь, —/ Богоро́дица, пла́чущися, глаго́лаше,/ егда́ узрѣ́ на Крестѣ́ возноси́ма/ изъ Нея́ неизрече́нно возсія́вшаго/ Бо́га и Человѣ́ка.
Оте́чествіе небе́сное возлюби́въ/ и то́е дости́гнути жела́я,/ оте́чествіе земно́е оста́вилъ еси́/ и въ земли́ чуждѣ́й/ но́выя лю́ди духо́вно породи́лъ еси́,/ оте́цъ и́стинный тѣ́мъ явля́яся/ и Го́сподеви взыва́я:/ се́ а́зъ и дѣ́ти,/ я́же ми́ да́лъ еси́.
Ма́ти Бо́жія и Ма́ти христіа́номъ,/ на Твоя́ ча́да умилосе́рдися,/ а́ще бо и согрѣша́емъ,/ но въ покая́ніи зове́мъ:/ не оста́ви на́съ, си́рыхъ,/ но ру́цѣ Твоя́ простри́ на́мъ,/ изводя́щи на́съ на пу́ть спасе́нія.
Егда́ нескве́рная Агница ви́дѣ Своего́ Агнца,/ на заколе́ніе, я́ко Человѣ́ка, во́лею влеко́ма,/ пла́чущи, глаго́лаше:/ безча́дствовати Мя́ ны́нѣ тщи́шися, Христе́, ро́ждшую Тя́:/ что́ сіе́ сотвори́лъ еси́, Изба́вителю вся́ческихъ?/ Оба́че воспѣва́ю и сла́влю Твою́,/ ю́же па́че ума́ и сло́ва,/ кра́йнюю бла́гость, Человѣколю́бче.
Святи́телю Патрикíе,/ равноапо́стольный чудотво́рче/ просвѣти́телю Ирскія страны́,/ моли́ Ми́лостиваго Бо́га/ оставле́нія прегрѣше́ній дарова́ти/ душа́мъ на́шимъ .
Кано́нъ свята́го Патрикíя, гла́съ 4, его́же краегране́сіе: Печа́ть твоего́ апо́стольства Ирстіи лю́ди.
Ирмо́съ: Воспою́ Тебѣ́, Го́споди Бо́же мой,/ я́ко изве́лъ еси́ лю́ди/ изъ рабо́ты еги́петскія,/ покры́лъ же еси́ колесни́цы фарао́новы и си́лу.
Проповѣ́дниче равноапо́стольный,/ сло́вомъ богодухнове́ннымъ и житіе́мъ, сло́во утвержда́ющимъ,/ изве́лъ еси́ лю́ди Ирскія, я́коже Моисе́й изъ Еги́пта,/ отъ тмы́ язы́ческія ко свѣ́ту вѣ́ры Христо́вой.
Ереси Пела́гіевой противоста́въ му́жественнѣ,/ благода́тную си́лу Христо́ву явля́лъ еси́ лю́демъ,/ просвѣща́я цари́ и кня́зи, и вся́къ во́зрастъ и чи́нъ,/ приводя́ же и́хъ во огра́ду церко́вную.
Что́ у́бо рече́мъ, Патрикíя свята́го воспомина́юще?/ Ре́вность ли его́ апо́стольскую восхва́лимъ?/ озлобле́ніямъ ли и преще́ніямъ, я́же претерпѣ́лъ е́сть, подиви́мся?/ труды́ ли, и по́двиги, и смиренному́дрія глубину́ воспое́мъ?/ Та́же Христа́ Бо́га, си́лу Свою́ избра́нному Своему́ къ соверше́нію всѣ́хъ си́хъ пода́вшему, просла́вимъ.
Богоро́диченъ: Ааро́новъ же́злъ процвѣты́й,/ купина́ несгора́емая/ прообразова́ху Тя́, Невѣ́сто Неневѣ́стная, Дѣ́во Богоро́дице,/ воплоще́нію Сло́ва Предвѣ́чнаго послужи́вшую.
Ирмо́съ: Утвержде́ніе на Тя́ надѣ́ющихся,/ Христе́ Бо́же,/ въ вѣ́рѣ правосла́внѣй Твое́й утверди́ на́съ,/ я́ко Человѣколю́бецъ.
Терпѣ́ніемъ мно́гимъ добродѣ́тели стяжа́лъ еси́,/ дѣ́ломъ сло́во про́повѣди твоея́ утвержда́я/ во сла́ву Бо́жію.
