Минеи Богослужебные.
(Кíевъ: Тѵпогра́фія Кíево-Пече́рской Ла́вры, 1893).
Преподо́бнаго отца́ на́шего Макси́ма Исповѣ́дника и свята́го му́ченика Неофи́та.
И святы́хъ му́чениковъ Евге́нія, Кани́дія, Уалеріа́на и Аки́лы.
Зри́: Слу́жба и́хъ пое́тся на повече́ріи
ВЕЧЕРЪ.
На Го́споди воззва́хъ: стихи́ры Макси́ма, на 6, гла́съ 4. Подо́бенъ: Яко до́бля.
За милосе́рдіе бы́вша Человѣ́ка,/ я́ко благоизво́ли,/ во дву́ хотѣ́ніихъ,/ дѣ́йствахъ же разумѣва́ема, преподо́бне,/ проповѣ́далъ еси́, Макси́ме,/ загражда́я скве́рныхъ/ незатворе́нная уста́,/ единово́льна, единодѣ́йственна Того́ сла́вящихъ,/ искуше́ніемъ діа́вольскимъ/ зло́бу содѣ́лавшаго.
Жи́лами уче́ній твои́хъ/ Пи́рра, о́тче, удави́лъ еси́,/ буесло́вяща, Макси́ме, злому́дреннаго,/ и гоне́нія претерпѣ́лъ еси́,/ и ско́рби, приснопа́мятне,/ ураня́емь лю́тѣ,/ и язы́къ отрѣ́зуемь,/ и ю́же всегда́ къ Бо́гу простира́емую боже́ственную ру́ку,/ е́юже пиша́, соверши́лъ еси́ высо́кая словеса́.
Скоропи́сца я́ко тро́сть,/ наостре́на Ду́хомъ,/ святы́й бы́сть, блаже́нне, язы́къ тво́й,/ добропи́шущъ благода́тію/ на скрижа́лѣхъ серде́цъ на́шихъ/ зако́нъ Боже́ственныхъ добродѣ́телей,/ и уче́ніемъ извѣ́стіе,/ и воплоще́ніе во дву́ существа́хъ человѣ́комъ/ и еди́нѣй ѵпоста́си яви́тися Восхотѣ́вшаго.
О, пресла́внаго чудесе́!/ Го́лубь бесѣ́дуетъ Неофи́ту му́ченику/ человѣ́ческимъ вѣща́ніемъ,/ отъ вы́шнихъ прише́дшій,/ его́же ра́ди и облиста́етъ житіе́ равноа́нгельно,/ и́мже, ю́ношствуя, стра́ждетъ крѣ́пко/ О, боже́ственныхъ дѣя́ній пятострада́льнаго му́ченика!/ Его́же моли́твами спаси́ ду́ши на́ша, Христе́,/ я́ко Благоутро́бенъ.
О, пресла́внаго чудесе́!/ Отъ пеле́нъ самѣ́хъ совершенному́дрый Неофи́тъ/ соверша́етъ чудеса́ дѣ́йствомъ Ду́ха:/ изъ ка́мене во́ду моли́твами источа́етъ,/ ме́ртвую воздвиза́етъ,/ ея́же яви́ся поро́дъ./ О, боже́ственныхъ дѣя́ній пятострада́льнаго му́ченика!/ Его́же моли́твами спаси́ ду́ши на́ша, Христе́,/ я́ко Благоутро́бенъ.
О, пресла́внаго чудесе́!/ За Христа́ стражда́ треблаже́нный Неофи́тъ,/ враги́ устраши́ изря́дными видѣ́ніи,/ о́гнь угаса́етъ сему́ вмета́ему,/ сверѣ́пыя звѣ́ри устраши́вшіяся показу́етъ./ О, держа́во непобѣди́мая,/ въ не́йже удивля́ется страда́лецъ!/ Но моли́твами его́ спаси́ ны, Бо́же.
Преподо́бне о́тче, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.
Агнца Своего́/ Агница нескве́рная дре́вле и Непоро́чная Влады́чица/ на дре́вѣ кре́стнѣмъ я́ко узрѣ́,/ ма́терски восклица́ше/ и, дивя́щися, вопія́ше:/ Ча́до сладча́йшее,/ что́ зрѣ́ніе сіе́, но́вое и пресла́вное?/ Ка́ко со́нмъ безблагода́тный/ суди́щу Пила́тову предаде́ Тя́/ и осужда́етъ на сме́рть/ Жи́знь вся́ческихъ?/ Но воспѣва́ю Твое́ неизрече́нное,/ Сло́ве, снизхожде́ніе.
Мона́ховъ мно́жества, наста́вника тя́ почита́емъ, о́тче на́шъ Макси́ме: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.