Тѣле́сная озлобле́нія, и искуше́нія многоразли́чныя, и уничиже́ніе претерпѣва́я,/ неуста́нно на ни́вѣ Христо́вой труди́лся еси́, Патрикíе,/ не отступа́я, ниже́ смуща́яся,/ но въ вѣ́рѣ и наде́жди на по́мощь Бо́жію утвержда́яся.
Вѣ́ждемъ твои́мъ дрема́нія и тѣ́лу упокое́нія не дава́лъ еси́, святи́телю,/ неуста́нно го́ры и до́лы земли́ Ирскія преходя́,/ вѣ́ру и́стинную насажда́я и новообраще́нныя лю́ди наставля́я.
Богоро́диченъ: Отра́да и Утѣше́ніе подвиза́ющихся,/ и апо́стольская немо́лчная уста́, Ты́ еси́, Влады́чице,/ но да́ждь на́мъ, ни́щимъ и убо́гимъ, Тебѣ́ даро́въ досто́йныхъ вмѣ́сто/ пѣ́ніе серде́чное приноси́ти.
Писа́ній свяще́нныхъ рачи́телю,/ въ сло́вѣ Бо́жіемъ поуча́лся еси́ нелѣ́ностно,/ ду́шу твою́ отъ сего́ исто́чника Боже́ственнаго напоя́я/ и ра́зумъ му́дростію небе́сною пита́я,/ тѣ́мже и препо́далъ еси́ ученико́мъ твои́мъ Богооткрове́нную и́стину,/ я́же и въ писа́ніяхъ твои́хъ запечатлѣ́лъ еси́.
Превозшла́ еси́ си́лы небе́сныя, зане́ хра́мъ показа́лася еси́ Боже́ственный, Благослове́нная Богоро́дице, я́ко ро́ждшая Христа́ Спа́са ду́шъ на́шихъ.
Кресто́мъ Сы́на Твоего́ при́сно соблюда́еми, Дѣ́во, прило́гъ бѣсо́вскихъ избѣга́емъ. Тѣ́мже Тя́ по до́лгу воспѣва́юще, сла́вимъ, Богоро́дице Всепѣ́тая.
Ирмо́съ: Твоего́ на земли́ явле́нія, Христе́ Бо́же,/ проповѣ́дая проро́къ прише́ствіе,/ съ весе́ліемъ вопія́ше:/ сла́ва си́лѣ Твое́й, Го́споди.
Еле́ню на гора́хъ арома́тскихъ подо́бяся,/ го́ры и хо́лми обтека́лъ еси́, це́ркви созида́я и христіа́ны въ вѣ́рѣ Правосла́внѣй наставля́я,/ въ мѣста́ же пусты́нная уединя́яся,/ непреста́нно моли́лся еси́, во е́же но́вому ста́ду твоему́ спасти́ся.
Грѣхолюби́вый мíръ отъ ю́ности твоея́ оста́вль,/ во оби́телѣхъ мона́шескихъ Марти́на сла́внаго и ученика́ его́ воспита́вся,/ въ послуша́ніи же и науче́ніи лѣ́та мно́га пожда́въ,/ же́злъ па́стырскій смире́нно прія́лъ еси́, взыва́я:/ сла́ва си́лѣ Твое́й, Го́споди.
Овцы па́жити твоея́ созыва́лъ еси́ гла́сомъ ева́нгельскимъ/ и во дворы́ церко́вныя сія́ управля́лъ еси́,/ и́стинный па́стырь тѣ́мъ явля́яся,/ и́же ду́шу свою́ за о́вцы своя́ полага́етъ.
Богоро́диченъ: Ангельское цѣлова́ніе прино́симъ Ти́,/ Благослове́нная Богоро́дице:/ ра́дуйся, Благода́тная,/ Госпо́дь съ Тобо́ю.
Ирмо́съ: Возсія́вый свѣ́тъ, и просвѣти́вый у́тро,/ и показа́вый де́нь,/ сла́ва Тебѣ́, сла́ва Тебѣ́,/ Іису́се Сы́не Бо́жій.
Просвѣти́лъ еси́, Патрикíе, зе́млю Ирскую/ свѣ́томъ уче́нія Христо́ва,/ о новоизбра́ннѣмъ ста́дѣ твое́мъ веселя́ся/ и Бо́гови сла́ву воздая́.
Отве́рзлъ еси́ о́чи у́мныя, пре́жде невѣ́ріемъ ослѣпле́нныя,/ и́же во тмѣ́ невѣ́жествія пребыва́ющихъ,/ и ты́я подви́глъ еси́/ со всѣ́ми вѣ́рными Христа́ Спа́са сла́вити.
Сы́тости не зна́я, проповѣ́далъ еси́ вѣ́ру правосла́вную,/ настоя́ и науча́я во вре́мени и безвре́меніи/ со слеза́ми мно́гими,/ Христу́ Бо́гу, помога́ющему ти́, вопія́:/ сла́ва си́лѣ Твое́й, Сы́не Бо́жій.
Богоро́диченъ: Тму́ отгна́вшая и Со́лнце Пра́вды мíру возсія́вшая,/ Богоро́дице Марíе,/ зловѣ́рія но́щь отъ мíра отжени́.
Ирмо́съ: Возопи́, прообразу́я погребе́ніе тридне́вное,/ проро́къ Іо́на, въ ки́тѣ моля́ся:/ отъ тли́ изба́ви мя́,/ Іису́се, Царю́ силъ.
Обижа́емь, не противуглаго́лалъ еси́,/ и уничижа́емь, смиря́лся еси́,/ о́бразъ явля́я ученико́мъ твои́мъ,/ тѣ́мже и возвели́чи тя́ Госпо́дь, Патрикíе.
Льсти́вымъ ко́знемъ діа́вольскимъ противобо́рствуя,/ не убоя́лся еси́ преще́нія волхво́въ нечести́выхъ,/ Христо́ву вѣ́ру безбоя́зненно проповѣ́дуя и взыва́я:/ отъ сѣ́тей и́хъ изба́ви мя́,/ Іису́се, Царю́ си́лъ.
Ско́рбь, и тѣсноту́, и го́рькое ра́бство/ въ ю́ности твое́й претерпѣ́въ,/ егда́ плѣне́нъ бы́лъ еси́, Патрикíе,/ по гла́су же Госпо́дню свобо́ду улучи́въ, возопи́лъ еси́:/ сла́ва Тебѣ́, Іису́се, Царю́ си́лъ.
Богоро́диченъ: Ты́ еси́ оби́димыхъ Помо́щница,/ Ты́ еси́ плѣне́нныхъ Свобожде́ніе,/ Твои́ бо мольбы́, Приснодѣ́во Влады́чице,/ пріе́млетъ при́сно Сы́нъ Тво́й и Бо́гъ на́шъ.
Показа́лся еси́ и́стинный лове́цъ человѣ́ковъ,/ мре́жи бо благовѣ́стія ева́нгельскаго просте́ръ,/ улови́лъ еси́ язы́ки во Ца́рствіе Христо́во,/ креще́ніемъ просвѣща́я во тмѣ́ поклоне́нія и́дольскаго пребыва́ющія/ и тѣ́хъ сотворя́я ча́да Жива́го Бо́га;/ сего́ ра́ди мо́лимъ тя́:/ предста́тельствуй, о́тче Патрикíе,/ о чту́щихъ святу́ю па́мять твою́.
Ирмо́съ: Авраа́мстіи иногда́ въ Вавило́нѣ о́троцы/ пе́щный пла́мень попра́ша,/ пѣ́сньми взыва́юще:/ оте́цъ на́шихъ Бо́же, благослове́нъ еси́.
Видѣ́ній богооткрове́нныхъ зри́телю,/ Патрикíе святи́телю,/ послѣ́довалъ еси́ призыва́ющему тя́ Бо́жію гла́су,/ и́же тя́ посла́ лю́ди но́выя ко и́стиннѣй вѣ́рѣ обрати́ти.
Ангельскій о́бразъ отъ ю́ности твоея́ воспріи́мъ,/ ревнова́лъ еси́ о насажде́ніи житія́ мона́шеского въ новопросвѣще́нной земли́,/ оби́тели мно́гія повсю́ду созида́я и Го́сподеви поя́:/ оте́цъ на́шихъ Бо́же, благослове́нъ еси́.
Ирская земля́ тобо́ю хва́лится/ и па́мять твою́ чти́тъ, Патрикíе,/ но и мы́, отъ восто́ка прише́дше,/ усе́рдно тя́ въ моли́твахъ призыва́емъ,/ Го́спода о тебѣ́ благодаря́ще и вопію́ще:/ благослове́нъ еси́, Бо́же на́шъ.