Что́ зри́мое видѣ́ніе,/ е́же Мои́ми очесы́ ви́дится,/ о Влады́ко!/ Содержа́й всю́ тва́рь,/ на дре́во воздви́женъ бы́въ,/ и умира́еши, всѣ́мъ дая́й жи́знь? —/ Богоро́дица, пла́чущи, глаго́лаше,/ егда́ узрѣ́ на Крестѣ́ возноси́ма/ изъ Нея́ неизрече́нно возсія́вшаго/ Бо́га и Человѣ́ка.
Правосла́вія наста́вниче, благоче́стія учи́телю и чистоты́, вселе́нныя свѣти́льниче, мона́шествующихъ богодухнове́нное удобре́ніе, Макси́ме прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.
Му́ченикъ Тво́й, Го́споди, Неофи́тъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.
Кано́нъ му́чениковъ, его́же краегране́сіе: Четвери́цу пою́ му́чениковъ побѣдоно́сныхъ. Гла́съ 2.
Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.
Свѣ́тлостію Трисо́лнечныя благода́ти, сла́вніи му́ченицы, озаря́еми, воспѣва́ющія ва́шу па́мять всечестну́ю просвѣти́те, отъ тмы́ избавля́юще страсте́й и обстоя́ній.
Освѣща́еми Всесвяты́мъ Ду́хомъ, мíра оста́вльше бу́рю, удали́стеся въ гора́хъ, му́дріи му́ченицы сла́вніи, къ боже́ственному страда́нію обуча́еми, е́же и свѣ́тло соверши́сте.
Утвержда́еми держа́вною Зижди́теля и всекрѣ́пкою си́лою, боже́ственныя му́ченицы, обурева́ньми мно́гими яви́стеся непрекло́нни въ му́кахъ, всю́ попра́вше враго́въ си́лу.
Богоро́диченъ: Ми́лости мя́, благослове́нная Влады́чице, Боже́ственныя получи́ти сподо́би предста́тельствы Твои́ми, ро́ждшая пло́тію Сло́во Ми́лостивнѣйшее и Благопремѣни́тельное, пріе́млющее къ Нему́ притека́ющія.
Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.
Любо́вію уязвля́еми Влады́чнею, му́ки претерпѣ́сте многообра́зныя: жи́лами бо суро́вѣйше, страда́льцы, біе́ми, огне́мъ же отвсю́ду лю́то опаля́еми, непрекло́нни пребы́сте.
Укрѣпля́еми си́лою Госпо́днею, изыдо́сте къ боре́нію врага́ и сего́ низложи́сте, страстоте́рпцы, Христу́ зову́ще: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.
Со а́нгелы лику́юще въ вы́шнихъ и съ собо́ры соединя́еми му́чениковъ, съ си́ми моли́теся изба́вити вся́кія ско́рби и обстоя́нія ва́съ чту́щія, боже́ственніи му́ченицы.
Богоро́диченъ: Согла́сно Тя́, Всепѣ́тая, благослови́мъ, Еюже на́мъ возсія́ неизрече́нно Сія́ніе Невече́рнее, и вопіе́мъ: спаса́й рабы́ Твоя́ вся́каго озлобле́нія, вѣ́рныхъ бо Помо́щница Ты́ еси́.
Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.
Пою́ще благоче́стно, почти́мъ Евге́ніево дерзнове́ніе, Аки́лы противле́ніе, Кани́діево же терпѣ́ніе, ку́пно съ ни́ми почита́юще и Уалеріа́нову крѣ́пость.
Неи́стовствомъ одержа́нъ, му́читель у́жами растя́гнена неми́лостивно би́ти тя́ повелѣва́етъ, и желѣ́зомъ вельми́ строга́ти тя́, Евге́ніе, и свѣща́ми опаля́ти тѣ́ло твое́.
Непщева́въ пребезу́мный мучи́тель тве́рдость ва́шу му́ками разори́ти, му́дріи му́ченицы, му́камъ подлага́етъ ва́съ горча́йшимъ, но благода́тію Вседѣ́теля Христа́ сего́ посрами́сте.
Богоро́диченъ: Яко еди́на вѣ́рныхъ по́моще, Всеблагослове́нная Богоро́дице, отъ вся́кихъ изба́ви скорбе́й Твоя́ рабы́, те́плѣ блажа́щія Тя́ и въ боже́ственный кро́въ Тво́й притека́ющія.
Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.
Му́ченическое показу́я вои́стинну терпѣ́ніе, ста́лъ еси́, я́ко адама́нтъ, го́рькія му́ки подъе́мля и взыва́я Зижди́телю благода́рно, му́чениче Евге́ніе: ино́го бо, ра́звѣ Тебе́, Бо́га не зна́емъ.
Безвѣ́стію бо́ги и́дольскія препосла́лъ еси́ свяще́ннѣйшими твои́ми къ Зижди́телю моли́твами, подъя́лъ еси́ ра́ны многообра́зныя по всему́ тѣ́лу, му́чениче Евге́ніе, па́лицами неща́дно ураня́емь.