Богоро́диченъ: Рабо́въ Твои́хъ мольбы́ пріими́ и ны́нѣ, Всенепоро́чная,/ я́коже дре́вле моле́нія къ Тебѣ́ прибѣга́ющихъ слу́шала еси́,/ Ты́ бо вчера́, и дне́сь, и въ вѣ́цѣ гряду́щемъ/ еди́на ми́лостивая Засту́пница явля́ешися.
Ирмо́съ: Царя́ Христа́, Его́же исповѣ́даша/ плѣне́нніи о́троцы, въ пещи́,/ глаго́люще ве́ліимъ гла́сомъ:/ вся дѣла́, по́йте Го́спода.
Сѣ́ятель до́брый яви́лся еси́, святи́телю Патрикíе,/ ни́ву благопло́дную Христо́ви возрасти́въ/ и лю́ди новопросвѣще́нныя науча́я вопи́ти:/ вся́ дѣла́, по́йте Го́спода.
Тве́рдое вѣ́ры Христо́вы основа́ніе положи́въ,/ созида́лъ еси́ безъ числа́ хра́мы и оби́тели и́ноческія,/ въ ни́хже тружда́ющихся подвиза́лъ еси́ вопи́ти:/ вся́ дѣла́, по́йте Го́спода.
Іере́и Бо́жіи поставля́лъ еси́/ и по все́й земли́ посыла́лъ еси́ на служе́ніе,/ я́ко да утвержда́ютъ въ вѣ́рѣ, тобо́ю проповѣ́данной,/ лю́ди новоизбра́нныя, благода́рнѣ зову́щія:/ вся́ дѣла́, по́йте Го́спода.
Богоро́диченъ: Иновѣ́рческія заблужде́нія и ерети́ческія шата́нія осуети́,/ вѣ́рныя же во и́стинѣ утверди́,/ та́йно науча́ющи и́хъ, Влады́чице,/ Бо́га правосла́вно воспѣва́ти.
Ирмо́съ: Отъ земноро́дныхъ ро́ждшися/ и Творца́ ро́ждшая,/ на́ша похвало́, Богоро́дице Чи́стая,/ Тя́, я́ко влады́чествующую тва́рьми, велича́емъ.
Лѣ́тнюю па́мять твою́, Патрикíе, соверша́юще/ и апо́стольскія труды́ твоя́ восхваля́юще,/ отъ восто́ка и за́пада соше́дшеся,/ единоду́шно тя́ велича́емъ.
Юность твою́ Христо́ви въ же́ртву прине́слъ еси́/ и до ста́рости Тому́ служи́лъ еси́, святи́телю,/ апо́столомъ поревнова́въ и преподо́бнымъ подража́я,/ тѣ́мже тя́ велегла́сно велича́емъ.
Дубра́вы и хо́лмы земли́ Ирскія моли́твою твое́ю освяти́лъ еси́/ и слеза́ми мно́гими новонасажде́нную ни́ву Христо́ву ороша́лъ еси́,/ да возрасте́тъ и стори́чный пло́дъ принесе́тъ,/ тѣ́мже труды́ твоя́ и ре́вность по Бо́гу велича́емъ.
Богоро́диченъ: Ирскую зе́млю и вся́кую страну́ христіа́нскую/ попече́ніемъ Твои́мъ не оставля́й, Богоро́дице,/ со Патрикíемъ святы́мъ Сы́на Твоего́ Боже́ственнаго умоля́ющи,/ да вся́ поми́луетъ и спасе́тъ,/ непреста́нно Тя́ велича́ющихъ.
Н
о́щь язы́ческую просвѣти́вый/ свѣ́томъ Христо́вымъ, Патрикíе,/ во свѣ́тѣ невече́рнѣмъ ны́нѣ пребыва́я,/ на Со́лнце Пра́вды взира́я,/ те́плѣ моля́ся,/ да возсія́етъ во все́мъ мíрѣ/ трисо́лнечный свѣ́тъ Правосла́вія.Незаходи́маго Свѣ́та носи́ло, Приснодѣ́во, просвѣ́щшаго сѣдя́щихъ во тмѣ́ невѣ́дѣнія пре́лести, озари́ и на́мъ, грѣ́шнымъ, свѣ́тъ Сы́на Твоего́.
Примѣчаніе:
1 Тропарь и кондакъ приводятся по изданію: «Служба Святителю Патрикію, архіепископу Армагскому, просвѣтителю Ирландіи. СПб.: «Русскій служитель», 2020, с. 5, 10», съ возстановленіемъ первоначальнаго текста: «Ирскія страны».