Богоро́диченъ: Изба́ви на́съ, Всесвята́я Дѣ́во, вся́каго вре́да, Ты́ бо Предста́тельница еси́ на́ша, надѣ́ющихся на Тя́, Богоро́дице, и вопію́щихъ Боже́ственному Рождеству́ Твоему́: ино́го бо, ра́звѣ Тебе́, Бо́га не зна́емъ.
Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.
Простира́еми на дре́вѣ, и желѣ́зомъ стру́жеми я́ростію судя́щаго и жи́лами ссѣка́еми по плеще́мъ неща́дно, и огне́мъ опаля́еми, добропобѣ́дніи му́ченицы ра́довахуся.
Терпѣ́лъ еси́ тѣ́ломъ, свѣща́ми опаля́емь, и на дре́вѣ, сла́вне, протяза́емь, Евге́ніе, и со́лію ра́ны неща́дно посыпа́емы беззако́ннаго мучи́теля суровство́мъ.
Богоро́диченъ: Да изба́вимся вся́каго навѣ́та и ско́рби, Богора́дованная, и́же въ Тво́й покро́въ притека́ющіи, и любо́вію Тя́ при́сно благоче́стно сла́вяще, я́ко Ма́терь Бо́жію Всенепоро́чную.
Красота́ просія́вши тве́рдыхъ му́чениковъ, четвери́ца озари́ четы́ре концы́ мíра заря́ми, страда́ньми му́чениковъ и си́лами, отъ ни́хже сія́етъ вели́кій Евге́ній.
Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.
По́двиги свѣ́тлыми обле́клся еси́ му́жески на пре́лесть и, побѣдоно́сецъ, о Евге́ніе, Боже́ственнымъ манове́ніемъ бы́въ, обрѣ́лъ еси́ воздая́нія трудо́въ, со а́нгелы же пое́ши: благослове́нъ еси́, Бо́же отце́въ на́шихъ.
Кре́стъ Христо́въ иму́ще, страда́льцы, я́ко Боже́ственное ору́жіе, діа́воле ополче́ніе и мучи́телей противле́ніе вку́пѣ низложи́сте, побѣ́ды вѣнцы́ пріе́мше отъ жизноно́сныя десни́цы Страстополо́жника Бо́га.
Умо́мъ чи́стымъ му́къ прило́ги не поколеба́лся еси́, но непреста́нно, о Евге́ніе, па́лицами біе́мь, изря́днѣйше посѣ́клъ еси́, му́чениче, сопротивле́ніемъ страда́ній твои́хъ главы́ враго́въ и неви́димыхъ супоста́товъ.
Богоро́диченъ: Се́ вои́стинну, я́ко прорекла́ еси́, ро́ди Тя́, Всечи́стая, вси́ досто́йно ублажа́емъ и по до́лгу сла́вимъ: Ты́ бо Собезнача́льное Сло́во Отчее родила́ еси́, за е́же спасти́ человѣ́ки, воплоще́нное изъ Тебе́.
Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.
Вся́кому лука́вному кова́рству гони́телей сопроти́вися Уалеріа́нъ же, и сла́вный съ ни́мъ Аки́ла, и боже́ственный Евге́ній, ку́пно со страда́льцемъ Кани́діемъ до́блественнымъ.
Богоза́рная чу́дныхъ страстоте́рпцевъ Христо́выхъ наста́ па́мять, Уалеріа́на же и Евге́нія ку́пно, Аки́лы боже́ственнаго и Кани́дія, ю́же ра́достно соверша́емъ любо́вію.
Свѣтови́дными луча́ми облиста́ющи на́мъ свѣ́тло, наста́ лѣ́тняя па́мять страстоте́рпцевъ Христо́выхъ, Аки́лы боже́ственнаго и Кани́дія ку́пно, и Евге́нія, и Уалеріа́на.
Богоро́диченъ: Соприсносу́щный Отцу́ и Собезнача́льный Сы́нъ изъ Тебе́ про́йде, въ послѣ́дняя лѣ́та, за е́же спасти́ ны, Дѣ́во Чи́стая Неискусобра́чная, Его́же не преста́й на́мъ умилостивля́ющи.
Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.
Стремле́ніе побѣди́лъ еси́ мучи́телей, по мно́жайшихъ му́кахъ преше́дъ къ Бо́гу прера́достно, побѣ́ды по́чести пріе́мъ, я́ко ору́жникъ до́блественный, я́ко вели́къ хра́брникъ, я́ко избра́нный Христо́въ во́инъ, Евге́ніе всеизя́щнѣйшій.
Со а́нгельскими ли́ки, и му́ченическими собо́ры совоку́пльшеся, и пра́ведныхъ чи́ны, ны́нѣ съ ни́ми моли́теся ва́съ воспѣва́ющимъ дарова́ти очище́ніе грѣхо́въ и вся́кихъ бѣ́дъ, му́ченицы, избавле́ніе.
О на́съ, соверша́ющихъ свѣ́тлую ва́шу па́мять, Евге́ніе богому́дре, благоче́стно, му́чениче Аки́ло всесла́вне и Уалеріа́не съ Кани́діемъ сострада́льцемъ, прилѣ́жно умоли́те Христа́ Преблага́го.
Богоро́диченъ: Тя́, Всесвята́я Дѣ́во, а́нгеловъ мно́жества и всѣ́хъ человѣ́къ ро́ди прера́достно ублажа́ютъ: всѣ́хъ бо Спа́са, и Зижди́теля, и Влады́ку, и Бо́га породила́ еси́, Его́же о на́съ моли́.
Пѣ́сньми восхва́лимъ, вѣ́рніи, и́стинно боже́ственныя ору́жники и страда́льцы Христо́вы: му́драго Евге́нія и Уалеріа́на, Кани́дія сла́внаго и сострада́льца ку́пно со Аки́лою, вѣ́рно ублажа́юще сія́, я́ко пострада́вшія стра́нно, я́ко да въ ча́съ осужде́нія на́съ изъе́млютъ муче́нія.
Му́чениче страстоте́рпче Христо́въ, твое́ вервьми́ тѣ́ло наляца́емо я́ростію мучи́теля зѣ́льно строга́шеся, неща́дно же опаля́шеся, біе́мо, му́чениче, свѣща́ми опаля́емо и притрыва́емо со́лію и о́цтомъ лютѣ́йшимъ, ты́ же претерпѣ́лъ еси́ вся́, Евге́ніе блаже́нне, ра́ди Го́спода.
Зако́нъ спаси́тельный я́вѣ имѣ́я въ се́рдцы твое́мъ, му́чениче, мíръ оста́вилъ еси́, гора́мъ же прибли́жился еси́, къ боже́ственному страда́нію обуча́яся, блаже́нне, вои́стинну соверше́нному; е́же и пріе́мля, ра́дуяся, претерпѣ́лъ еси́ все́ тѣлесе́ строга́ніе и огня́ лютѣ́йшее, Уалеріа́не му́чениче, попале́ніе.
Ра́дуйся! — вся́ тва́рь Тебѣ́ вопіе́тъ, — ра́дуйся, Всесвята́я Дѣ́во; ра́дуйся, ски́птре Дави́довъ; ра́дуйся, прозя́бшая гро́здъ та́йный; ра́дуйся, две́ре небе́сная и неопали́мая купино́; ра́дуйся, свѣ́те всемíрный; ра́дуйся, всѣ́хъ ра́досте; ра́дуйся, заступле́ніе; ра́дуйся, чи́стѣ притека́ющихъ въ Твою́ по́мощь, Всенепоро́чная.
Егда́ нескве́рная Агница ви́дѣ Своего́ Агнца, на заколе́ніе я́ко Человѣ́ка во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, ро́ждшую Тя́, что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.
НА УТРЕНИ.
Еди́нъ кано́нъ Окто́иха и святы́хъ два́.
Пѣ́снь 1.
Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.
Всю́ мнѣ́ богодухнове́нную отъ медото́чнаго и сла́дкаго твоего́ иска́пай язы́ка, боже́ственный Макси́ме, благода́ть Ду́ха.
Огнь горя́щь яви́лся еси́ на е́реси, блаже́нне: я́ко бо тро́стіе, сія́ изнури́лъ еси́ ре́вностію Ду́ха.
Безслове́сное предложи́ся отъ злочести́вѣйшаго произволе́нія единово́льное уче́ніе, словесы́ же твои́ми, о́тче, обличи́ся.
Богоро́диченъ: Ве́сь жела́ніе, изъ утро́бы Твоея́, Богоневѣ́сто, благоизво́ливый роди́тися, и Сла́дость е́сть, и Свѣ́тъ незаходи́мый.
Пѣ́снь 1.
Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.
Христо́въ тя́, всеблаже́нне, но́вый са́дъ, въ вертогра́дѣ процвѣ́тшій му́ченичестѣмъ, и свяще́нныя плоды́ благоче́стія израсти́вша, позна́вше, пое́мъ, Неофи́те.
Глаго́ловъ Боже́ственныхъ испо́лнитель показа́вся, блаже́нне, отъ младе́нства благу́ю ча́сть му́дрѣ избра́лъ еси́ и наста́вникъ заблу́ждшимъ бы́лъ еси́.
Ви́дѣти жела́я Христа́, пло́тію изъ Дѣ́вы младе́нствовавшаго на́съ ра́ди, младе́нецъ сы́й, младе́нцевъ къ соверше́нству водя́й мудрова́ніе.
Иска́паяй, богому́дре, сла́дость богоразу́мія изъ у́стъ свяще́нныхъ, ду́ши, очаро́ванныя зло́бою чужда́го, че́стно услади́лъ еси́.
Богоро́диченъ: Ро́ждшая естество́мъ Содѣ́теля, обожи́ла еси́ все́ существо́ земноро́дныхъ, тѣ́мже Тя́, вои́стинну Богоро́дицу, исповѣ́дуемъ, Дѣ́во Богоневѣ́сто.
Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.
Велича́йшій Макси́мъ, благочести́выя Христо́вы вѣ́ры всеи́стинно проповѣ́дникъ же и му́ченикъ показа́ся кро́вію.
Макси́ме блаже́нне, ты́ поще́ніемъ бы́лъ еси́ боголѣ́пное любому́дрія и чи́стое жили́ще.
Излія́ язы́къ тво́й рѣку́ Христо́выхъ уче́ній благоче́стне, Макси́ме всеблаже́нне, прему́дрости пита́тель.
Богоро́диченъ: Да стезю́, Влады́ко, ко святы́ни веду́щую, пока́жеши на́мъ, во утро́бу всесвяту́ю всели́лся еси́.
Всего́ возложе́на тя́ Всеще́дрому Сло́ву Чи́стый Ду́хъ соблюда́ше невреди́ма, сла́вне.
Воспѣ́ша Го́спода мно́жества люде́й вѣ́рныхъ, ви́дѣвше тобо́ю, му́чениче, ро́ждшія тя́ изъ ме́ртвыхъ воста́ніе.
Свѣ́томъ облиста́ющая голуби́ца, гла́сомъ живы́мъ тя́ и путе́мъ спаси́тельнымъ призыва́етъ, Неофи́те.
Богоро́диченъ: Пѣ́ніе ра́достное ро́дъ человѣ́ческій при́сно приноша́етъ Тебѣ́, Ма́ти Бо́жія, безсме́ртіе Тебе́ ра́ди воспріе́мшій.
Тро́ицы рачи́теля и вели́каго Макси́ма, науча́юща я́сно вѣ́рѣ Боже́ственнѣй, е́же сла́вити Христа́, во дву́ естества́хъ, во́ляхъ же и дѣ́йствахъ су́ща, въ пѣ́снехъ досто́йныхъ, вѣ́рніи, почти́мъ, взыва́юще: ра́дуйся, проповѣ́дниче вѣ́ры.
Гоне́нія претерпѣ́въ за вѣ́ру, отгна́лъ еси́, о́тче, вся́ку е́ресь, отсѣ́ченъ же съ руко́ю язы́къ, Макси́ме, исповѣ́данія благолѣ́пный отъ руки́ Творца́ прія́лъ еси́ вѣне́цъ, блаже́нне. Его́же ны́нѣ непреста́нно моли́ поми́ловатися душа́мъ на́шимъ.
Новоцвѣ́тный я́коже са́дъ, прозя́блъ еси́ въ вертогра́дѣхъ Христо́выхъ страстоте́рпцевъ, плоды́ Боже́ственнаго ра́зума прине́слъ еси́, и́миже пита́ются вѣ́рно тя́ чту́ще, сла́вне Неофи́те, страда́льче доблему́дренный, но твои́ми моли́твами на́съ всегда́ спаса́й, Бо́гу предстоя́.
По Бо́зѣ въ Тво́й, Богоро́дице, прибѣ́гъ смире́нный покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́къ, и трепе́щу. Моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.
Изъ Безнача́льнаго Отца́ рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се! — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́ковъ, Сы́не, хотя́, распина́ешися? Пою́ Тя́, Долготерпѣли́ве.
Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.
Земноро́дныхъ тя́ почита́ютъ, и небе́сныхъ чи́ни чудя́тся, любо́вію бо му́дрости показа́лся еси́, о́тче, я́ко безпло́тенъ.
Суро́въ у́бо мучи́тель, но терпѣ́ніе твое́ непрекло́нно, тѣ́мъ ты́ у́бо ублажи́лся еси́, вселука́вый же изве́ржеся.
Состра́ждетъ тебѣ́, Макси́ме, ученико́въ дво́ица преблаже́нная, твои́мъ страда́ніемъ пріобщи́вшеся, тѣ́мже и по́честей ра́вно получи́ша.
Тече́ніемъ твоея́ кро́ве напая́ема, Це́рковь Христо́ва прозяба́етъ оте́ческаго преда́нія Боже́ственное сѣ́мя твои́мъ уче́ніемъ, преподо́бне.
Богоро́диченъ: Изба́вльшеся Рождество́мъ Твои́мъ грѣхо́внаго до́лга, Всенепоро́чная, ра́достное пѣ́ніе возсыла́емъ Тебѣ́, Богоневѣ́сто.
Житія́ твоего́ непоро́чное и ра́зума неужа́сное мно́жества премно́га зря́ще, къ Бо́гу приступи́ша, му́чениче сла́вне.
Го́ру дости́гъ, всели́лся еси́, Боже́ственнымъ наставля́емь, блаже́нне, Ду́хомъ, отъ а́нгела же пита́емь, а́нгеловъ яви́лся еси́ равностоя́теленъ.
Сострада́тельно расточи́въ, да́лъ еси́ убо́гимъ, я́коже повелѣ́но бы́сть, возме́здіе пріе́мля, блаже́нне, во вѣ́ки непроходи́мыя.
Богоро́диченъ: Во́льно обнища́вшаго бога́тствомъ бла́гости, Пребоже́ственнаго, Богоро́дице, родила́ еси́, на́шу нищету́ уще́дрившаго.
Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.
Ра́зумъ земноро́дныхъ собра́въ и небе́сныхъ, впра́вду филосо́фъ имену́ется Макси́мъ.
Прему́дрости безмѣ́рнымъ жела́ніемъ Христа́ твоего́ подо́бникъ изря́днѣйшій яви́лся еси́, сла́вный Макси́ме.
Гнѣ́вомъ изгна́нъ бы́лъ еси́ мучи́теля, обрѣ́лъ же еси́, блаже́нне, Іису́са утѣше́ніе.
Богоро́диченъ: Тя́ Богоро́дицу невѣ́дущіи, Богома́ти, Свѣ́та да не у́зрятъ, ро́ждшагося изъ Тебе́, Пречи́стая.
Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.
Та́инъ неизрече́нныхъ испо́лненъ бы́въ, досточу́дне, къ предлежа́щимъ страда́нія, ра́дуяся, отлучи́лся еси́ му́жескимъ подвиго́мъ, не убоя́вся му́къ, ниже́ сме́рти, му́чениче Неофи́те.
Неизрече́ннымъ промышле́ніемъ твоя́ Направля́ющаго ше́ствія, сла́вне, предста́вше, боже́ственніи а́нгели къ по́двигу влеча́ху тя́ отъ горы́, я́коже друга́го Моисе́я, просла́вленна лице́мъ Боже́ственными свѣтлостьми́.
Глаго́лъ жи́въ въ се́рдцѣ имѣ́я, всесла́вне му́чениче Неофи́те, дерзнове́ннымъ умо́мъ гони́телемъ вопія́лъ еси́: самозва́нъ не и́щущимъ мя́ обрѣто́хся ны́нѣ обличи́ти ва́шея вѣ́ры не́мощь.
Богоро́диченъ: Еже пре́жде всѣ́хъ вѣко́въ, Отрокови́це Всенепоро́чная, Боже́ственное та́инство сокрове́нное Тобо́ю позна́ся конце́мъ: Сы́нъ и Сло́во Бо́жіе, пло́ть бы́въ и обожи́въ, Дѣ́во, человѣ́ка.
Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.
Непреста́нно прино́сиши Бо́гу, богому́дре, мольбу́, душе́вныхъ же и тѣле́сныхъ страсте́й и тлѣ́нія мя́ изба́вити.
Изсуши́ся ересе́й исто́чникъ му́тный ве́сь, сла́вне Макси́ме, загражда́емь шу́момъ язы́ка твоего́.
Очи́сти мя́, Еди́не Бла́же, и исто́чникъ благода́ти, Христе́, се́рдцу моему́ Твоего́ преподо́бнаго моли́твами источи́.
Богоро́диченъ: Краснѣ́йшій па́че всѣ́хъ человѣ́къ Сы́нъ Тво́й, Всечи́стая, добро́тою Божества́, а́ще и пло́ть на́съ ра́ди бы́сть.
Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.
Возвыша́емь на дре́вѣ, всеблаже́нне, желѣ́зомъ по ре́бромъ стро́ганъ бы́лъ еси́ неми́лостивно и льсти́ваго обличе́ньми ожесточе́нное се́рдце расто́рглъ еси́, повелѣва́ющаго жре́ти бого́мъ и Бо́га отврещи́ся Безсме́ртнаго.
Растерза́емъ и вя́жемъ, му́чениче, связа́лъ еси́ до конца́ ле́сть, и врага́ безчи́нная ше́ствія бездѣ́льна показа́лъ еси́ си́лою Ду́ха, и поте́клъ еси́ къ небеси́ вѣнцено́сецъ Го́споду предста́ти.
Услади́вся добро́тами Влады́ки и Тому́ прилѣпи́лся еси́, зовы́й: Сло́ве Бо́жій, Тебе́ ра́ди, поже́ршагося во́лею, а́зъ закала́юся, подо́бяся прея́вственнѣ честны́мъ Твои́мъ и боже́ственнымъ страда́ніемъ.
Богоро́диченъ: Пресвѣ́тлый яви́лася еси́ Престо́лъ Царя́ Небе́снаго, Дѣ́во, на Не́мже пло́тію воспочи́ во́лею, и мно́гій на́шъ до́лгъ отъя́тъ, и посади́ на Отчемъ престо́лѣ Человѣ́ка, я́коже благоволи́лъ е́сть.
Свѣ́тъ Трисія́нный, все́льшійся въ ду́шу твою́, сосу́дъ избра́нъ показа́ тя, всеблаже́нне, явля́юща Боже́ственная конце́мъ, неудобопости́жныхъ разумѣ́ній ты́ сказу́яй, блаже́нне, и Тро́ицу всѣ́мъ, Макси́ме, возпроповѣ́дуяй я́сно, Пресу́щную, Безнача́льную.
Подража́тель яви́вся Спа́совыхъ страсте́й и Того́ въ души́ твое́й имѣ́я, всеблаже́нне, восхожде́нія въ се́рдцы твое́мъ возложи́лъ еси́, пребога́те. То́й же тебѣ́ подаде́ благода́ть съ небесе́, сопроти́вилъ бо ся еси́ мучи́телемъ, му́дре, му́жески, Безнача́льную, и Боже́ственную, и Единосу́щную Тро́ицу проповѣ́дуя и облича́я злосла́вныя и богобо́рныя. Безчи́сленныя претерпѣ́лъ еси́ напа́сти, всехва́льне, язы́ка отрѣ́заніе богосло́внаго, преподо́бне, и твоея́ руки́ вку́пѣ. Не преста́лъ же еси́ ты́, со дерзнове́ніемъ глаго́ля и утвержда́я вѣ́рныя боже́ственными твои́ми уче́ніи, Тро́ицу всѣ́мъ лю́демъ проповѣ́дуя я́сно, Пресу́щную, Безнача́льную.
Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.
Еди́но естество́ Тро́ицы, еди́но хотѣ́ніе ре́клъ еси́, еди́но дѣ́йство, Бо́га же, вопло́щшагося во двою́ естеству́, хотѣ́нію же и дѣ́йству проповѣ́далъ еси́. Отце́въ на́шихъ Бо́же, благослове́нъ еси́.
Не во́ли двѣ́ раздѣля́емыя ра́зума проти́вностію, ка́чествомъ же па́че проповѣ́далъ еси́, о́тче, есте́ственнымъ ра́знствующія. Отце́въ на́шихъ Бо́же, благослове́нъ еси́.
Сто́лпъ правосла́вія боже́ственная твоя́ словеса́, о́тче, держа́ще, Еди́наго отъ Тро́ицы во дву́хъ существа́хъ и во́ляхъ почита́емъ. Отце́въ на́шихъ Бо́же, благослове́нъ еси́.
Богоро́диченъ: Юнаго нося́щи Младе́нца, пре́жде всѣ́хъ вѣко́въ Бо́га, Всенепоро́чная, изъ Тебе́ вопло́щшагося, не преста́й моля́щи спасти́ пою́щія: отце́въ на́шихъ Бо́же, благослове́нъ еси́.
Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.
Пе́щь живогоря́щу сотвори́въ, пребеззако́нный въ се́й заключа́етъ на три́ дни́, не опали́лся же еси́ отню́дъ, вопія́, Неофи́те: благослове́нъ еси́, Го́споди Бо́же, во вѣ́ки.
Наслажда́ешися пѣ́сней пресла́вно, стоя́щу ти́ посредѣ́ пла́мене, блаже́нне, роса́ бо Бо́жія прохлажда́ше тя́, му́чениче, вопію́ща: благослове́нъ еси́, Го́споди Бо́же, во вѣ́ки.
Велича́йшее чу́до удивля́я вся́къ у́мъ, въ тебѣ́ содѣ́янное: и́бо о́гнь ника́коже опали́ тя, богому́дре, разлія́вся же, попали́ огня́ наслѣ́дники.
Богоро́диченъ: Яви́лася еси́ а́нгеловъ превы́шши, Совѣ́та вели́каго Ангела ро́ждши, Богоро́дице Чи́стая, Ему́же вси́ пѣснопое́мъ: благослове́нъ еси́, Го́споди Бо́же, во вѣ́ки.
Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.
Весьма́ возлюби́въ Превозлюби́вшаго ро́дъ человѣ́ческій, кре́стъ Тво́й взя́лъ еси́ и Тому́, блаже́нне, сраспя́лся еси́, — благослови́те, — поя́, — дѣла́ Госпо́дня, Го́спода.
Устрани́вся вся́кія сла́сти, блаже́нне, смертоно́сныя, тебе́ содѣ́лалъ еси́ всего́ нескве́рно зерца́ло боже́ственное, поя́: благослови́те, вся́ дѣла́ Госпо́дня, Го́спода.
Живоно́сну зарю́ отъ Еди́наго Божества́ Тріѵпоста́снаго пріе́мъ, яви́лся еси́ су́щимъ во тмѣ́ со́лнце заблу́ждшимъ, — благослови́те, — поя́, — вся́ дѣла́ Госпо́дня, Го́спода.
Богоро́диченъ: Жи́зни Тя́ Ма́терь и Бо́га Роди́тельницу позна́вше, правосла́вною вѣ́рою вси́ блажи́мъ, Богороди́тельнице, благосло́вяще ку́пно Рождество́ Твое́, Чи́стая, и превознося́ще во вѣ́ки.
Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.
Юнымъ, всеблаже́нне, тѣ́ломъ и соверше́ннымъ мудрова́ніемъ началозло́бнаго лука́вство погуби́лъ еси́, Са́дъ краснѣ́йшій, прозя́бшій во дво́рѣхъ, отъ Іессе́ева изра́стшаго ко́рене, къ Нему́же вопія́лъ еси́ непреста́нно: свяще́нницы, воспо́йте, лю́діе, превозноси́те во вся́ вѣ́ки.
На суди́щи звѣ́ріе тебе́, страстоте́рпче, устыдѣ́шася, я́коже Даніи́ла свяще́ннаго пе́рвѣе, Христо́выхъ бо тя́ позна́ша страда́ній свидѣ́теля. Его́же исповѣ́дуя, нестерпи́мыя му́ки претерпѣ́лъ еси́, взыва́я: свяще́нницы, воспо́йте, лю́діе, превозноси́те во вся́ вѣ́ки.
Позна́вый тя́ пе́рвѣе въ горѣ́, Неофи́те, ле́въ превели́кій, на суди́щи свя́зану приведе́нъ, напуща́ется въ муче́ніи твое́мъ, страда́льче и, позна́въ, покланя́шеся тебѣ́ со стра́хомъ, студо́мъ одержи́мь и исто́чники умиле́ніемъ сле́зъ благочу́вственнѣ пролива́я, богоблаже́нне.
Богоро́диченъ: Но́во Отроча́ родила́ еси́, пре́жде всея́ тва́ри ро́ждшагося изъ Отца́ несказа́нно, Всечи́стая. Того́ у́бо моли́ обветша́вшаго прегрѣше́ньми ны́нѣ обнови́ти и вопію́ща мя́ спасти́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.
Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.
Еще́ твоя́, я́ко Авелева, кро́вь и во вѣ́ки богодохнове́нныя догма́ты гла́сомъ я́снымъ Христо́вѣ Це́ркви проповѣ́дуетъ, Макси́ме всеблаже́нне и превели́кій.
Отсѣче́ся рука́, пи́шетъ же боже́ственнымъ пе́рстомъ, я́ко тро́стію и черни́ломъ, отрѣ́заннымъ язы́комъ и твое́ю кро́вію честно́ю вѣ́ру въ сердца́хъ правосла́вную.
Ста́лъ еси́ предъ престо́ломъ Боже́ственнымъ съ му́ченики, и́хже ре́вности и вѣ́ры пріобщи́лся еси́, о́тче, и на́съ усво́й Влады́цѣ и твоя́ подража́тели содѣ́лай.
Богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ заступле́ніе къ Тебѣ́ прибѣга́ющихъ, Тя́ и ны́нѣ на моли́тву предлага́емъ, да изба́вимся отъ враго́въ на́шихъ.
Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.
Ста́лъ еси́, я́коже а́гнецъ, къ заколе́нію во́льнѣ предлежа́ убива́ющимъ тя́ го́рькимъ мучи́телемъ, му́чениче Неофи́те, и, прободе́нъ въ твоя́ ре́бра копіе́мъ, блаже́нный коне́цъ воспрія́лъ еси́, страстоте́рпче Христо́въ до́блественнѣйше.
Яко же́ртва, я́ко добро́ а́гня, я́ко честно́е заколе́ніе, я́коже возложе́ніе хра́ма свята́го, я́коже приноше́ніе чи́стое, я́коже пти́ца избра́нна, я́коже юне́цъ многоцѣ́ненъ, я́коже но́въ, блаже́нне, са́дъ ра́йскій, Бо́гу прине́слся еси́.
Сообра́зенъ бы́лъ еси́ страсте́мъ Пострада́вшаго на́съ ра́ди бла́гостію, и ра́венствомъ копія́, му́чениче, вои́стинну просла́вился еси́, и ны́нѣ живе́ши на небесѣ́хъ, побѣ́ды діади́мою украша́емь и ра́дости непрее́мныя исполня́емь.
Богоро́диченъ: Нося́щи, я́коже клеща́, небе́сный, Богоро́дице, Угль, хвра́стныя моего́ се́рдца стра́сти вся́ попаля́ющій, и гее́нскаго огня́ изба́ви мя́, молю́ся, да прославля́ю Тя́, Наде́жду вѣ́рныхъ, Всенепоро́чная.
Труба́ яви́лся еси́ прему́дрости, благогла́снымъ язы́комъ твои́мъ проти́вныхъ ужаса́я полки́, Макси́ме, свѣ́тъ мона́шествующихъ, тѣ́мже, твои́ми пита́ющеся словесы́, ра́зумъ познава́емъ су́щихъ.
Свѣ́тъ мы́сленнаго весе́лія возсія́ла еси́ въ мíрѣ, Богороди́тельнице Дѣ́во, Изба́вителя и Влады́ку, тѣ́мже помоли́ся души́ моея́ зѣ́ницы просвѣти́ти свѣ́томъ свѣ́тлости Боже́ственныя.
НА ЛИТУРГІИ.
Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ ко Евре́емъ, зача́ло 330. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе Луки́, зача́ло 64. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.
Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 246 – 255 об.